ᠡᠬᠡ ᠶᠢᠨ ᠬᠠᠶᠢᠷ᠎ᠠ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2024/12/11
          ᠡᠨᠡ ᠡᠳᠦᠷ ᠪᠣᠯ ᠡᠬᠡᠴᠦᠦᠯ ᠤᠨ ᠪᠠᠶᠠᠷ ᠤᠨ ᠡᠳᠦᠷ᠃ ᠮᠥᠨ ᠴᠦ ᠡᠳᠦᠢ ᠲᠡᠳᠦᠢ ᠥᠨᠥᠴᠢᠨ ᠥᠷᠥᠭᠡᠰᠦᠨ ᠬᠤᠴᠣᠷᠤᠭᠰᠠᠳ ᠤᠨ ᠡᠵᠢ ᠪᠠᠨ ᠳᠤᠷᠠᠰᠬᠤ ᠳᠤᠷᠠᠰᠤᠮᠵᠢ ᠶᠢᠨ ᠡᠳᠦᠷ᠃ ᠮᠠᠨ ᠤ ᠡᠮᠡᠭᠲᠡᠶᠢᠴᠦᠳ ᠬᠥᠮᠥᠨ ᠤ ᠠᠮᠢᠳᠤᠷᠠᠯ ᠤᠨ ᠵᠠᠮ ᠵᠢᠷᠤᠮ ᠢᠶᠠᠷ ᠠᠶᠢᠯ ᠡᠷᠦᠭᠡ ᠪᠣᠰᠬᠠᠨ᠂ ᠦᠷ᠎ᠡ ᠶᠢᠨ ᠵᠤᠯᠠᠢ ᠦᠨᠦᠷᠯᠡᠨ᠂ ᠠᠮᠢᠳᠤᠷᠠᠯ ᠤᠨ ᠤᠷᠳᠤ ᠠᠶᠠᠨ ᠳᠤ ᠥᠪᠡᠷ ᠥᠪᠡᠷ ᠤᠨ ᠵᠠᠶᠠᠭ᠎ᠠ ᠲᠥᠭᠡᠷᠭᠡ ᠪᠠᠷ ᠢᠶᠠᠨ ᠲᠦᠷᠦᠭᠰᠡᠨ ᠡᠵᠢ᠂ ᠬᠤᠶᠢᠲᠤ ᠡᠵᠢ᠂ ᠡᠷᠭᠦᠯᠲᠡ ᠡᠵᠢ ᠨᠠᠷ ᠤᠨ ᠠᠯᠢ ᠨᠢᠭᠡᠨ ᠤ ᠬᠢᠨᠢ ᠠᠮᠢᠳᠤᠷᠠᠯ ᠤᠨ ᠲᠠᠶᠢᠵᠠᠨ ᠳᠤ ︽ᠲᠣᠭᠯᠠᠭᠴᠢ ᠪᠠᠷ ᠤᠷᠢᠭᠳᠠᠨ︾᠂ ᠠᠯᠳᠠᠬᠤ ᠳᠠᠭᠠᠨ ᠠᠯᠳᠠᠵᠤ᠂ ᠤᠨᠤᠬᠤ ᠳᠠᠭᠠᠨ ᠤᠨᠤᠨ ᠠᠮᠢᠳᠤᠷᠠᠯ ᠲᠠᠢ ᠲᠤᠯᠤᠯᠳᠤᠨ ᠲᠤᠯᠤᠯᠳᠤᠭᠰᠠᠭᠠᠷ ᠨᠠᠰᠤ ᠶᠢ ᠡᠯᠡᠭᠡᠳᠡᠭ᠃          ᠬᠥᠮᠥᠨ ᠤ ᠨᠢᠭᠡ ᠨᠡᠰᠦᠨ ᠳᠤ ᠲᠦᠷᠦᠭᠰᠡᠨ ᠡᠵᠢ ᠭᠠᠭᠴᠠᠬᠠᠨ ᠵᠠᠶᠠᠭᠠᠨ᠎ᠠ᠃ ᠲᠦᠷᠦᠭᠰᠡᠨ ᠡᠵᠢ ᠮᠢᠨᠢ ᠠᠮᠢᠳᠤ ᠰᠡᠷᠡᠭᠦᠨ ᠪᠠᠶᠢᠭᠰᠠᠨ ᠰᠠᠨ ᠪᠣᠯ ᠡᠨᠡ ᠵᠢᠯ ᠨᠠᠶᠠᠨ ᠲᠠᠪᠤᠨ ᠤ ᠬᠢᠨᠢ ᠵᠢᠯ ᠢ ᠣᠷᠣᠭᠤᠯᠤᠨ ᠠᠪᠤ ᠡᠵᠢ᠂ ᠠᠬ᠎ᠠ ᠳᠡᠭᠦᠦ ᠨᠠᠷ ᠲᠠᠢ ᠪᠠᠨ ᠬᠠᠮᠲᠤ ᠪᠠᠶᠠᠰᠤᠯᠴᠠᠬᠤ ᠪᠠᠶᠢᠯ᠎ᠠ᠃ ᠬᠠᠷᠠᠰᠠᠯᠲᠠᠢ ᠨᠢ ᠣᠭᠤᠰᠣᠷ ᠪᠦᠴᠡ ᠦᠭᠡᠢ ᠣᠷᠴᠢᠯᠠᠩ ᠬᠠᠨᠢ ᠨᠥᠬᠦᠷ᠂ ᠦᠷ᠎ᠡ ᠬᠡᠦᠬᠡᠳ ᠢ ᠨᠢ ᠭᠠᠰᠢᠭᠤᠳᠠᠯ ᠤᠨ ᠮᠠᠨᠠᠨ ᠳᠤ ᠵᠢᠪᠦᠭᠦᠯᠵᠦ ᠤᠷᠭᠢᠭᠠᠳ ᠬᠤᠷᠢᠨ ᠳᠣᠯᠣᠭᠠᠬᠠᠨ ᠨᠠᠰᠤ ᠲᠠᠢ ᠡᠵᠢ ᠶᠢ ᠮᠢᠨᠢ ᠠᠪᠤᠭᠠᠳ ᠶᠠᠪᠤᠴᠢᠬᠠᠭᠰᠠᠨ ᠶᠤᠮ᠃ ᠬᠤᠷᠸ᠎ᠠ ᠭᠡᠭᠴᠢ ᠬᠠᠲᠠᠭᠤ ᠳᠠᠭᠠᠨ ᠬᠠᠲᠠᠭᠤ᠃          ᠠᠶᠢᠷᠠᠭ ᠪᠦᠯᠢᠭᠰᠡᠨ ᠡᠵᠢ ᠶᠢᠨ ᠲᠤᠩ ᠤᠨ ᠠᠮᠠᠰᠠᠷ ᠢᠶᠠᠷ ᠴᠠᠯᠭᠢᠭᠰᠠᠨ ᠠᠶᠢᠷᠠᠭ ᠢ ᠨᠢ ᠬᠤᠷᠤᠭᠤ ᠪᠠᠷ ᠢᠶᠠᠨ ᠳᠣᠯᠢᠶᠠᠭᠠᠳ ᠵᠣᠭᠰᠣᠵᠤ ᠪᠠᠶᠢᠬᠰᠠᠨ；ᠰᠢᠷ᠎ᠠ ᠲᠣᠰᠣ ᠰᠢᠷᠭᠠᠭᠠᠵᠤ ᠰᠠᠭᠤᠭ᠎ᠠ ᠡᠵᠢ ᠶᠢᠨ ᠢᠶᠠᠨ ᠳᠡᠷᠭᠡᠳᠡ ᠴᠥᠴᠥᠭᠡᠢ ᠢᠳᠡᠬᠦ ᠪᠠᠷ ᠠᠶᠠᠭ᠎ᠠ ᠪᠠᠷᠢᠨ ᠲᠣᠭᠤᠭ᠎ᠠ ᠥᠩᠭᠡᠶᠢᠵᠦ ᠬᠦᠯᠢᠶᠡᠵᠦ ᠵᠤᠬᠰᠤᠬᠰᠠᠨ；ᠰᠠᠯᠬᠢ ᠲᠠᠢ ᠡᠳᠦᠷ ᠭᠠᠯ ᠠᠪᠤᠯᠴᠠᠨ ᠭᠠᠳᠠᠭᠰᠢ ᠳᠤᠲᠠᠭᠠᠭᠰᠠᠨ ᠠᠬ᠎ᠠ ᠶᠢᠨ ᠠᠷᠤ ᠠᠴᠠ ᠬᠥᠯ ᠬᠦᠨᠳᠦ ᠲᠠᠢ ᠡᠵᠢ ᠮᠢᠨᠢ ᠨᠡᠷ᠎ᠡ ᠪᠠᠷ ᠨᠢ ᠳᠠᠭᠤᠳᠠᠨ ᠤᠨᠠᠵᠤ ᠲᠤᠰᠤᠨ ᠭᠦᠶᠦᠵᠦ ᠪᠠᠶᠢᠬᠰᠠᠨ；ᠲᠤᠶᠢᠯ ᠤᠨ ᠬᠠᠯᠠᠭᠤᠨ ᠳᠤ ᠮᠣᠷᠢᠨ ᠬᠠᠰᠠᠭ ᠲᠤ ᠲᠡᠭᠡᠭᠡᠭᠳᠡᠨ ᠵᠡᠭᠦᠨ ᠨᠢᠷᠤᠭᠤᠨ ᠳᠡᠭᠡᠭᠦᠷ ᠳᠠᠪᠠᠵᠤ ᠣᠲᠣᠭᠰᠠᠨ ᠡᠴᠦᠰ ᠤᠨ ᠪᠠᠷ᠎ᠠ ᠁ ᠮᠢᠨᠤ ᠲᠦᠷᠦᠭᠰᠡᠨ ᠡᠵᠢ ᠲᠠᠢ ᠪᠠᠨ ᠪᠠᠶᠢᠬᠤ ᠶᠢᠨ ᠭᠡᠭᠡᠨ ᠳᠤᠷᠠᠰᠤᠮᠵᠢ ᠶᠡᠷᠦᠳᠡᠭᠡᠨ ᠯᠡ ᠡᠳᠦᠶᠢᠬᠡᠨ᠃ ᠭᠠᠷ ᠤᠨ ᠳᠥᠷᠪᠡᠬᠡᠨ ᠬᠤᠷᠤᠭᠤᠨ ᠳᠤ ᠪᠠᠭᠲᠠᠬᠤ ᠲᠡᠳᠦᠶᠢᠬᠡᠨ ᠳᠤᠷᠠᠰᠤᠮᠵᠢ ᠯᠠ ᠨᠠᠮᠠᠶᠢ ︽ᠪᠢ ᠴᠢᠨᠢ ᠦᠷ᠎ᠡ ᠳᠡᠭᠡᠨ ᠬᠠᠶᠢᠷᠠᠲᠠᠢ ᠡᠵᠢ ᠶᠢᠨ ᠥᠬᠢᠨ ᠰᠢᠤ ᠳ᠋ᠠ︕︾ ᠭᠡᠬᠦ ᠢᠲᠡᠭᠡᠯ ᠵᠢᠳᠬᠦᠯ ᠢ ᠡᠪᠦᠷᠯᠡᠨ ᠪᠡᠶ᠎ᠡ ᠳᠡᠭᠡᠨ ᠡᠷᠴᠢ ᠬᠦᠴᠦ ᠥᠭᠴᠦ ᠰᠡᠳᠬᠢᠯ ᠤᠨ ᠲᠡᠩᠬᠡᠭᠡ ᠲᠠᠢ ᠶᠠᠪᠤᠵᠤ ᠢᠷᠡᠯ᠎ᠡ᠃          ᠭᠡᠲᠡᠯ᠎ᠡ ᠲᠦᠷᠦᠭᠰᠡᠨ ᠡᠵᠢ ᠶᠢᠨ ᠬᠠᠶᠢᠷ᠎ᠠ ᠬᠠᠯᠠᠮᠵᠢ ᠳᠡᠭᠡᠷ᠎ᠡ ᠪᠥᠮᠪᠥᠷᠢᠵᠦ ᠥᠰᠦᠭᠰᠡᠨ ᠬᠥᠮᠥᠨ᠂ ᠡᠬᠡ ᠶᠢᠨ ᠬᠠᠶᠢᠷ᠎ᠠ ᠶᠢᠨ ᠠᠭᠤᠤ ᠶᠡᠭᠡ ᠶᠢ ᠲᠡᠳᠦᠢ ᠯᠡ ᠰᠠᠨᠠᠭᠠᠨ ᠳᠠᠭᠠᠨ ᠠᠪᠳᠠᠭ ᠦᠭᠡᠢ ᠨᠢ ᠳᠠᠩᠴᠤ ᠬᠠᠷᠠᠮᠰᠠᠯᠲᠠᠢ᠃          ᠨᠢᠭᠡ ᠡᠳᠦᠷ ᠪᠢ ᠨᠠᠶᠢᠵᠠ ᠨᠠᠷ ᠤᠨ ᠢᠶᠠᠨ ᠬᠠᠮᠲᠤ ᠬᠤᠭᠤᠯᠠᠨ ᠭᠡᠷ ᠲᠤ ᠶᠠᠷᠢᠵᠤ ᠵᠣᠭᠤᠭᠳᠠᠨ ᠨᠠᠷᠭᠢᠯᠳᠤᠵᠤ ᠰᠠᠭᠤᠯ᠎ᠠ᠃          ᠬᠠᠵᠠᠭᠤ ᠶᠢᠨ ᠰᠢᠷᠡᠭᠡᠨ ᠳᠤ ᠬᠡᠰᠡᠭ ᠵᠠᠯᠠᠭᠤᠴᠤᠳ ᠪᠠᠰᠠ ᠨᠠᠭᠠᠳᠴᠤ ᠨᠠᠷᠭᠢᠵᠠᠭᠠᠨ᠎ᠠ᠃ ᠲᠡᠭᠡᠲᠡᠯ᠎ᠡ ᠨᠢᠭᠡ ᠥᠬᠢᠨ ᠤ ᠭᠠᠷ ᠤᠲᠠᠰᠤ ᠳᠤᠤᠭᠠᠷᠪᠠ᠃          - ᠬᠠᠷᠢᠨ᠎ᠠ᠂ ᠬᠠᠷᠢᠨ᠎ᠠ᠃ ᠤᠳᠠᠬᠤ ᠦᠭᠡᠢ ᠬᠠᠷᠢᠨ᠎ᠠ︕ ᠲᠠ ᠤᠷᠢᠳ ᠢᠶᠠᠷ ᠤᠨᠲᠠᠵᠤ ᠪᠠᠢ︕ ᠭᠡᠵᠦ ᠰᠢᠷᠦᠭᠦᠬᠡᠨ ᠳᠤᠤᠭᠠᠷᠤᠭᠠᠳ ᠭᠠᠷ ᠤᠲᠠᠰᠤ ᠪᠠᠨ ᠬᠠᠭᠠᠪᠠ᠃ ᠬᠠᠵᠠᠭᠤ ᠶᠢᠨ ᠥᠬᠢᠨ᠄ ︽ᠡᠵᠢ ᠴᠢᠨᠢ ᠤᠤ︖ ᠡᠶᠢᠮᠦ ᠲᠣᠮᠣ ᠪᠣᠯᠴᠢᠬᠠᠭᠰᠠᠨ ᠥᠬᠢᠨ ᠢᠶᠠᠨ ᠪᠠᠰᠠ ᠯᠠ ᠴᠡᠴᠡᠷᠯᠢᠭ ᠤᠨ ᠬᠡᠦᠬᠡᠳ ᠰᠢᠭ ᠬᠠᠮᠢᠶᠠᠷᠤᠭᠰᠠᠭᠠᠷ ᠤᠤ︖ ᠶᠠᠮᠠᠷ ᠶᠠᠳᠠᠷᠠᠭᠠᠨ ᠲᠠᠢ ᠶᠤᠮ︾ ᠭᠡᠵᠦ ᠡᠪᠡᠷ ᠲᠠᠢ ᠲᠠᠤᠯᠠᠢ ᠦᠵᠡᠭᠰᠡᠨ ᠰᠢᠭ ᠡᠭᠳᠡᠭᠦᠦ ᠲᠠᠢ ᠳᠤᠤᠭᠠᠷᠪᠠ᠃          - ᠮᠢᠨᠤ ᠠᠪᠤ ᠡᠵᠢ ᠨᠠᠮᠠᠶᠢ ᠠᠯᠢ ᠬᠡᠳᠦᠶᠢᠨ ᠬᠠᠮᠢᠶᠠᠷᠬᠤ ᠪᠠᠨ ᠪᠠᠶᠢᠴᠢᠬᠠᠭᠰᠠᠨ᠃ ᠲᠠᠭᠢᠭᠠᠳ ᠤᠲᠠᠰᠤᠳᠠᠪᠠᠯ ᠪᠢᠲᠡᠭᠡᠢ ᠲᠤᠰ︕          - ᠪᠤᠯᠬᠤ ᠦᠭᠡᠢ ᠪᠣᠯ ᠤᠲᠠᠰᠤ ᠪᠠᠨ ᠨᠠᠮ ᠲᠠᠭᠤᠨ ᠳᠡᠭᠡᠷ᠎ᠡ ᠨᠢ ᠲᠠᠭᠠᠷᠠᠭᠤᠯᠴᠢᠭ᠎ᠠ︕ ᠨᠢᠭᠡᠮᠦᠰᠦᠨ ᠬᠠᠭᠠᠭᠰᠠᠨ ᠴᠦ ᠶᠠᠭᠠᠬᠢᠳᠠᠭ ᠶᠤᠮ︖           - ᠪᠡᠶ᠎ᠡ ᠳᠡᠭᠡᠨ ᠡᠵᠡᠨ ᠰᠠᠭᠤᠭᠰᠠᠨ ᠴᠢᠮᠠᠶᠢ ᠪᠠᠰᠠ ᠯᠠ ᠰᠡᠭᠦᠯᠳᠡᠭᠰᠡᠭᠡᠷ ᠤᠤ︖ ᠬᠡᠮᠡᠨ ᠲᠠᠯ᠎ᠠ ᠲᠠᠯ᠎ᠠ ᠠᠴᠠ ᠨᠢ ᠡᠵᠢ ᠶᠢ ᠨᠢ ᠪᠤᠷᠤᠭᠤᠳᠬᠠᠨ ᠶᠠᠭᠠᠬᠢᠵᠤ ᠲᠡᠷᠰᠯᠡᠬᠦ ᠲᠤᠬᠠᠢ ︽ᠬᠥᠮᠥᠵᠢᠭᠦᠯᠵᠦ︾ ᠭᠠᠷᠤᠯ᠎ᠠ᠃          - ᠮᠠᠨ ᠤ ᠡᠵᠢ ᠴᠦ ᠥᠲᠡᠯᠬᠦ ᠲᠤᠰᠤᠮ ᠶᠠᠩᠰᠢᠬᠤ ᠨᠢ ᠠᠷᠪᠢᠳᠤᠭᠠᠳ᠂ ᠵᠠᠷᠢᠮ ᠦᠶ᠎ᠡ ᠳᠤ ᠦᠬᠦᠭᠰᠡᠨ ᠴᠦ ᠪᠣᠯᠣᠭᠠᠰᠠᠢ ᠭᠡᠬᠦ ᠪᠤᠳᠤᠯ ᠳᠦᠷᠦᠳᠡᠭ︕ ᠭᠡᠳ ᠨᠢᠭᠡ ᠵᠠᠯᠠᠭᠤ ᠬᠤᠨᠳᠠᠭᠠᠨ ᠳᠠᠭᠠᠨ ᠠᠷᠢᠬᠢ ᠨᠡᠮᠡᠵᠦ ᠪᠠᠶᠢᠨ᠎ᠠ᠃          ︽ᠣᠴᠢᠵᠤ ᠣᠴᠢᠵᠤ ᠲᠦᠷᠦᠭᠰᠡᠨ ᠡᠵᠢ ᠠᠴᠠ ᠪᠠᠨ ᠤᠶᠢᠳᠬᠤ ᠪᠣᠯᠵᠤ᠃ ᠶᠣᠰᠣᠲᠠᠢ ᠬᠠᠷ᠎ᠠ ᠨᠢᠯᠬ᠎ᠠ ᠪᠠᠷ ᠨᠢ ᠥᠨᠥᠴᠢᠷᠡᠭᠦᠯᠵᠦ ᠪᠠᠶᠢᠯᠲᠠᠢ ᠲᠤᠷᠤᠰᠬ᠎ᠠ ᠪᠤᠢ︕︾ ᠭᠡᠰᠡᠨ ᠬᠠᠷᠢᠶᠠᠯ ᠵᠦᠬᠡᠯ ᠤᠨ ᠰᠢᠨᠵᠢ ᠲᠠᠢ ᠬᠠᠴᠢᠨ ᠪᠤᠳᠤᠯ᠂ ᠰᠡᠳᠬᠢᠯ ᠳᠤ ᠣᠭᠰᠢᠭᠠᠳ ᠶᠠᠪᠤᠴᠢᠬᠠᠪᠠ᠃ ︽ᠡᠵᠢ ᠬᠥᠮᠥᠨ ᠤ ᠰᠡᠳᠬᠢᠯ ᠳᠤ ᠡᠶᠢᠮᠦ ᠪᠤᠳᠤᠯ ᠶᠠᠭᠠᠬᠢᠵᠤ ᠪᠠᠭᠲᠠᠪᠠ︕︾ ᠬᠡᠮᠡᠨ ᠪᠢ ᠥᠪᠡᠷ ᠢᠶᠠᠨ ᠥᠪᠡᠷ ᠢ ᠪᠠᠨ ᠵᠢᠮᠡᠯᠡᠵᠦ᠂ ᠲᠣᠯᠣᠭᠠᠢ ᠡᠪᠡᠳᠴᠦ ᠪᠠᠶᠢᠬᠤ ᠪᠠᠷ ᠰᠢᠯᠲᠠᠨ᠂ ᠬᠤᠭᠤᠯᠠᠨ ᠰᠢᠷᠡᠭᠡᠨ ᠠᠴᠠ ᠰᠠᠯᠤᠯ᠎ᠠ᠃          ᠣᠴᠢᠵᠤ ᠣᠴᠢᠵᠤ ᠲᠦᠷᠦᠭᠰᠡᠨ ᠡᠵᠢ ᠠᠴᠠ ᠪᠠᠨ ᠤᠶᠢᠳᠤᠨ᠎ᠠ ᠭᠡᠨ᠎ᠡ ᠰᠢᠤ︕ ᠳᠤᠲᠠᠵᠤ ᠳᠤᠨᠳᠠᠷᠠᠨ ᠶᠠᠳᠠᠷᠠᠵᠤ ᠲᠤᠶᠢᠯᠳᠠᠬᠤ᠂ ᠠᠵᠢᠯ ᠦᠢᠯᠡᠰ ᠠᠬᠢᠴᠠ ᠦᠭᠡᠢ ᠪᠤᠯᠬᠤ ᠁ ᠭᠡᠳ ᠲᠠᠭ᠎ᠠ ᠦᠭᠡᠢ ᠶᠠᠪᠤᠳᠠᠯ ᠲᠣᠬᠢᠶᠠᠯᠳᠤᠬᠤ ᠶᠢᠨ ᠴᠠᠭ ᠲᠤ ᠡᠵᠢ ᠳᠡᠭᠡᠨ ᠣᠴᠢᠭᠠᠳ ᠰᠡᠳᠬᠢᠯ ᠢᠶᠠᠨ ᠠᠭᠤᠵᠢᠷᠠᠲᠠᠯ᠎ᠠ ᠤᠭᠢᠯᠠᠴᠢᠬᠠᠬᠤ ᠶᠤᠮᠰᠠᠨ ᠭᠡᠵᠦ ᠭᠠᠴᠢᠭᠳᠠᠬᠤ ᠦᠶ᠎ᠡ ᠲᠠᠭᠠᠷᠠᠳᠠᠭ ᠯᠠ ᠶᠤᠮ᠃ ᠮᠠᠭᠲᠠᠭᠠᠯ ᠰᠠᠶᠢᠰᠢᠶᠠᠯ᠂ ᠱᠠᠩᠨᠠᠯ ᠬᠥᠬᠢᠭᠦᠯᠦᠯ ᠣᠯᠴᠢᠬᠠᠭᠠᠳ ᠠᠵᠠ ᠵᠢᠷᠭᠠᠯ ᠢᠶᠠᠨ ᠬᠡᠨ ᠨᠢᠭᠡᠨ ᠲᠠᠢ ᠬᠤᠪᠢᠶᠠᠯᠴᠠᠬᠤ ᠶᠤᠮᠰᠠᠨ ᠭᠡᠵᠦ ᠬᠥᠭᠰᠡᠬᠦ ᠦᠶ᠎ᠡ ᠴᠦ ᠪᠤᠢ᠃ ᠲᠡᠷᠡ ᠲᠤᠰᠤᠮ ᠢᠶᠠᠨ ᠬᠡᠦᠬᠡᠨ ᠥᠬᠢᠨ ᠬᠥᠮᠥᠨ ᠬᠠᠨᠢ ᠢᠵᠢᠯᠢ ᠲᠠᠢ ᠪᠤᠯᠬᠤ ᠭᠡᠵᠦ ᠪᠠᠶᠢᠭ᠎ᠠ ᠠᠩᠬᠠᠨ ᠤ ᠬᠠᠶᠢᠷ᠎ᠠ ᠶᠢᠨ ᠪᠠᠶᠠᠰᠤᠯᠳᠤ ᠤᠴᠠᠷᠠᠯ ᠢᠶᠠᠨ ᠬᠠᠮᠤᠭ ᠠᠩᠬ᠎ᠠ ᠬᠡᠨ ᠳᠤ ᠰᠢᠪᠡᠨᠡᠬᠦ ᠪᠤᠢ︖ ᠡᠳᠡᠭᠡᠷ ᠨᠢ ᠬᠥᠮᠥᠨ ᠤ ᠠᠮᠢᠳᠤᠷᠠᠯ ᠤᠨ ᠶᠡᠷᠦᠳᠡ ᠶᠢᠨ ᠲᠣᠬᠢᠶᠠᠯᠳᠤᠯ ᠴᠦ ︽ᠲᠦᠷᠦᠭᠰᠡᠨ ᠡᠬᠡ ᠶᠢᠨ ᠬᠠᠶᠢᠷ᠎ᠠ ᠶᠢᠨ ᠠᠷᠭᠠᠮᠵᠢᠶ᠎ᠠ︾  ᠠᠴᠠ ᠠᠯᠳᠠᠷᠠᠵᠤ ᠬᠤᠴᠣᠷᠤᠭᠰᠠᠨ ᠥᠨᠥᠴᠢᠨ ᠬᠥᠮᠥᠨ ᠳᠤ ᠠᠪᠴᠤ ᠬᠡᠯᠡᠪᠡᠯ ᠬᠠᠮᠤᠭ ᠤᠨ ᠡᠮᠵᠡᠭ ᠠᠰᠠᠭᠤᠳᠠᠯ᠃          ᠵᠠᠯᠠᠭᠤᠴᠤᠳ ᠠ᠋︕ ︽ᠵᠢᠷᠭᠠᠯ ᠵᠤᠪᠠᠯᠠᠩ ᠢᠶᠠᠨ ᠬᠤᠪᠢᠶᠠᠯᠴᠠᠬᠤ ᠬᠠᠮᠤᠭ ᠤᠨ ᠢᠲᠡᠭᠡᠯ ᠲᠠᠢ ᠬᠥᠮᠥᠨ ᠪᠣᠯ ᠡᠵᠢ ᠴᠢᠨᠢ ᠰᠢᠤ︕︾ ᠭᠡᠳᠡᠭ ᠢ ᠰᠠᠨᠠᠵᠤ ᠶᠠᠪᠤᠬᠤ ᠳᠤ ᠢᠯᠡᠭᠦᠳᠡᠬᠦ ᠦᠭᠡᠢ᠃          ᠪᠠᠰᠠ ᠨᠢᠭᠡ ᠤᠳᠠᠭ᠎ᠠ ᠮᠠᠨ ᠤ ᠵᠡᠷᠭᠡᠯᠡᠳᠡᠭᠡ ᠠᠰᠠᠷ ᠤᠨ ᠵᠠᠯᠠᠭᠤᠬᠠᠨ ᠡᠵᠢ ᠨᠠᠳᠠ᠄ ︽ᠮᠠᠨ ᠤ ᠬᠠᠳᠠᠮ ᠡᠵᠢ ᠪᠠᠰᠠ ᠯᠠ ᠬᠥᠳᠡᠭᠡ ᠮᠠᠯ ᠳᠡᠭᠡᠷ᠎ᠡ ᠪᠠᠨ ᠭᠡᠳ ᠶᠠᠪᠤᠭᠠᠳ ᠥᠭᠭᠦᠭᠰᠡᠨ᠃ ᠲᠦᠷᠦᠭᠰᠡᠨ ᠬᠦᠦ ᠶᠢᠨ ᠢᠶᠠᠨ ᠬᠡᠦᠬᠡᠳ ᠢ ᠬᠠᠷᠠᠬᠤ ᠠᠴᠠ ᠬᠠᠯᠠᠰᠢᠷᠠᠨ᠎ᠠ᠃ ᠥᠲᠡᠯᠦᠭᠰᠡᠨ ᠬᠤᠶᠢᠨ᠎ᠠ ᠪᠠᠨ ᠠᠰᠠᠷᠠᠭᠤᠯᠬᠤ ᠪᠠᠨ ᠮᠠᠷᠲᠠᠭᠰᠠᠨ ᠶᠤᠮ ᠪᠠᠶᠢᠯᠭᠦᠢ︕︾ ᠭᠡᠵᠦ ᠪᠠᠶᠢᠨ᠎ᠠ᠃          ︽ᠡᠪᠦᠭᠡ ᠡᠮᠡᠭᠡ ᠨᠢ ᠣᠮᠪᠣᠯᠣ ᠳᠣᠮᠪᠣᠯᠤ ᠪᠠᠨ ᠰᠠᠭᠠᠲᠠᠭᠤᠯᠵᠤ ᠥᠰᠬᠡᠬᠦ ᠶᠢ ᠬᠥᠭᠰᠢᠷᠡᠭᠰᠡᠨ ᠬᠤᠶᠢᠨ᠎ᠠ ᠪᠠᠨ ᠥᠪᠡᠷ ᠢ ᠪᠠᠨ ᠠᠰᠠᠷᠠᠭᠤᠯᠵᠤ ᠰᠤᠪᠢᠯᠠᠭᠤᠯᠬᠤ ᠭᠡᠰᠡᠨ ᠠᠷᠠᠯᠵᠢᠶ᠎ᠠ ᠮᠠᠶᠢᠮᠠᠢ ᠶᠢᠨ ᠬᠠᠷᠢᠯᠴᠠᠭ᠎ᠠ ᠲᠣᠭᠲᠠᠯᠴᠠᠭ᠎ᠠ ᠪᠠᠷ ᠣᠶᠢᠯᠠᠭᠠᠳᠠᠭ ᠪᠠᠶᠢᠬᠤ ᠨᠢ ᠁︾ ᠭᠡᠵᠦ ᠪᠤᠳᠤᠮᠠᠷ ᠬᠠᠴᠢᠨ ᠶᠠᠭᠤᠮ᠎ᠠ ᠶᠠᠷᠢᠯ᠎ᠠ᠃          ︽ᠲᠠᠨ ᠤ ᠠᠪᠤ ᠡᠵᠢ ᠠᠯᠢ ᠵᠡᠷᠭᠡ ᠶᠠᠭᠠᠷᠠᠤ ᠶᠤᠮ ᠪᠣᠯ ᠳ᠋ᠠ︖︾ ᠭᠡᠰᠡᠨ ᠳᠤ ︽ᠮᠢᠨᠤ ᠬᠦᠦ ᠮᠠᠷᠢᠶ᠎ᠠ ᠲᠠᠢ᠃ ᠲᠡᠷᠡ ᠬᠤᠶᠠᠷ ᠳᠠᠭᠠᠭᠠᠬᠤ ᠦᠭᠡᠢ︕︾ ᠭᠡᠵᠦ ᠪᠠᠶᠢᠨ᠎ᠠ᠃ ᠡᠨᠡ ᠪᠡᠷᠢ ᠶᠢᠨ ᠨᠢᠳᠦᠨ ᠳᠤ ᠬᠠᠳᠠᠮ ᠡᠵᠢ ᠨᠢ ᠡᠪᠦᠳᠦᠭ ᠰᠢᠷᠤᠶᠢᠳᠠᠵᠤ ᠦᠵᠡᠭᠡ ᠦᠭᠡᠢ ᠠᠪᠤᠷᠭᠤ ᠪᠥᠬᠡᠴᠢᠨ ᠰᠢᠭ ᠬᠠᠷᠠᠭᠳᠠᠳᠠᠭ ᠪᠠᠶᠢᠬᠤ ᠨᠢ᠃          ︽ᠠᠮᠢᠳᠤ ᠪᠤᠷᠬᠠᠨ ᠯᠠ ᠪᠢᠰᠢ ᠶᠤᠮ ᠪᠣᠯ ᠡᠶᠢᠮᠦ ᠰᠠᠨᠠᠭ᠎ᠠ ᠪᠤᠳᠤᠯ ᠲᠠᠢ ᠪᠡᠷᠢ ᠶᠢᠨ ᠰᠢᠨᠠᠭᠠᠨ ᠳᠣᠣᠷ᠎ᠠ ᠠᠶᠠᠭ᠎ᠠ ᠲᠤᠰᠴᠤ᠂ ᠡᠳᠦᠷ ᠬᠤᠨᠤᠭ ᠢ ᠥᠩᠭᠡᠷᠡᠭᠡᠨ᠂ ᠣᠮᠪᠣᠯᠣ ᠪᠠᠨ ᠰᠠᠭᠠᠲᠠᠭᠤᠯᠬᠤ ᠭᠡᠭᠴᠢ ᠬᠡᠴᠡᠭᠦᠦ ᠯᠠ ᠪᠠᠶᠢᠳᠠᠭ ᠪᠠᠶᠢᠯᠭᠦᠢ︕︾ ᠭᠡᠵᠦ ᠪᠤᠳᠤᠭᠠᠳ ᠬᠡᠯᠡᠬᠦ ᠦᠭᠡ ᠴᠦ ᠣᠯᠳᠠᠭᠰᠠᠨ ᠦᠭᠡᠢ᠃          ᠨᠢᠭᠡ ᠡᠳᠦᠷ ᠰᠤᠷᠤᠬᠴᠢᠳ ᠤᠨ ᠢᠶᠠᠨ ᠵᠣᠬᠢᠶᠠᠯ ᠢ ᠬᠢᠨᠠᠵᠤ ᠰᠠᠭᠤᠲᠠᠯ᠎ᠠ ︽ᠦᠷ᠎ᠡ ᠪᠠᠨ ᠭᠤᠯᠣᠭᠰᠠᠨ ᠡᠵᠢ︾ ᠭᠡᠰᠡᠨ ᠭᠠᠷᠴᠠᠭ ᠲᠠᠢ ᠵᠣᠬᠢᠶᠠᠯ ᠭᠠᠷᠴᠤ ᠢᠷᠡᠪᠡ᠃ ᠲᠦᠷᠦᠭᠰᠡᠨ ᠡᠵᠢ ᠨᠢ ᠠᠪᠤ ᠲᠠᠢ ᠨᠢ ᠤᠷᠤᠭ ᠰᠠᠯᠤᠭᠠᠳ ᠥᠭᠡᠷ᠎ᠡ ᠬᠥᠮᠥᠨ ᠲᠠᠢ ᠬᠤᠷᠢᠮᠯᠠᠨ ᠭᠠᠭᠴᠠ ᠤᠳᠠᠭ᠎ᠠ ᠴᠦ ᠲᠡᠭᠦᠨ ᠢ ᠡᠷᠭᠢᠵᠦ ᠢᠷᠡᠭᠰᠡᠨ ᠦᠭᠡᠢ᠃ ᠭᠡᠰᠡᠨ ᠴᠦ ᠪᠢᠳᠠ ᠬᠤᠶᠠᠷ ᠨᠢᠭᠤᠴᠠ ᠪᠣᠯᠵᠤᠭ᠎ᠠ ᠲᠠᠢ ᠁ ᠭᠡᠬᠦ ᠮᠡᠲᠦ ᠶᠢᠨ ᠡᠮᠭᠡᠨᠢᠯ ᠲᠠᠢ ᠮᠥᠷᠲᠡᠭᠡᠨ ᠬᠠᠴᠢᠷᠬᠠᠯ ᠲᠠᠢ ᠶᠠᠪᠤᠳᠠᠯ ᠢ ᠪᠢᠴᠢᠵᠡᠢ᠃ ︽ᠪᠢᠴᠢᠬᠠᠨ ᠵᠣᠬᠢᠶᠠᠭᠴᠢ︾ ᠶᠢᠨ ᠢᠶᠠᠨ ᠪᠠᠶᠢᠷᠢ ᠶᠢᠨ ᠠᠮᠢᠳᠤᠷᠠᠯ ᠢ ᠣᠶᠢᠯᠠᠭᠠᠬᠤ ᠪᠠᠷ ᠠᠰᠠᠷᠠᠭᠴᠢ ᠲᠠᠢ ᠨᠢ ᠠᠭᠤᠯᠵᠠᠪᠠ᠃          ᠠᠪᠤ ᠡᠵᠢ ᠲᠠᠢ ᠨᠢ ᠪᠢ ᠨᠢᠭᠡ ᠬᠤᠩᠬᠤᠷ ᠲᠤ ᠥᠰᠦᠭᠰᠡᠨ᠃ ᠠᠪᠤ ᠨᠢ ᠨᠣᠮᠣᠬᠠᠨ ᠯᠡ ᠬᠡᠦᠬᠡᠳ ᠪᠠᠶᠢᠭᠰᠠᠨ ᠶᠤᠮᠳᠠᠭ᠃ ᠰᠠᠷᠬᠤᠳ ︽ᠵᠣᠭᠤᠭᠯᠠᠭᠠᠳ︾ ᠯᠠ ᠡᠬᠡᠨᠡᠷ ᠢᠶᠠᠨ ᠵᠣᠳᠣᠳᠠᠭ ᠬᠠᠴᠢᠨ ᠭᠠᠵᠢᠭ ᠰᠦᠭᠯᠡᠭᠰᠡᠨ ᠶᠤᠮ ᠪᠠᠶᠢᠬᠤ᠃ ᠡᠬᠡᠨᠡᠷ ᠨᠢ ᠬᠥᠭᠡᠷᠦᠬᠦᠢ᠂ ᠵᠣᠳᠣᠭᠤᠷ ᠢ ᠨᠢ ᠳᠠᠭᠠᠭᠠᠬᠤ ᠦᠭᠡᠢ ᠬᠤᠶᠠᠷ ᠵᠢᠯ ᠤᠨ ᠡᠮᠦᠨ᠎ᠡ ᠰᠠᠯᠴᠢᠬᠠᠭᠰᠠᠨ᠃ ᠪᠤᠰᠤᠳ ᠤᠨ ᠦᠢᠯᠡ ᠯᠠᠢ ᠶᠢ ᠬᠠᠵᠠᠭᠤ ᠶᠢᠨ ᠬᠥᠮᠥᠨ ᠬᠡᠷᠬᠢᠨ ᠣᠶᠢᠯᠠᠭᠠᠬᠤ ᠪᠤᠢ ᠳ᠋ᠠ᠃ ᠬᠥᠮᠥᠨ ᠤ ᠡᠵᠢ ᠪᠣᠯᠤᠭᠰᠠᠨ ᠬᠤᠶᠢᠨ᠎ᠠ ᠬᠡᠦᠬᠡᠳ ᠢᠶᠠᠨ ᠰᠠᠨᠠᠳᠠᠭ ᠯᠠ ᠪᠠᠶᠢᠯᠭᠦᠢ᠃ ᠬᠠᠶᠠ ᠮᠢᠨᠤ ᠠᠯᠪᠠᠨ ᠭᠡᠷ ᠲᠤ ᠢᠷᠡᠭᠡᠳ ᠬᠦᠦ ᠶᠢᠨ ᠢᠶᠠᠨ ᠨᠠᠭᠠᠳᠴᠤ ᠲᠣᠭᠯᠠᠬᠤ᠂ ᠭᠠᠷᠴᠤ ᠣᠷᠣᠬᠤ ᠶᠢ ᠴᠣᠩᠬᠤ ᠪᠠᠷ ᠬᠠᠷᠠᠨ ᠤᠬᠢᠯᠠᠵᠤ ᠤᠭᠢᠯᠠᠭᠠᠳ ᠶᠠᠪᠤᠳᠠᠭ ᠰᠠᠨ᠃︽ᠠᠭᠤᠯᠵᠠᠭᠠᠳ ᠶᠠᠪᠤᠪᠠᠯ ᠶᠠᠭᠠᠬᠢᠭᠰᠠᠨ ᠶᠤᠮ︖︾ ᠭᠡᠬᠦᠯᠡᠷ ︽ᠬᠤᠶᠠᠷ ᠤᠨ ᠬᠤᠭᠤᠷᠣᠨᠳᠤ ᠬᠡᠦᠬᠡᠳ ᠤᠨ ᠰᠠᠨᠠᠭ᠎ᠠ ᠶᠢ ᠬᠤᠪᠢᠶᠠᠬᠳᠠᠭᠤᠯᠤᠭᠠᠳ ᠶᠠᠭᠠᠬᠢᠬᠤ ᠪᠤᠢ︕︾ ᠭᠡᠨ᠎ᠡ᠃ ︽ᠲᠡᠶᠢᠮᠦ ᠯᠡ ᠶᠤᠮ ᠪᠠᠶᠢᠯᠭᠦᠢ︕︾ ᠭᠡᠵᠦ ᠪᠤᠳᠤᠭᠠᠳ ᠪᠢ ᠴᠦ ᠰᠠᠨᠠᠭᠠᠨ ᠳᠠᠭᠠᠨ ᠠᠪᠤᠭᠰᠠᠨ ᠦᠭᠡᠢ᠃ ᠬᠡᠵᠢᠶ᠎ᠡ ᠬᠤᠶᠢᠨ᠎ᠠ ᠨᠢ ︽ᠬᠦᠦ ᠨᠢ ᠡᠵᠢ ᠲᠠᠢ ᠪᠠᠨ ᠠᠭᠤᠯᠵᠠᠭᠰᠠᠨ ᠢ ᠰᠣᠨᠣᠰᠪᠠᠯ ᠬᠦᠦ ᠪᠠᠨ ᠪᠠᠷᠢᠵᠤ ᠵᠣᠳᠣᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ︿ᠡᠵᠢ ᠪᠠᠨ ᠰᠠᠨᠠᠵᠤ ᠪᠠᠶᠢᠨ᠎ᠠ﹀ ᠭᠡᠵᠦ ᠬᠡᠯᠡᠬᠦ ᠶᠢ ᠴᠦ ᠵᠥᠪᠰᠢᠶᠡᠷᠡᠳᠡᠭ ᠦᠭᠡᠢ ᠭᠡᠨ᠎ᠡ︾ ᠭᠡᠵᠦ ᠨᠤᠲᠤᠭ ᠤᠨ ᠬᠥᠮᠥᠰ ᠠᠴᠠ ᠰᠣᠨᠣᠰᠤᠭᠠᠳ᠂ ᠪᠢ ᠡᠵᠢ ᠲᠠᠢ ᠨᠢ ᠵᠥᠪᠳᠡᠯᠴᠡᠨ ᠡᠵᠢ ᠬᠦᠦ ᠬᠤᠶᠠᠷ ᠢ ᠳᠠᠯᠳᠠᠭᠤᠷ ᠠᠭᠤᠯᠵᠠᠭᠤᠯᠳᠠᠭ ᠪᠣᠯᠤᠭᠰᠠᠨ ᠶᠤᠮ᠃          ᠤᠯᠠᠨ ᠤ ᠤᠯᠠᠨ ᠳᠤ ᠶᠠᠮᠠᠷᠴᠤ ᠠᠭᠠᠰᠢ ᠠᠷᠠᠨᠰᠢᠨ ᠲᠠᠢ ᠬᠥᠮᠥᠨ ᠪᠠᠶᠢᠬᠤ ᠶᠤᠮ᠃ ᠰᠠᠨᠠᠭ᠎ᠠ ᠰᠡᠳᠬᠢᠯ ᠲᠠᠭᠠᠷᠠᠯᠴᠠᠬᠤ ᠦᠭᠡᠢ ᠰᠠᠯᠵᠤ ᠪᠤᠳᠠᠷᠠᠯ᠎ᠠ ᠴᠦ ᠭᠡᠰᠡᠨ ᠬᠡᠦᠬᠡᠳ ᠲᠤ ᠶᠠᠮᠠᠷ ᠪᠤᠷᠤᠭᠤ ᠪᠠᠶᠢᠬᠤ ᠪᠤᠢ᠃ ᠠᠰ ᠠᠰ ᠤᠨ ᠢᠶᠠᠨ ᠵᠠᠮ ᠢ ᠬᠥᠭᠡᠭᠡᠭᠰᠡᠨ ᠴᠦ ᠦᠯᠡᠳᠡᠵᠦ ᠬᠤᠴᠣᠷᠤᠭᠰᠠᠨ ᠦᠷ᠎ᠡ ᠬᠡᠦᠬᠡᠳ ᠲᠡᠭᠡᠨ ᠬᠠᠯᠠ ᠠᠮᠰᠠᠭᠤᠯᠤᠭᠰᠠᠨ ᠤ ᠬᠡᠷᠡᠭ ᠶᠠᠭᠤ ᠪᠢᠯᠡ᠃ ᠬᠦᠦ ᠪᠠᠨ ᠦᠵᠡᠬᠦ ᠪᠠᠷ ᠡᠵᠢ ᠶᠢ ᠨᠢ ᠬᠤᠷᠣᠰᠤᠭᠠᠳ ᠪᠠᠶᠢᠳᠠᠭ ᠶᠤᠮ ᠪᠣᠯ ᠨᠢᠭᠡᠮᠦᠰᠦᠨ ᠡᠵᠢ ᠳᠤᠨᠢ ᠥᠭᠴᠢᠬᠡᠬᠦ ᠶᠢ ᠬᠦᠷᠬᠦ ᠦᠭᠡᠢ᠃ ᠬᠡᠯᠡᠬᠦ ᠠᠴᠠ ᠬᠤᠶᠢᠲᠤ ᠠᠪᠤ ᠨᠢ ᠶᠠᠮᠠᠷ ᠰᠢᠤᠬᠠᠨ ᠠᠪᠤ ᠲᠠᠭᠠᠷᠠᠬᠰᠠᠨ ᠶᠤᠮ ᠪᠣᠯ ᠳ᠋ᠠ᠂ ᠬᠥᠭᠡᠷᠦᠬᠦᠢ︕          ᠬᠤᠶᠢᠲᠤ ᠠᠪᠤ ᠭᠡᠰᠡᠨ ᠠᠴᠠ ᠪᠢ ᠴᠢᠨᠢ ᠬᠤᠶᠢᠲᠤ ᠡᠵᠢ ᠲᠠᠢ ᠬᠥᠮᠥᠨ᠃ ᠬᠤᠷᠢ ᠴᠦ ᠭᠦᠷᠦᠭᠡ ᠦᠭᠡᠢ ᠬᠤᠶᠢᠲᠤ ᠡᠵᠢ ᠮᠢᠨᠢ᠂ ᠭᠤᠷᠪᠠ ᠶᠢᠨ ᠭᠤᠷᠪᠠᠨ ᠥᠨᠥᠴᠢᠨ ᠬᠡᠦᠬᠡᠳ ᠳᠠᠭᠠᠭᠤᠯᠤᠭᠰᠠᠨ ᠠᠪᠤ ᠲᠠᠢ ᠮᠢᠨᠢ ᠲᠣᠯᠣᠭᠠᠢ ᠬᠤᠯᠪᠣᠭᠰᠠᠨ ᠳ᠋ᠠ᠂ ᠬᠥᠭᠡᠷᠦᠬᠦᠢ︕          ᠬᠤᠶᠢᠲᠤ ᠡᠵᠢ ᠮᠢᠨᠢ᠂ ᠮᠠᠨ ᠤ ᠠᠬ᠎ᠠ ᠳᠡᠭᠦᠦ ᠬᠡᠳᠦᠭᠦᠯᠡ ᠳᠤ ᠲᠦᠷᠦᠭᠰᠡᠨ ᠡᠵᠢ ᠠᠴᠠ ᠴᠦ ᠬᠠᠶᠢᠷᠠᠲᠠᠢ ᠪᠠᠶᠢᠭᠰᠠᠨ ᠪᠣᠯᠬᠤᠷ ︽ᠬᠤᠶᠢᠲᠤ︾ ᠭᠡᠬᠦ ᠲᠣᠳᠣᠳᠬᠠᠯ ᠢ ᠬᠡᠷᠡᠭᠯᠡᠵᠦ ᠶᠡᠷᠦᠳᠡᠭᠡᠨ ᠥᠩᠭᠡᠷᠡᠭᠡ ᠦᠭᠡᠢ᠃ ᠶᠠᠳᠠᠭᠤ ᠲᠠᠷᠴᠢᠭ ᠲᠤᠬᠠᠢ ᠶᠢᠨ ᠣᠷᠴᠢᠨ ᠳᠤ ᠮᠠᠨ ᠤ ᠠᠬ᠎ᠠ ᠳᠡᠭᠦᠦ ᠬᠡᠳᠦᠭᠦᠯᠡ ᠰᠤᠷᠭᠠᠭᠤᠯᠢ ᠠᠴᠠ ᠪᠠᠨ ᠪᠦᠭᠡᠰᠦ ᠬᠢᠭᠤᠷᠰᠤ ᠶᠢ ᠦᠨ᠎ᠡ ᠲᠥᠯᠥᠪᠦᠷᠢ ᠦᠭᠡᠢ ᠶᠠᠭᠤᠮ᠎ᠠ ᠭᠡᠰᠡᠨ ᠰᠢᠭ ᠡᠭᠦᠷᠦᠭᠡᠳ ᠢᠷᠡᠳᠡᠭ ᠪᠠᠶᠢᠵᠤ ᠪᠢᠯᠡ᠃ ᠣᠷᠣᠵᠤ ᠢᠷᠡᠩᠭᠦᠲᠡ ᠡᠵᠢ ᠮᠢᠨᠢ ᠬᠠᠮᠤᠭ ᠬᠤᠪᠴᠠᠰᠤ ᠬᠤᠨᠠᠷ ᠢ ᠬᠠᠤ ᠲᠠᠳᠠᠨ ᠠᠪᠤᠭᠠᠳ ᠵᠤᠨ ᠤ ᠴᠠᠭ ᠲᠤ ᠬᠠᠯᠠᠭᠤᠨ ᠤᠰᠤᠨ ᠳᠤ ᠰᠢᠯᠵᠠᠯᠠᠵᠤ᠂ ᠡᠪᠦᠯ ᠤᠨ ᠬᠦᠢᠲᠡᠨ ᠳᠤ ᠭᠠᠳᠠᠭ᠎ᠠ ᠬᠥᠯᠳᠡᠭᠡᠨ ᠤᠰᠠᠳᠬᠠᠨ᠎ᠠ᠃ ᠬᠠᠭᠠᠷᠬᠠᠢ ᠴᠤᠭᠤᠷᠬᠠᠢ ᠶᠢ ᠨᠥᠬᠦᠵᠦ ᠴᠦᠢᠯᠳᠦᠨ᠂ ᠬᠤᠭᠤᠯᠠ ᠴᠠᠢ ᠪᠡᠯᠡᠳᠬᠡᠨ ᠶᠠᠭᠠᠷᠠᠳᠠᠭ ᠰᠠᠨ᠃ ᠠᠪᠤ ᠡᠵᠢ ᠶᠢᠨ ᠠᠯᠢ ᠠᠯᠢ ᠨᠢ ᠠᠵᠢᠯᠰᠠᠭ ᠤᠯᠤᠰ ᠤᠳ ᠪᠠᠶᠢᠭᠰᠠᠨ ᠪᠣᠯᠬᠤᠷ ᠮᠠᠨ ᠤ ᠠᠮᠢᠳᠤᠷᠠᠯ ᠲᠡᠳᠦᠢ ᠯᠡ ᠲᠠᠷᠳᠠᠭ ᠲᠠᠭᠠᠨ ᠲᠤᠯᠵᠤ ᠪᠠᠶᠢᠭ᠎ᠠ ᠦᠭᠡᠢ᠃ ᠰᠤᠷᠭᠠᠭᠤᠯᠢ ᠶᠢᠨ ᠬᠦᠷᠢᠶᠡᠨ ᠳᠤ ᠡᠳᠦᠢ ᠲᠡᠳᠦᠢ ᠬᠡᠦᠬᠡᠳ ᠤᠳ ᠰᠠᠯᠲᠠᠭ᠎ᠠ ᠨᠢ ᠳᠡᠯᠭᠡᠭᠰᠡᠨ ᠥᠮᠥᠳᠦ᠂ ᠴᠤᠭᠤᠷᠬᠠᠢ ᠱᠠᠬᠠᠢ ᠲᠠᠢ ᠭᠦᠶᠦᠯᠴᠡᠵᠦ ᠪᠠᠶᠢᠬᠤ ᠳᠤ᠂ ᠬᠠᠷᠢᠨ ᠮᠠᠨ ᠤ ᠠᠬ᠎ᠠ ᠳᠡᠭᠦᠦ ᠬᠡᠳᠦᠭᠦᠯᠡ ᠨᠥᠬᠦᠭᠡᠰᠦ ᠲᠠᠢ ᠪᠤᠯᠪᠠᠴᠤ ᠬᠠᠯᠠᠵᠤ ᠰᠣᠯᠢᠬᠤ ᠬᠤᠪᠴᠠᠰᠤ‌‍ᠲ᠋ᠠᠢ ᠭᠦᠶᠦᠯᠳᠦᠳᠡᠭ ᠪᠠᠶᠢᠯ᠎ᠠ᠃          ᠡᠵᠢ ᠮᠢᠨᠢ ᠭᠠᠷ ᠤᠷᠠᠨ᠂ ᠠᠪᠬᠠᠯᠵᠢ ᠰᠠᠶᠢᠲᠠᠢ ᠬᠥᠮᠥᠨ ᠪᠠᠶᠢᠭᠰᠠᠨ᠃ ᠬᠠᠭᠤᠴᠢᠷᠠᠭᠰᠠᠨ ᠬᠤᠳᠠᠯᠳᠤᠭ᠎ᠠ ᠱᠠᠬᠠᠢ ᠶᠢ ᠰᠠᠶᠢᠬᠠᠨ ᠬᠠᠭᠵᠠᠯᠠᠵᠤ ᠤᠬᠢᠶᠠᠭᠠᠳ ᠬᠠᠮᠠᠷ᠂ ᠵᠤᠯᠤᠭ ᠢᠶᠠᠷ ᠨᠢ ᠰᠠᠯᠭᠠᠨ ᠴᠠᠭᠠᠰᠤᠨ ᠳᠡᠭᠡᠷ᠎ᠡ ᠲᠠᠯᠪᠢᠵᠤ ᠬᠠᠷᠠᠨᠳᠠ ᠪᠠᠷ ᠬᠡᠪ ᠵᠠᠭᠪᠤᠷ ᠢ ᠨᠢ ᠵᠢᠷᠤᠵᠤ ᠠᠪᠤᠭᠠᠳ ᠲᠡᠭᠦᠨ ᠢᠶᠠᠷ ᠢᠶᠠᠨ ᠦᠯᠢᠭᠡᠷᠯᠡᠨ ᠮᠠᠨᠤᠰ ᠲᠤ ᠱᠠᠬᠠᠢ ᠣᠶᠣᠳᠠᠭ᠃ ᠶᠡᠭᠡ ᠪᠠᠭ᠎ᠠ ᠦᠭᠡᠢ ᠳᠤᠯᠠᠭᠠᠨ ᠲᠠᠭᠠᠯᠠᠮᠵᠢᠲᠠᠢ᠂ ᠪᠠᠷᠤᠭ ᠲᠠᠢ ᠤᠷᠠᠭᠳᠠᠳᠠᠭ ᠦᠭᠡᠢ᠂ ᠬᠤᠳᠠᠯᠳᠤᠭ᠎ᠠ ᠱᠠᠬᠠᠢ ᠠᠴᠠ ᠬᠤᠵᠢᠭᠳᠠᠬᠤ ᠦᠭᠡᠢ ᠣᠶᠣᠮᠠᠯ ᠱᠠᠬᠠᠢ ᠪᠠᠷ ᠲᠠᠪᠠᠷᠠᠭᠠᠨ᠎ᠠ᠃ ᠮᠢᠨᠤ ᠬᠠᠷ᠎ᠠ ᠱᠠᠬᠠᠢ ᠶᠢᠨ ᠬᠠᠮᠠᠷ ᠳᠡᠭᠡᠷ᠎ᠡ ᠶᠠᠭᠠᠨ ᠬᠤᠸᠠᠷ ᠬᠠᠳᠬᠤᠭᠠᠳ ᠤᠯᠠᠮ ᠴᠦ ᠪᠦᠷ ᠬᠥᠭᠡᠷᠦᠬᠦᠨ ᠪᠣᠯᠭᠠᠨ᠎ᠠ᠃ ᠲᠡᠭᠡᠭᠡᠳ ᠯᠡ ᠡᠬᠢᠨ ᠤ ᠬᠡᠳᠦᠨ ᠡᠳᠦᠷ ᠰᠢᠷᠣᠢ ᠲᠣᠭᠤᠰᠣ ᠨᠠᠭᠠᠯᠳᠤᠬᠤ ᠠᠴᠠ ᠬᠢᠴᠢᠶᠡᠨ ᠬᠥᠩᠭᠡᠨ ᠱᠦᠩᠭᠡᠨ ᠠᠯᠬᠤᠵᠤ ᠭᠢᠰᠬᠢᠨ᠎ᠡ᠃ ᠣᠷᠪᠣᠭ ᠪᠤᠳᠠ ᠶᠢ ᠲᠣᠭᠤᠷᠢᠵᠤ ᠭᠠᠷᠤᠨ᠎ᠠ᠃ ᠬᠡᠦᠬᠡᠳ ᠤᠨ ᠲᠡᠪᠴᠢᠶᠡᠷᠢ ᠬᠡᠳᠦᠶᠢᠬᠡᠨ ᠪᠠᠶᠢᠬᠤ ᠪᠤᠢ᠃ ᠨᠢᠭᠡ ᠯᠡ ᠮᠡᠳᠡᠬᠦ ᠳᠤ ᠬᠠᠷ᠎ᠠ᠂ ᠶᠠᠭᠠᠨ ᠨᠢ ᠢᠯᠭᠠᠷᠠᠭᠰᠠᠨ ᠥᠨᠥ ᠭᠤᠶᠤ ᠱᠠᠬᠠᠢ ᠴᠦ ᠪᠣᠷᠣ ᠰᠠᠭᠠᠷᠠᠯ ᠶᠠᠭᠤᠮ᠎ᠠ ᠪᠣᠯᠴᠢᠬᠠᠭᠰᠠᠨ ᠪᠠᠶᠢᠨ᠎ᠠ᠃          ᠠᠷᠪᠠᠨ ᠰᠠᠷ᠎ᠠ ᠶᠢᠨ ᠴᠢᠯᠦᠭᠡ ᠪᠠᠷ ᠰᠤᠷᠭᠠᠭᠤᠯᠢ ᠠᠴᠠ ᠪᠠᠨ ᠭᠦᠶᠦᠯᠴᠡᠨ ᠢᠷᠡᠬᠦ ᠳᠤ᠂ ᠡᠵᠢ ᠮᠢᠨᠢ ᠤᠳᠬᠤᠨ ᠳᠡᠭᠦᠦ ᠶᠢ ᠡᠭᠦᠷᠦᠭᠡᠳ ᠨᠠᠮᠤᠷ ᠤᠨ ᠰᠢᠷ᠎ᠠ ᠨᠠᠷᠠᠨ ᠳᠤ ᠬᠤᠨᠢ ᠪᠠᠨ ᠬᠠᠷᠢᠭᠤᠯᠤᠨ ᠶᠠᠪᠤᠵᠤ ᠪᠠᠶᠢᠭᠰᠠᠨ ᠳᠦᠷᠢ ᠵᠢᠷᠤᠭ ᠨᠢ ᠰᠠᠨᠠᠭᠠᠨ ᠠᠴᠠ ᠶᠡᠷᠦ ᠭᠠᠷᠳᠠᠭ ᠦᠭᠡᠢ᠃ ᠬᠥᠭᠡᠷᠦᠬᠦᠢ ᠡᠵᠢ ᠮᠢᠨᠢ ᠵᠤᠨ ᠤ ᠬᠠᠯᠠᠭᠤᠨ᠂ ᠬᠠᠪᠤᠷ ᠤᠨ ᠰᠢᠭᠤᠷᠭ᠎ᠠ᠂ ᠡᠪᠦᠯ ᠤᠨ ᠬᠠᠬᠢᠷ ᠬᠦᠢᠲᠡᠨ ᠢ ᠬᠠᠶᠢᠬᠤᠷᠤᠯ ᠦᠭᠡᠢ ᠬᠡᠦᠬᠡᠳ ᠢᠶᠠᠨ ᠡᠭᠦᠷᠦᠨ ᠮᠠᠯ ᠢᠶᠠᠨ ᠬᠠᠷᠢᠭᠤᠯᠵᠤ ᠶᠠᠳᠠᠷᠠᠵᠤ ᠵᠦᠳᠡᠷᠡᠭᠰᠡᠨ ᠴᠦ ᠮᠠᠨ ᠤ ᠠᠬ᠎ᠠ ᠳᠡᠭᠦᠦ ᠬᠡᠳᠦᠭᠦᠯᠡ ᠶᠢᠨ ᠠᠯᠢ ᠶᠢ ᠨᠢ ᠴᠦ ᠰᠤᠷᠭᠠᠭᠤᠯᠢ ᠠᠴᠠ ᠳᠤᠲᠠᠭᠤ ᠲᠤᠷᠭᠤᠨ ᠵᠣᠭᠰᠣᠭᠠᠭ᠎ᠠ ᠦᠭᠡᠢ᠃          ᠠᠷᠪᠠ ᠭᠦᠷᠦᠭᠰᠡᠨ ᠪᠢ ᠶᠠᠳᠠᠵᠤ ᠭᠤᠯᠢᠷ ᠵᠢᠭᠤᠷᠠᠴᠢᠬᠠᠵᠤ ᠴᠢᠳᠠᠳᠠᠭ ᠦᠭᠡᠢ᠂ ᠤᠷᠤᠭᠰᠢ ᠨᠢ ᠲᠠᠰᠤᠷᠠᠴᠢᠬᠠᠭᠰᠠᠨ ᠠᠮᠢᠳᠠᠨ ᠪᠠᠶᠢᠯ᠎ᠠ᠃ ᠭᠠᠯ ᠲᠣᠭᠤᠭᠠᠨ ᠤ ᠠᠵᠢᠯ ᠳᠤ ᠬᠠᠮ ᠲᠠᠮ ᠪᠤᠯᠬᠤ ᠶᠢ ᠪᠤᠳᠤᠳᠠᠭ ᠦᠭᠡᠢ ᠶᠠᠪᠤᠭᠰᠠᠨ ᠤ ᠮᠢᠨᠢ ᠭᠠᠢ᠃ ᠬᠡᠦᠬᠡᠳ ᠢᠶᠠᠨ ᠭᠡᠰᠡᠨ ᠡᠬᠡ ᠶᠢᠨ ᠬᠠᠶᠢᠷ᠎ᠠ ᠳᠤ ᠶᠠᠮᠠᠷ ᠪᠤᠷᠤᠭᠤ ᠪᠠᠶᠢᠬᠤ ᠪᠤᠢ᠃ ᠭᠤᠣᠯ ᠨᠢ ᠵᠢᠷᠭᠠᠯ ᠳᠤ ᠲᠠᠰᠢᠭᠤᠷᠠᠬᠰᠠᠨ ᠮᠢᠨᠤ ᠯᠠ ᠬᠤᠬᠢ ᠶᠤᠮ ᠳ᠋ᠠ᠃          ᠤᠳᠬᠤᠨ ᠳᠡᠭᠦᠦ ᠮᠢᠨᠢ ᠡᠵᠢ ᠶᠢᠨ ᠨᠢᠭᠤᠷᠤᠨ ᠠᠴᠠ ᠪᠦᠷᠢᠨ ᠪᠠᠭᠤᠵᠤ ᠵᠠᠪᠳᠤᠭ᠎ᠠ ᠦᠭᠡᠢ ᠨᠢᠯᠬ᠎ᠠ ᠪᠠᠷ ᠢᠶᠠᠨ ᠰᠢᠬᠠᠮ ᠡᠵᠢ ᠠᠴᠠ ᠪᠠᠨ ᠥᠨᠥᠴᠢᠷᠡᠭᠰᠡᠨ ᠳ᠋ᠠ᠂ ᠵᠠᠶᠢᠯᠠᠭᠤᠯ︕ ᠡᠵᠢ ᠠᠴᠠ ᠬᠤᠶᠢᠰᠢ ᠮᠠᠨ ᠤ ᠠᠬ᠎ᠠ ᠳᠡᠭᠦᠦ ᠭᠡᠳᠦ ᠤᠳᠬᠤᠨ ᠳᠡᠭᠦᠦ ᠳᠡᠭᠡᠨ ᠬᠠᠶᠢᠷ᠎ᠠ ᠬᠠᠯᠠᠮᠵᠢ ᠪᠠᠨ ᠢᠯᠡᠭᠦᠬᠡᠨ ᠲᠠᠯᠪᠢᠳᠠᠭ ᠪᠠᠶᠢᠯ᠎ᠠ᠃ ᠲᠥᠯ ᠮᠠᠯ ᠲᠤᠰᠬᠤ᠂ ᠬᠤᠨᠢ ᠬᠠᠷᠢᠭᠤᠯᠬᠤ᠂ ᠬᠤᠷᠤᠭ᠎ᠠ ᠬᠤᠳᠠ ᠨᠤᠷᠠᠯᠠᠬᠤ᠂ ᠬᠤᠳᠳᠤᠭ ᠤᠨ ᠮᠥᠰᠥ ᠴᠤᠭᠤᠯᠬᠤ ᠁ ᠮᠡᠲᠦ ᠶᠢᠨ ᠡᠳᠦᠷ ᠲᠤᠳᠤᠮ ᠤᠨ ᠰᠤᠨᠵᠢᠷᠠᠭᠰᠠᠨ ᠠᠵᠢᠯ ᠠᠴᠠ ᠭᠠᠳᠠᠨ᠎ᠠ ᠬᠤᠩᠬᠤᠷᠯᠠᠵᠤ ᠬᠤᠷᠠᠭᠰᠠᠨ ᠴᠠᠰᠤ ᠮᠥᠰᠥ ᠶᠢ ᠬᠤᠯᠠᠳᠠᠭᠤᠯᠬᠤ᠂ ᠣᠪᠣᠭᠠᠷᠠᠨ ᠵᠤᠵᠠᠭᠠᠷᠠᠭᠰᠠᠨ ᠬᠥᠷᠵᠡᠩ ᠬᠤᠷᠤᠭ᠎ᠠ ᠭᠢᠰᠬᠢᠬᠦ ᠁ ᠭᠡᠳ ᠬᠦᠨᠳᠦ ᠬᠦᠴᠢᠷ ᠬᠥᠳᠡᠭᠡ ᠶᠢᠨ ᠬᠠᠷ᠎ᠠ ᠪᠣᠷᠣ ᠠᠵᠢᠯ ᠳᠤ ᠠᠪᠤ ᠶᠢᠨ ᠳᠠᠭᠠᠭᠤᠯᠭ᠎ᠠ ᠪᠠᠷ ᠠᠬ᠎ᠠ ᠳᠡᠭᠦᠦ ᠬᠡᠳᠦᠭᠦᠯᠡ ᠪᠠᠨ ᠭᠦᠷᠡᠶᠢᠳᠡᠭ ᠪᠠᠶᠢᠭᠰᠠᠨ ᠴᠦ ᠠᠯᠢ ᠪᠤᠯᠬᠤ ᠪᠠᠷ ᠤᠳᠬᠤᠨ ᠳᠡᠭᠦᠦ ᠪᠠᠨ ᠨᠢᠯᠬ᠎ᠠ ᠶᠤᠮ ᠭᠡᠳ ᠬᠢᠷᠢ ᠪᠠᠷᠤᠭ ᠤᠨ ᠠᠵᠢᠯ ᠳᠤ ᠣᠷᠣᠯᠴᠠᠭᠤᠯᠳᠠᠭ ᠦᠭᠡᠢ᠃ ᠲᠡᠭᠡᠭᠰᠡᠭᠡᠷ ᠪᠠᠶᠢᠵᠤ ᠪᠦᠷ ᠵᠠᠩᠰᠢᠴᠢᠬᠠᠭᠠᠳ ᠮᠠᠯ ᠤᠨ ᠠᠷᠤ ᠠᠴᠠ ᠶᠠᠪᠤᠬᠤ ᠮᠠᠰᠢ ᠳᠤᠷ᠎ᠠ ᠦᠭᠡᠢ ᠬᠡᠦᠬᠡᠳ ᠪᠣᠯᠵᠤ ᠬᠥᠮᠥᠵᠢᠭᠳᠡᠭᠰᠡᠨ ᠶᠤᠮ᠃          ᠨᠢᠷᠤᠭᠤ ᠴᠢᠩᠭ᠎ᠠ᠂ ᠭᠦᠳᠡᠯᠮᠦᠷᠢᠴᠢ ᠠᠪᠤ ᠶᠢᠨ ᠮᠢᠨᠢ ᠠᠷᠤ ᠳᠤ᠂ ᠮᠠᠨ ᠤ ᠭᠡᠷ ᠪᠦᠯᠢ ᠶᠢᠨ ᠬᠢᠨ ᠢ ᠲᠠᠶᠢᠴᠢᠯᠠᠨ ᠵᠠᠬᠢᠷᠳᠠᠭ ᠡᠮᠡᠭᠡ ᠡᠵᠢ ᠪᠠᠶᠢᠯ᠎ᠠ᠃ ᠲᠡᠮᠡᠭᠡ ᠮᠠᠯ ᠴᠤᠭᠯᠠᠭᠤᠯᠬᠤ᠂ ᠬᠠᠮᠲᠤ ᠶᠢᠨ ᠭᠦᠳᠡᠯᠮᠦᠷᠢ ᠳᠤ ᠣᠷᠤᠯᠴᠠᠬᠤ ᠁ ᠭᠡᠳ ᠡᠷ᠎ᠡ ᠪᠦᠰᠡᠲᠡᠢ ᠬᠥᠮᠥᠨ ᠳᠤ ᠭᠠᠳᠠᠭᠰᠢ ᠭᠠᠷᠬᠤ ᠶᠠᠪᠤᠳᠠᠯ ᠮᠤᠩᠳᠠᠬᠤ ᠦᠭᠡᠢ᠃ ᠲᠡᠭᠡᠭᠡᠳ ᠯᠡ ᠨᠠᠰᠤᠨ ᠥᠨᠳᠥᠷ ᠪᠣᠯᠤᠭᠰᠠᠨ ᠡᠮᠡᠭᠡ ᠮᠢᠨᠢ ᠬᠠᠷᠢᠭᠤᠯᠤᠭᠰᠠᠨ ᠮᠠᠯ ᠢᠶᠠᠨ ᠬᠠᠮᠲᠤ ᠳᠤ ᠲᠤᠰᠢᠶᠠᠨ᠂ ᠲᠤᠯᠭᠠᠨ ᠤ ᠵᠡᠭᠦᠨ ᠵᠠᠬ᠎ᠠ ᠡᠵᠡᠭᠦᠶᠢᠷᠡᠭᠰᠡᠨ ᠮᠠᠨ ᠤ ᠳᠤ ᠢᠷᠡᠵᠦ᠂ ᠡᠵᠢ ᠶᠢᠨ ᠣᠷᠣᠨ ᠳᠤ ᠡᠵᠢ ᠪᠣᠯᠣᠨ᠂ ᠬᠥᠯ ᠨᠢ ᠬᠦᠷᠬᠦ ᠦᠭᠡᠢ ᠭᠠᠵᠠᠷ ᠲᠤ ᠠᠮᠠ ᠨᠢ ᠬᠦᠷᠴᠦ᠂ ᠪᠢᠳᠡᠨ ᠢ ᠵᠢᠭᠠᠵᠤ ᠵᠠᠬᠢᠷᠤᠨ ᠵᠥᠪ ᠰᠠᠶᠢᠬᠠᠨ ᠬᠥᠮᠥᠵᠢᠭᠦᠯᠦᠭᠰᠡᠨ ᠳ᠋ᠠ᠃          ᠠᠪᠤ ᠶᠢᠨ ᠤᠶᠢᠭ᠎ᠠ ᠦᠭᠡᠢ ᠴᠢᠷᠮᠠᠶᠢᠯᠭ᠎ᠠ᠂ ᠡᠮᠡᠭᠡ ᠶᠢᠨ ᠴᠢᠩᠭ᠎ᠠ ᠰᠤᠷᠭᠠᠯ ᠢᠶᠠᠷ ᠮᠠᠨ ᠤ ᠠᠬ᠎ᠠ ᠳᠡᠭᠦᠦ ᠭᠡᠳᠦ ᠪᠠᠶᠠᠷᠯᠠᠬᠤ ᠳᠠᠭᠠᠨ ᠪᠠᠶᠠᠷᠯᠠᠨ᠂ ᠵᠣᠪᠠᠭᠤ ᠳᠠᠭᠠᠨ ᠵᠣᠪᠠᠵᠤ ᠬᠥᠮᠥᠨ ᠤ ᠠᠮᠢᠳᠤᠷᠠᠯ ᠤᠨ ᠬᠦᠨᠳᠦ ᠬᠡᠴᠡᠭᠦᠦ ᠶᠢ ᠵᠠᠬ᠎ᠠ ᠵᠤᠬ᠎ᠠ ᠠᠴᠠ ᠨᠢ ᠣᠶᠢᠯᠠᠭᠠᠨ ᠡᠷ᠎ᠡ ᠶᠢᠨ ᠴᠡᠭᠡᠯ ᠳᠤ ᠬᠦᠷᠴᠦ᠂ ᠠᠶᠢᠯ ᠡᠷᠦᠭᠡ ᠪᠣᠰᠬᠠᠨ᠂ ᠠᠰ ᠠᠰ ᠤᠨ ᠢᠶᠠᠨ ᠵᠠᠮ ᠢᠶᠠᠷ ᠠᠮᠢᠳᠤᠷᠠᠯ ᠤᠨ ᠵᠡᠮ ᠢᠶᠠᠨ ᠡᠯᠭᠦᠭᠰᠡᠨ ᠴᠦ ᠬᠠᠶᠠ ᠬᠤᠷᠠᠨ ᠴᠤᠭᠯᠠᠵᠤ᠂ ᠪᠠᠭ᠎ᠠ ᠶᠢᠨ ᠭᠦᠭ ᠱᠤᠮᠲᠠᠢ ᠤᠴᠠᠷᠠᠯ ᠢᠶᠠᠨ ᠳᠤᠷᠠᠰᠤᠨ ᠶᠠᠷᠢᠵᠤ ᠪᠠᠶᠠᠰᠤᠯᠴᠠᠳᠠᠭ ᠰᠠᠨ᠃          ᠶᠠᠮᠠᠷ ᠰᠠᠶᠢᠨ ᠳᠠᠭᠠᠨ ᠮᠠᠨ ᠤ ᠠᠬ᠎ᠠ ᠳᠡᠭᠦᠦ ᠭᠡᠳᠦ ᠦᠷ᠎ᠡ ᠬᠡᠦᠬᠡᠳ᠂ ᠠᠴᠢ ᠵᠢᠭᠡ ᠨᠠᠷ ᠢᠶᠠᠨ ᠳᠠᠭᠠᠭᠤᠯᠤᠨ ᠤᠳᠬᠤᠨ ᠳᠡᠭᠦᠦ ᠪᠠᠭᠠᠲᠤᠷ ᠤᠨ ᠳᠤ ᠴᠤᠭᠯᠠᠨ ᠨᠠᠷᠭᠢᠯᠳᠤᠪᠠ᠃          ᠣᠳᠬᠠᠨ ᠳᠡᠭᠦᠦ ᠮᠢᠨᠢ᠄ ︽ᠪᠢ ᠮᠠᠯ ᠳᠤ ᠳᠤᠷ᠎ᠠ ᠦᠭᠡᠢ ᠬᠠᠴᠢᠨ ᠬᠡᠦᠬᠡᠳ ᠪᠠᠶᠢᠭᠰᠠᠨ ᠶᠤᠮ᠃ ᠡᠮᠡᠭᠡ ᠡᠵᠢ᠄ ︿ᠵᠡ᠂ ᠪᠠᠭᠠᠲᠤᠷ ᠴᠠᠢ ᠤᠮᠳᠠ ᠤᠤᠭᠤ︕﹀ ᠭᠡᠬᠦ ᠲᠠᠢ ᠵᠡᠷᠭᠡ ᠯᠡ ᠨᠢᠳᠦᠨ ᠳᠤ ᠨᠢᠯᠪᠤᠰᠤ ᠬᠤᠷᠠᠨ᠂ ᠬᠥᠯ ᠬᠦᠨᠳᠦᠷᠡᠭᠡᠳ ᠶᠠᠪᠤᠴᠢᠬᠠᠳᠠᠭ᠃ ᠲᠡᠷᠡ ᠴᠢᠨᠢ ᠦᠳᠡ ᠶᠢᠨ ᠬᠤᠶᠢᠨ᠎ᠠ ᠶᠢᠨ ᠮᠠᠯ ᠰᠢᠤ ᠳ᠋ᠠ᠂ ᠬᠡᠳᠦᠶᠢᠬᠡᠨ ᠯᠡ ᠬᠤᠯᠠ ᠶᠠᠪᠤᠬᠤ ᠪᠤᠢ︕ ᠪᠢ ᠶᠡᠷᠦ ᠨᠢ ᠶᠡᠭᠡ ᠵᠠᠯᠬᠠᠭᠤ ᠬᠡᠦᠬᠡᠳ ᠪᠠᠶᠢᠭᠰᠠᠨ ᠯᠠ ᠳ᠋ᠠ︕ ᠠᠬ᠎ᠠ ᠡᠭᠡᠴᠢ ᠨᠠᠷ ᠬᠤᠲᠠᠨ ᠳᠤ ᠮᠠᠯ ᠬᠤᠢ ᠲᠡᠵᠢᠭᠡᠭᠡᠳ ᠶᠠᠭᠠᠷᠠᠵᠤ ᠪᠠᠶᠢᠬᠤ ᠳᠤ᠂ ᠪᠢ ᠳᠤᠯᠠᠭᠠᠬᠠᠨ ᠭᠡᠷ ᠲᠡᠭᠡᠨ ᠮᠤᠤᠷ ᠲᠠᠢ ᠪᠠᠨ ᠲᠣᠭᠯᠠᠨ ᠬᠤᠴᠣᠷᠤᠨ᠎ᠠ᠃ ᠡᠮᠡᠭᠡ᠄ ︿ᠭᠠᠷ︕ ᠭᠠᠳᠠᠭ᠎ᠠ ᠭᠠᠷᠴᠤ᠂ ᠴᠠᠭᠠᠲᠤ ᠠᠬ᠎ᠠ ᠡᠭᠡᠴᠢ ᠪᠠᠨ ᠬᠠᠪᠰᠤᠷᠴᠤ ᠮᠠᠯ ᠬᠤᠢ ᠲᠡᠵᠢᠭᠡᠯᠴᠡ︕ ᠮᠤᠤᠷ ᠰᠢᠭ᠋ ᠬᠠᠯᠠᠭᠤᠨ ᠬᠠᠨᠵᠤᠨ ᠳᠡᠭᠡᠷ᠎ᠡ ᠴᠠᠭᠠᠷᠢᠭᠯᠠᠵᠤ ᠬᠡᠪᠲᠡᠭᠡᠳ᠃ ᠭᠦᠳᠡᠯᠮᠦᠷᠢ ᠰᠤᠷᠪᠠᠯ ᠥᠪᠡᠷ ᠲᠤ ᠴᠢᠨᠢ ᠯᠡ ᠲᠤᠰᠠᠲᠠᠢ︕ ᠪᠢ ᠶᠠᠮᠠᠷ ᠠᠪᠤᠭᠠᠳ ᠦᠬᠦᠨ᠎ᠡ ᠤᠤ⁈﹀ ᠭᠡᠵᠦ ᠵᠠᠩᠨᠠᠨ᠎ᠠ᠃ ᠲᠡᠭᠡᠭᠡᠳ ᠠᠷᠭ᠎ᠠ ᠪᠤᠰᠤ ᠮᠠᠯᠠᠭᠠᠢ ᠪᠦᠴᠡᠯᠡᠨ ᠳᠠᠬᠤ ᠨᠥᠮᠥᠷᠦᠭᠡᠳ ᠬᠤᠳᠠ ᠤᠷᠤᠭᠤ ᠣᠴᠢᠨ᠎ᠠ᠃ ᠲᠡᠭᠡᠲᠡᠯ᠎ᠡ ᠬᠡᠨ ᠨᠢᠭᠡ ᠨᠢ ︿ᠬᠠᠷ᠎ᠠ ᠬᠦᠢᠲᠡᠨ ᠳᠤ ᠶᠠᠭᠤ ᠬᠢᠵᠦ ᠢᠷᠡᠭᠰᠡᠨ ᠶᠤᠮ᠃ ᠬᠠᠷᠢ᠂ ᠴᠠᠭᠠᠰᠢ ᠪᠠᠨ ᠁﹀ ᠭᠡᠨ᠎ᠡ᠃ ᠶᠠᠭ ᠯᠠ ᠡᠨᠡ ᠦᠭᠡ ᠶᠢ ᠨᠢ ᠬᠦᠯᠢᠶᠡᠵᠦ ᠪᠠᠶᠢᠭᠰᠠᠨ ᠶᠤᠮ ᠰᠢᠭ᠋ ᠪᠤᠴᠠᠭᠠᠳ ᠭᠤᠰ︕︾ ᠭᠡᠵᠦ ᠬᠡᠯᠡᠨ ᠨᠢᠭᠡ ᠭᠡᠷ ᠬᠥᠮᠥᠰ ᠢ ᠡᠯᠢᠭᠡ ᠶᠢ ᠨᠢ ᠬᠥᠰᠢᠲᠡᠯ᠎ᠡ ᠢᠨᠢᠶᠡᠯᠭᠡᠪᠡ᠃          ᠠᠬ᠎ᠠ ᠡᠭᠡᠴᠢ ᠨᠠᠷ ᠤᠨ ᠢᠶᠠᠨ ᠬᠠᠶᠢᠷ᠎ᠠ ᠬᠠᠯᠠᠮᠵᠢ᠂ ᠠᠴᠢ ᠭᠠᠪᠢᠶ᠎ᠠ ᠶᠢ ᠢᠯᠡᠷᠡᠭᠦᠯᠬᠦ ᠭᠡᠵᠦ ᠥᠪᠡᠷ ᠤᠨ ᠢᠶᠠᠨ ᠠᠯᠳᠠᠭ᠎ᠠ ᠣᠰᠣᠯ ᠢ ᠢᠨᠢᠶᠡᠳᠦᠮ ᠤᠨ ᠵᠦᠴᠦᠭᠡ ᠰᠢᠭ ᠶᠠᠭᠤᠮ᠎ᠠ ᠪᠣᠯᠭᠠᠨ ᠶᠠᠷᠢᠵᠤ ᠪᠠᠶᠢᠭ᠎ᠠ ᠶᠢ ᠨᠢ ᠭᠡᠶᠢᠳᠡᠯ᠎ᠡ ᠮᠡᠳᠡᠭᠰᠡᠨ ᠪᠢ ᠳᠣᠲᠣᠷ᠎ᠠ ᠪᠠᠨ᠄ ︽ᠠᠴᠢ ᠵᠢᠭᠡ᠂ ᠣᠮᠪᠣᠯᠣ ᠳᠣᠮᠪᠣᠯᠤ ᠶᠢᠨ ᠢᠶᠠᠨ ᠬᠠᠵᠠᠭᠤ ᠳᠤ ᠥᠪᠡᠷ ᠤᠨ ᠢᠶᠠᠨ ︿ᠮᠠᠭᠤ ᠮᠠᠭᠤᠬᠠᠢ﹀ ᠶᠢ ᠵᠠᠷᠯᠠᠵᠤ ᠪᠠᠶᠢᠳᠠᠭ ᠨᠢ ᠴᠦ ᠶᠠᠭᠤ ᠪᠤᠢ ᠳ᠋ᠠ︕︾ ᠭᠡᠵᠦ ᠥᠬᠦᠭᠡᠷᠳᠡᠨ ᠪᠤᠳᠤᠭᠠᠳ ᠦᠨᠦᠰᠦᠭᠡᠳ ᠠᠪᠤᠮᠠᠷ ᠰᠠᠨᠠᠭᠳᠠᠪᠠ᠃ ᠦᠨᠡᠨ ᠳᠡᠭᠡᠨ ᠡᠵᠢ ᠶᠢᠨ ᠬᠢᠨᠢ ᠬᠢᠭᠰᠡᠨ ᠪᠤᠶᠠᠨ ᠯᠠ ᠬᠦᠦ ᠶᠢ ᠨᠢ ᠢᠪᠡᠭᠡᠭᠰᠡᠨ ᠬᠡᠷᠡᠭ᠃          ᠡᠳᠡᠭᠡᠷ ᠪᠦᠭᠦᠨ ᠢ ᠡᠷᠭᠢᠴᠡᠭᠦᠯᠦᠨ ᠪᠤᠳᠤᠬᠤ ᠪᠠᠷ ᠡᠵᠢ ᠲᠠᠢ ᠪᠠᠶᠢᠬᠤ ᠶᠢᠨ ᠠᠵᠠ ᠲᠠᠢ ᠠᠮᠢᠳᠤᠷᠠᠯ ᠪᠢᠳᠡᠨ ᠳᠤ ᠡᠭᠦᠯᠡᠨ ᠴᠢᠯᠦᠭᠡᠨ ᠤ ᠨᠠᠷᠠ ᠰᠢᠭ᠋ ᠯᠠ ᠥᠩᠭᠡᠷᠡᠭᠰᠡᠨ ᠳ᠋ᠠ᠃ ︽ᠬᠥᠮᠥᠨ ᠤ ᠰᠦᠨᠡᠰᠦ ᠦᠷ᠎ᠡ ᠬᠤᠶᠢᠴᠢᠰ ᠲᠠᠭᠠᠨ ᠪᠤᠴᠠᠵᠤ ᠬᠥᠮᠥᠨ ᠤ ᠲᠦᠷᠦᠯ ᠣᠯᠳᠠᠭ︾ ᠭᠡᠬᠦ ᠬᠠᠭᠤᠴᠢ ᠶᠠᠷᠢᠶ᠎ᠠ ᠪᠠᠶᠢᠳᠠᠭ᠃ ᠬᠤᠶᠠᠷ ᠤᠨ ᠬᠤᠶᠠᠷ ᠡᠵᠢ ᠮᠢᠨᠢ᠂ ᠮᠠᠨ ᠤ ᠠᠬ᠎ᠠ ᠳᠡᠭᠦᠦ ᠬᠡᠳᠦᠭᠦᠯᠡ ᠶᠢᠨ ᠠᠯᠢ ᠨᠢᠭᠡᠨ ᠤ ᠬᠢᠨᠢ ᠦᠷ᠎ᠡ ᠰᠠᠳᠤ ᠪᠣᠯᠵᠤ ᠬᠥᠮᠥᠨ ᠤ ᠲᠦᠷᠦᠯ ᠣᠯᠬᠤ ᠪᠣᠯᠣᠭᠠᠰᠠᠢ︕ ᠭᠡᠵᠦ ᠵᠠᠯᠪᠠᠷᠢᠭᠰᠠᠭᠠᠷ᠃
ᠢᠷᠡᠯᠲᠡ᠄ ᠬᠦᠯᠦᠨ ᠪᠦᠢᠷ ᠬᠤᠲᠠ ᠶᠢᠨ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠤᠨ