| ᠮᠣᠩᠭᠤᠯ ᠦᠨᠳᠦᠰᠦᠲᠡᠨ ᠮᠢᠨᠢ ᠡᠷᠲᠡ ᠳᠡᠭᠡᠳᠦ ᠶᠢᠨ ᠦᠶᠡ ᠠᠴᠠ ᠪᠠᠨ ᠠᠪᠤᠭᠠᠳ ᠮᠠᠯ ᠮᠠᠯᠵᠢᠵᠤ᠂ ᠮᠠᠯ ᠢᠶᠠᠨ ᠥᠰᠬᠡᠨ᠂ ᠮᠠᠯ ᠢᠶᠠᠨ ᠠᠷᠠᠯᠵᠢᠵᠤ | ᠬᠤᠳᠠᠯᠳᠤᠬᠤ ᠪᠤᠶᠤ ᠮᠠᠯ ᠤᠨ ᠠᠰᠢᠭ ᠰᠢᠮᠡ᠂ ᠠᠷᠠᠰᠤ ᠨᠣᠣᠰᠣ ᠪᠠᠨ ᠡᠳ᠋ᠰᠢᠯᠡᠬᠦᠯᠦᠨ ᠪᠤᠯᠪᠠᠰᠤᠷᠠᠭᠤᠯᠵᠤ᠂ ᠢᠳᠡᠵᠦ ᠡᠮᠦᠰᠬᠦ ᠪᠠ ᠮᠠᠯ ᠤᠨ ᠮᠢᠬᠠ ᠰᠦ᠂ ᠴᠠᠭᠠᠨ | ᠢᠳᠡᠬᠡᠨ ᠢᠶᠠᠷ ᠭᠤᠣᠯ ᠬᠤᠭᠤᠯᠠ ᠤᠮᠳᠠ ᠪᠠᠨ ᠪᠤᠯᠭᠠᠵᠤ᠂ ᠠᠵᠤ ᠠᠮᠢᠳᠤᠷᠠᠵᠤ ᠢᠷᠡᠭᠰᠡᠨ ᠲᠡᠦᠬᠡ ᠲᠠᠢ ᠪᠢᠯᠡ᠃ ᠲᠠᠳᠠ ᠵᠢᠯ ᠤᠨ ᠲᠦᠷᠪᠡᠨ ᠤᠯᠠᠷᠢᠯ ᠢᠶᠠᠷ ᠨᠡᠭᠦᠵᠦ | ᠪᠠᠭᠤᠨ ᠣᠲᠣᠷᠯᠠᠵᠤ ᠮᠠᠯᠵᠢᠬᠤ ᠳᠠᠭᠠᠨ ᠨᠤᠲᠤᠭ ᠰᠢᠷᠣᠢ᠂ ᠤᠰᠤ ᠪᠡᠯᠴᠢᠭᠡᠷ ᠢᠶᠠᠨ ᠲᠣᠬᠢᠷᠠᠮᠵᠢᠲᠠᠢ ᠰᠣᠩᠭᠤᠨ᠂ ᠨᠢᠮᠪᠠᠢ ᠲᠣᠬᠢᠷᠠᠭᠤᠯᠳᠠᠭ᠄ | ᠨᠢᠭᠡ᠂ ᠵᠤᠰᠠᠯᠠᠩ ᠤᠨ ᠨᠤᠲᠤᠭ ᠢ ᠰᠣᠩᠭᠤᠬᠤ ᠳᠠᠭᠠᠨ ᠭᠤᠣᠯ ᠲᠠᠢ ᠨᠠᠭᠤᠷ ᠲᠠᠢ᠂ ᠲᠠᠯᠠ ᠲᠠᠢ ᠪᠡᠯᠴᠢᠭᠡᠷ ᠲᠠᠢ ᠰᠠᠷᠠᠭᠤᠯ ᠠᠭᠤᠳᠠᠮ ᠲᠣᠬᠢᠯᠢᠭ ᠭᠠᠵᠠᠷ ᠢ | ᠰᠣᠩᠭᠤᠨᠠ᠃ ᠵᠤᠨ ᠤ ᠤᠯᠠᠷᠢᠯ ᠪᠣᠯ ᠲᠦᠷᠦᠯ ᠪᠦᠷᠢ ᠶᠢᠨ ᠮᠠᠯ ᠢ ᠤᠰᠤᠨ ᠲᠠᠷᠭᠤ ᠠᠪᠤᠭᠤᠯᠬᠤ ᠴᠠᠭ ᠬᠤᠭᠤᠴᠠᠭᠠ ᠪᠣᠯᠬᠤᠷ ᠵᠠᠪᠠᠯ ᠤᠰᠤ ᠶᠢ ᠭᠦᠢᠴᠡᠳ | ᠬᠠᠩᠭᠠᠬᠤ ᠬᠡᠷᠡᠭᠲᠡᠢ᠃ ᠵᠤᠨ ᠤ ᠤᠯᠠᠷᠢᠯ ᠳᠤ ᠤᠰᠤᠨ ᠲᠠᠷᠭᠤ ᠮᠠᠭᠤ ᠠᠪᠤᠭᠰᠠᠨ ᠮᠠᠯ ᠨᠠᠮᠤᠷ ᠤᠨ ᠤᠯᠠᠷᠢᠯ ᠳᠤ ᠲᠤᠰᠤᠨ ᠲᠠᠷᠭᠤ ᠬᠡᠳᠦᠢ ᠰᠠᠶᠢᠨ ᠠᠪᠤᠯᠠ ᠭᠡᠳ | ᠡᠪᠦᠯ ᠬᠠᠪᠤᠷ ᠤᠨ ᠬᠦᠢᠲᠡᠨ ᠰᠢᠭᠤᠷᠭᠠᠨ ᠳᠤ ᠲᠡᠰᠪᠦᠷᠢ ᠦᠭᠡᠢ ᠪᠠᠶᠢᠵᠤ᠂ ᠬᠥᠯᠳᠡᠭᠦᠦ ᠠᠯᠢᠮᠠ ᠶᠢ ᠤᠰᠤᠨ ᠳᠤ ᠬᠢᠭᠰᠡᠨ ᠲᠠᠢ ᠠᠳᠠᠯᠢ᠂ ᠣᠬᠤᠷᠬᠠᠨ ᠴᠠᠭ ᠤᠨ | ᠳᠣᠲᠣᠷᠠ ᠮᠢᠬᠠ ᠲᠠᠷᠭᠤ ᠨᠢ ᠪᠠᠭᠤᠷᠠᠵᠤ᠂ ᠬᠡᠬᠡᠯ ᠭᠡᠳᠡᠰᠦ ᠨᠢ ᠬᠠᠮᠰᠢᠢᠭᠠᠳ ᠶᠠᠪᠤᠴᠢᠬᠠᠨᠠ᠃ ᠵᠤᠨ ᠤ ᠤᠯᠠᠷᠢᠯ ᠳᠤ ᠢᠯᠠᠭᠠ ᠪᠠᠲᠠᠭᠠᠨᠠ᠂ ᠬᠡᠳᠡᠭᠡᠨᠡ ᠰᠢᠮᠠᠭᠤᠯ ᠵᠡᠷᠭᠡ | ᠬᠤᠷᠣᠬᠠᠢ ᠰᠢᠪᠠᠵᠢ ᠠᠷᠪᠢᠨ ᠪᠣᠯᠬᠤᠷ ᠡᠷᠬᠡᠪᠰᠢ ᠲᠡᠭᠰᠢᠯᠢᠭ ᠨᠤᠲᠤᠭ ᠢ ᠰᠣᠩᠭᠤᠵᠤ ᠭᠡᠷ ᠢᠶᠠᠨ ᠪᠠᠷᠢᠵᠤ ᠮᠠᠯ ᠢᠶᠠᠨ ᠬᠤᠲᠠᠯᠠᠨᠠ᠃ ᠮᠠᠯ ᠢᠶᠠᠨ ᠬᠠᠷᠢᠭᠤᠯᠬᠤ ᠳᠠᠭᠠᠨ | ᠠᠭᠤᠳᠠᠮ ᠰᠠᠷᠠᠭᠤᠯ ᠲᠠᠯᠠ ᠭᠠᠵᠠᠷ ᠢ ᠰᠣᠩᠭᠤᠨᠠ᠃ ᠵᠤᠨ ᠤ ᠴᠠᠭ ᠤᠨ ᠪᠤᠭ ᠮᠠᠯ ᠢ ᠥᠷᠯᠥᠭᠡ ᠡᠷᠲᠡ ᠪᠡᠯᠴᠢᠭᠡᠷ ᠲᠤ ᠭᠠᠷᠭᠠᠬᠤ ᠳᠠᠭᠠᠨ ᠡᠷᠬᠡᠪᠰᠢ ᠨᠠᠷᠠ ᠬᠠᠯᠠᠵᠤ | ᠰᠢᠭᠦᠳᠡᠷᠢ ᠡᠭᠰᠢᠭᠰᠡᠨ ᠤ ᠰᠡᠭᠦᠯᠡᠷ ᠰᠠᠶ᠋ᠢ ᠭᠠᠷᠭᠠᠨᠠ᠃ ᠡᠷᠲᠡ ᠶᠢᠨ ᠰᠢᠭᠦᠳᠡᠷᠢ ᠳᠤ ᠪᠡᠯᠴᠢᠭᠡᠷ ᠲᠤ ᠭᠠᠷᠭᠠᠪᠠᠯ ᠪᠤᠭ ᠮᠠᠯ ᠲᠤᠭᠤᠯ ᠡᠪᠡᠳᠴᠢᠨ ᠣᠯᠵᠤ ᠮᠢᠬᠠ ᠲᠠᠷᠭᠤ | ᠮᠠᠭᠤᠳᠠᠨᠠ᠃ | ᠬᠤᠶᠠᠷ᠂ ᠨᠠᠮᠤᠷᠵᠢᠶᠠᠨ ᠤ ᠨᠤᠲᠤᠭ ᠢ ᠲᠣᠬᠢᠷᠠᠭᠤᠯᠬᠤ ᠳᠠᠭᠠᠨ ᠬᠢᠷᠠ᠂ ᠬᠠᠵᠠᠭᠤ ᠳ᠋ᠧᠩ ᠭᠠᠵᠠᠷ ᠢ ᠰᠣᠩᠭᠤᠵᠤ ᠪᠠᠭᠤᠴᠠ ᠪᠠᠨ ᠲᠣᠬᠢᠷᠠᠭᠤᠯᠬᠤ ᠪᠥᠭᠡᠳ | ᠮᠠᠯ ᠢᠶᠠᠨ ᠨᠠᠭᠤᠷ᠂ ᠰᠢᠷᠠ ᠤᠰᠤᠨ ᠳᠤ ᠳᠤᠲᠠᠭᠤ ᠣᠷᠣᠭᠤᠯᠵᠤ᠂ ᠴᠡᠪᠡᠷ ᠲᠤᠩᠭᠠᠯᠠᠭ ᠭᠤᠣᠯ ᠤᠨ ᠤᠰᠤ ᠪᠠᠷ ᠭᠦᠢᠴᠡᠳ ᠤᠰᠤᠯᠠᠨᠠ᠃ ᠨᠠᠢᠮᠠ᠂ ᠶᠢᠰᠦᠨ ᠰᠠᠷᠠ ᠶᠢᠨ | ᠦᠶᠡ ᠪᠠᠷ ᠲᠤᠰᠤᠨ ᠲᠠᠷᠭᠤ ᠶᠢ ᠭᠦᠢᠴᠡᠳ ᠠᠪᠤᠭᠤᠯᠬᠤ ᠶᠢᠨ ᠲᠥᠯᠥᠭᠡ᠂ ᠪᠤᠭ ᠮᠠᠯ ᠢ ᠬᠤᠶᠠᠷ ᠡᠳᠦᠷ ᠲᠤ ᠨᠢᠭᠡ ᠤᠳᠠᠭᠠ ᠤᠰᠤᠯᠠᠨᠠ᠃ ᠨᠠᠮᠤᠷ ᠤᠨ ᠴᠠᠭ ᠤᠨ | ᠶᠡᠭᠡ ᠰᠡᠬᠦᠯ ᠲᠠᠢ ᠬᠤᠨᠢ ᠪᠠ ᠬᠤᠷᠠᠭᠠᠨ ᠤ ᠰᠡᠬᠦᠯ ᠤᠨ ᠪᠠᠭᠠᠰᠤ ᠶᠢ ᠦᠷᠬᠦᠯᠵᠢ ᠠᠷᠢᠯᠭᠠᠵᠤ᠂ ᠦᠳᠦᠵᠤ ᠬᠤᠷᠤᠬᠠᠶᠢᠳᠠᠬᠤ ᠶᠢ ᠰᠡᠷᠭᠡᠶᠢᠯᠡᠨᠡ᠃ ᠨᠠᠮᠤᠷ ᠤᠨ ᠴᠠᠭ ᠤᠨ | ᠮᠠᠯ ᠢ ᠤᠰᠤᠯᠠᠵᠤ ᠬᠤᠲᠠᠯᠠᠬᠤ ᠳᠠᠭᠠᠨ ᠮᠣᠷᠢ ᠪᠠᠷ ᠲᠠᠭᠤᠬᠤ ᠪᠤᠶᠤ ᠭᠦᠶᠦᠯᠭᠡᠨ ᠲᠤᠰᠤᠨ ᠬᠥᠯᠥᠰᠦ ᠭᠠᠷᠭᠠᠬᠤ ᠶᠢ ᠡᠷᠡᠰ ᠴᠡᠭᠡᠷᠯᠡᠨᠡ᠃ ᠨᠠᠮᠤᠷ ᠤᠨ ᠴᠠᠭ ᠤᠨ ᠮᠠᠯ ᠢ | ᠪᠡᠯᠴᠢᠭᠡᠷᠯᠡᠭᠦᠯᠬᠦ ᠳᠡᠭᠡᠨ ᠡᠪᠡᠰᠦᠨ ᠰᠤᠷ ᠢ ᠬᠥᠭᠡᠭᠡᠵᠦ᠂ ᠦᠷᠡ ᠲᠠᠢ ᠡᠪᠡᠰᠦ ᠶᠢ ᠢᠯᠡᠭᠦᠦ ᠢᠳᠡᠭᠦᠯᠦᠨᠡ᠃ | ᠭᠤᠷᠪᠠ᠂ ᠡᠪᠦᠯᠵᠢᠶᠡ ᠨᠤᠲᠤᠭ ᠢ ᠰᠣᠩᠭᠤᠬᠤ ᠳᠠᠭᠠᠨ ᠠᠭᠤᠯᠠ ᠶᠢᠨ ᠨᠥᠮᠥᠷᠢ ᠭᠠᠵᠠᠷ ᠢ ᠰᠣᠩᠭᠤᠵᠤ᠂ ᠡᠪᠦᠯ ᠤᠨ ᠴᠠᠰᠤ ᠰᠢᠭᠤᠷᠭᠠᠨ ᠢ ᠰᠡᠷᠭᠡᠶᠢᠯᠡᠬᠦ | ᠶᠢᠨ ᠲᠥᠯᠥᠭᠡ ᠠᠭᠤᠯᠠᠨ ᠤ ᠡᠩᠭᠡᠷ᠂ ᠤᠢ ᠰᠢᠭᠤᠢ ᠵᠤᠵᠠᠭᠠᠨ᠂ ᠢᠯᠠ ᠤᠰᠤ ᠲᠠᠢ᠂ ᠨᠠᠷᠠ ᠲᠤᠰᠬᠤ ᠡᠭᠡᠪᠦᠷ ᠳᠤᠯᠠᠭᠠᠨ ᠨᠤᠲᠤᠭ ᠢ ᠰᠣᠩᠭᠤᠨ ᠲᠣᠬᠢᠷᠠᠭᠤᠯᠤᠨᠠ᠃ | ᠡᠪᠦᠯ ᠶᠡᠭᠡ ᠴᠠᠰᠤ ᠣᠷᠣᠵᠤ ᠰᠢᠭᠤᠷᠭᠠᠨ ᠳᠡᠭᠳᠡᠪᠡᠯ ᠠᠭᠤᠯᠠᠨ ᠤ ᠡᠩᠭᠡᠷ ᠡᠬᠡᠪᠴᠢ ᠶᠢ ᠳᠠᠭᠠᠭᠤᠯᠵᠤ ᠮᠠᠯ ᠢᠶᠠᠨ ᠬᠠᠷᠢᠭᠤᠯᠤᠨᠠ᠃ ᠴᠠᠰᠤ ᠭᠦᠨ ᠣᠷᠣᠪᠠᠯ ᠠᠭᠤᠯᠠᠨ | ᠡᠩᠭᠡᠷ ᠤᠢ ᠰᠢᠭᠤᠢ ᠵᠤᠵᠠᠭᠠᠨ ᠭᠠᠵᠠᠷ ᠢ ᠰᠣᠩᠭᠤᠭᠰᠠᠨ ᠲᠤᠯᠠ ᠬᠤᠩᠬᠤᠷ ᠭᠠᠵᠠᠷ᠂ ᠭᠤᠤ ᠰᠤᠵᠠᠭ ᠲᠤ ᠬᠤᠷᠠᠵᠤ ᠴᠤᠭᠯᠠᠷᠠᠭᠰᠠᠨ ᠮᠣᠳᠣᠨ ᠤ ᠨᠠᠪᠴᠢ ᠯᠠᠪᠳᠠᠭᠤᠯ ᠢ | ᠮᠠᠯ ᠳᠠᠭᠠᠨ ᠢᠳᠡᠭᠦᠯᠵᠦ ᠵᠤᠳ ᠰᠢᠭᠤᠷᠭᠠᠨ ᠢ ᠠᠵᠢᠭ ᠦᠭᠡᠢ ᠭᠡᠲᠦᠯᠳᠡᠭ ᠪᠠᠶᠢᠨᠠ᠃ ᠡᠪᠦᠯ ᠤᠨ ᠤᠯᠠᠷᠢᠯ ᠳᠤ ᠮᠠᠯ ᠢ ᠵᠠᠪᠠᠯ ᠭᠦᠢᠴᠡᠳ ᠤᠰᠤᠯᠠᠬᠤ ᠬᠡᠷᠡᠭᠲᠡᠢ᠂ ᠦᠭᠡᠢ | ᠪᠣᠯ ᠮᠠᠯ ᠤᠨ ᠬᠠᠯᠠᠭᠤᠨ ᠤ ᠬᠡᠮᠵᠢᠶᠡ ᠪᠠᠭᠤᠷᠠᠵᠤ ᠮᠠᠯ ᠪᠡᠭᠡᠷᠡᠵᠦ ᠲᠠᠭᠠᠷᠠᠬᠤ ᠪᠥᠭᠡᠳ ᠮᠠᠯ ᠤᠨ ᠪᠠᠭᠠᠰᠤ ᠬᠤᠷᠭᠤᠰᠤᠯᠠᠵᠤ ᠡᠴᠡᠵᠦ ᠲᠤᠷᠠᠨᠠ᠃ ᠡᠪᠦᠯ ᠤᠨ ᠴᠠᠭ ᠤᠨ | ᠮᠠᠯ ᠤᠨ ᠬᠡᠪᠲᠡᠷᠢ ᠶᠢ ᠰᠠᠶᠢᠨ ᠵᠤᠵᠠᠭᠠᠯᠠᠵᠤ᠂ ᠬᠠᠭᠤᠷᠠᠢ ᠬᠤᠶᠠᠭ ᠢ ᠵᠤᠵᠠᠭᠠᠯᠠᠨ ᠳᠡᠪᠢᠰᠴᠦ᠂ ᠳᠣᠣᠷᠠ ᠠᠴᠠ ᠨᠢ ᠵᠢᠩᠭᠢᠨᠡᠬᠦ ᠶᠢ ᠰᠠᠶᠢᠲᠤᠷ ᠰᠡᠷᠭᠡᠶᠢᠯᠡᠨᠡ᠃ | ᠳᠥᠷᠪᠡ᠂ ᠬᠠᠪᠤᠷᠵᠢᠶᠠᠨ ᠤ ᠨᠤᠲᠤᠭ ᠢ ᠰᠣᠩᠭᠤᠬᠤ ᠳᠠᠭᠠᠨ ᠠᠭᠤᠯᠠ ᠲᠠᠢ᠂ ᠤᠰᠤ ᠲᠠᠢ᠂ ᠲᠡᠭᠰᠢ ᠲᠠᠯᠠ ᠭᠠᠵᠠᠷ ᠢ ᠰᠣᠩᠭᠤᠬᠤ ᠪᠥᠭᠡᠳ ᠳᠡᠭᠡᠷᠡ ᠵᠢᠯ | ᠤᠨ ᠵᠤᠰᠠᠯᠠᠩ ᠤᠨ ᠨᠤᠲᠤᠭ ᠠᠴᠠ ᠤᠶᠢᠷᠠᠯᠴᠠᠭᠠ ᠭᠠᠵᠠᠷ ᠢ ᠰᠣᠩᠭᠤᠨᠠ᠃ ᠠᠭᠤᠯᠠ ᠲᠠᠢ ᠨᠥᠮᠥᠷᠢ ᠭᠠᠵᠠᠷ ᠢ ᠰᠣᠩᠭᠤᠬᠤ ᠨᠢ ᠬᠠᠪᠤᠷ ᠤᠨ ᠬᠠᠷᠠ ᠰᠯᠬᠢ᠂ ᠵᠤᠳ | ᠰᠢᠭᠤᠷᠭᠠᠨ ᠲᠠᠢ ᠡᠳᠦᠷ ᠲᠣᠬᠢᠶᠠᠯᠳᠤᠪᠠᠯ ᠠᠭᠤᠯᠠᠨ ᠡᠩᠭᠡᠷ ᠮᠠᠯ ᠢᠶᠠᠨ ᠬᠠᠷᠢᠭᠤᠯᠤᠨᠠ᠃ ᠳᠡᠭᠡᠷᠡ ᠵᠢᠯ ᠤᠨ ᠵᠤᠰᠠᠯᠠᠩ ᠤᠨ ᠨᠤᠲᠤᠭ ᠠᠴᠠ ᠪᠠᠨ ᠤᠶᠢᠷᠠᠯᠴᠠᠭᠠ | ᠪᠠᠭᠤᠬᠤ ᠨᠢ ᠵᠤᠨ ᠤ ᠤᠯᠠᠷᠢᠯ ᠤᠨ ᠮᠠᠯ ᠤᠨ ᠭᠢᠰᠬᠢᠯᠡᠵᠦ ᠤᠨᠠᠭᠠᠭᠰᠠᠨ᠂ ᠨᠣᠭᠤᠭᠠᠨ ᠢᠶᠠᠷ ᠢᠶᠠᠨ ᠬᠠᠳᠠᠭᠰᠠᠨ ᠮᠠᠯ ᠤᠨ ᠬᠢᠰᠬᠢᠯᠡᠬᠦᠷ ᠡᠪᠡᠰᠦ ᠶᠢ ᠮᠠᠯ ᠳᠠᠭᠠᠨ | ᠢᠳᠡᠭᠦᠯᠪᠡᠯ ᠰᠢᠮᠡ ᠲᠡᠵᠢᠭᠡᠯ ᠰᠠᠶᠢᠨ ᠪᠠᠶᠢᠳᠠᠭ᠃ ᠬᠠᠪᠤᠷ ᠤᠨ ᠮᠠᠯ ᠢ ᠡᠷᠲᠡ ᠪᠡᠯᠴᠢᠭᠡᠷ ᠲᠤ ᠭᠠᠷᠭᠠᠵᠤ᠂ ᠣᠷᠣᠢ ᠬᠤᠳᠠᠯᠨᠠ᠂ ᠴᠠᠳᠲᠠᠯᠠ ᠢᠳᠡᠰᠢᠯᠡᠭᠦᠯᠦᠨᠡ᠃ | ᠮᠣᠩᠭᠤᠯ ᠬᠥᠮᠥᠨ ᠲᠦᠷᠪᠡᠨ ᠤᠯᠠᠷᠢᠯ ᠢᠶᠠᠷ ᠣᠲᠣᠷᠯᠠᠨ ᠮᠠᠯᠵᠢᠵᠤ ᠶᠠᠪᠤᠬᠤ ᠳᠠᠭᠠᠨ ᠪᠠᠶᠢᠭᠠᠯᠢ ᠣᠷᠴᠢᠨ ᠲᠠᠢ ᠪᠠᠨ ᠵᠣᠬᠢᠴᠠᠯᠳᠤᠨ᠂ ᠪᠠᠶᠢᠭᠠᠯᠢ ᠪᠠᠨ | ᠰᠢᠲᠦᠵᠦ᠂ ᠪᠠᠶᠢᠭᠠᠯᠢ ᠪᠠᠨ ᠬᠠᠶᠢᠷᠠᠯᠠᠵᠤ᠂ ᠪᠠᠶᠢᠭᠠᠯᠢ ᠪᠠᠨ ᠲᠦᠰᠢᠭᠯᠵᠡᠤ ᠶᠠᠪᠤᠳᠠᠭ᠃ ᠮᠣᠩᠭᠤᠯ ᠬᠥᠮᠥᠨ ᠬᠠᠮᠢᠭᠠ᠂ ᠶᠠᠮᠠᠷ ᠭᠠᠵᠠᠷ ᠨᠡᠭᠦᠵᠦ ᠶᠠᠪᠤᠯᠠ ᠭᠡᠳ ᠠᠭᠤᠯᠠ | ᠬᠠᠶᠢᠷᠬᠠᠨ ᠤ ᠨᠠᠪᠳᠠᠭ ᠰᠠᠪᠳᠠᠭ ᠲᠠᠭᠠᠨ ᠰᠦᠰᠦᠭᠯᠡᠨ ᠮᠥᠷᠭᠦᠵᠦ᠂ ᠣᠪᠣᠭᠠ ᠱᠠᠩᠰᠢᠨ ᠳᠠᠭᠠᠨ ᠴᠠᠭᠠᠨ ᠪᠡᠯᠡᠭ ᠡᠷᠭᠦᠵᠦ ᠮᠥᠷᠭᠦᠨ ᠳᠠᠭᠠᠳᠬᠠᠳᠠᠭ ᠪᠥᠭᠡᠳ ᠠᠭᠤᠯᠠ | ᠬᠠᠶᠢᠷᠬᠠᠨ ᠤ ᠮᠣᠳᠣ ᠴᠢᠯᠠᠭᠤ ᠶᠢ ᠳᠤᠷᠠ ᠪᠠᠷ ᠢᠶᠠᠨ ᠬᠥᠳᠡᠯᠭᠡᠬᠦ ᠦᠭᠡᠢ ᠨᠠᠭᠤᠷ ᠭᠤᠣᠯ ᠤᠨ ᠤᠰᠤᠨ ᠳᠤ ᠮᠠᠭᠤ ᠰᠠᠶᠢᠨ ᠶᠠᠭᠤᠮᠠ ᠪᠠᠨ ᠬᠠᠶᠠᠬᠤ ᠦᠭᠡᠢ᠂ | ᠬᠤᠪᠴᠠᠰᠤ ᠬᠤᠨᠠᠷ ᠢᠶᠠᠨ ᠤᠬᠢᠶᠠᠨ ᠪᠤᠵᠠᠷᠳᠠᠭᠤᠯᠬᠤ ᠦᠭᠡᠢ᠂ ᠬᠥᠷᠥᠰᠥ ᠰᠢᠷᠣᠢ ᠶᠢ ᠬᠦᠨᠳᠡᠬᠦ ᠦᠭᠡᠢ᠂ ᠠᠷᠢᠶᠠᠲᠠᠨ ᠵᠢᠭᠦᠷᠲᠡᠨ ᠢ ᠳᠤᠷᠠ ᠪᠠᠷ ᠢᠶᠠᠨ ᠠᠯᠠᠵᠤ | ᠬᠤᠷᠣᠭᠠᠬᠤ ᠦᠭᠡᠢ᠂ ᠵᠢᠭᠦᠷᠲᠡᠨ ᠰᠢᠪᠠᠭᠤ ᠶᠢᠨ ᠥᠨᠳᠡᠭᠡ ᠵᠤᠯᠵᠠᠭᠠ ᠶᠢ ᠬᠥᠳᠡᠯᠭᠡᠬᠦ ᠦᠭᠡᠢ᠂ ᠪᠡᠶᠡ ᠶᠢᠨ ᠰᠡᠭᠦᠳᠡᠷ ᠢᠶᠠᠨ ᠴᠦ ᠳᠡᠭᠡᠷᠡ ᠨᠢ ᠲᠤᠰᠬᠠᠬᠤ ᠦᠭᠡᠢ᠂ | ᠨᠠᠭᠠᠲᠤ ᠵᠠᠬᠠ ᠳᠠᠭᠠᠨ ᠮᠣᠭᠠᠢ ᠮᠡᠯᠡᠬᠡᠢ᠂ ᠵᠢᠭᠠᠰᠤ ᠵᠢᠷᠭᠠᠬᠠᠢ ᠶᠢ ᠬᠦᠷᠳᠡᠯᠡ ᠠᠯᠠᠳᠠᠭ ᠦᠭᠡᠢ ᠨᠢᠩᠵᠢᠨ ᠰᠠᠡᠳᠬᠢᠯ ᠲᠠᠢ ᠦᠨᠳᠦᠰᠦᠲᠡᠨ ᠶᠤᠮ᠃ ᠡᠶᠢᠮᠦ ᠠᠴᠠ ᠪᠠᠶᠢᠭᠠᠯᠢ | ᠣᠷᠴᠢᠨ ᠨᠢ ᠬᠡᠵᠢᠶᠡ ᠳᠡᠭᠡᠨ ᠡᠪᠳᠡᠭᠳᠡᠬᠦ ᠦᠭᠡᠢ᠂ ᠡᠪᠡᠰᠦ ᠪᠡᠯᠴᠢᠭᠡᠷ ᠨᠢ ᠬᠡᠵᠢᠶᠡ ᠳᠡᠭᠡᠨ ᠲᠠᠴᠢᠷᠳᠠᠬᠤ ᠦᠭᠡᠢ᠂ ᠠᠭᠤᠯᠠ ᠬᠠᠶᠢᠷᠬᠠᠨ ᠨᠢ ᠬᠡᠵᠢᠶᠡ ᠳᠡᠭᠡᠨ ᠰᠦᠷᠯᠢᠭ᠂ | ᠤᠢ ᠮᠣᠳᠣ ᠨᠢ ᠬᠡᠵᠢᠶᠡ ᠳᠡᠭᠡᠨ ᠰᠠᠬᠤᠯᠢᠭ᠂ ᠨᠠᠭᠤᠷ ᠭᠤᠣᠯ ᠨᠢ ᠬᠡᠵᠢᠶᠡ ᠳᠡᠭᠡᠨ ᠲᠤᠩᠭᠠᠯᠠᠭ᠂ ᠬᠤᠷᠠ ᠪᠣᠷᠣᠭᠠᠨ ᠨᠢ ᠬᠡᠵᠢᠶᠡ ᠳᠡᠭᠡᠨ ᠲᠡᠩᠴᠡᠭᠦᠷᠢ ᠲᠠᠢ᠂ ᠪᠠᠶᠢᠭᠠᠯᠢ | ᠣᠷᠴᠢᠯᠠᠩ ᠨᠢ ᠬᠡᠵᠢᠶᠡ ᠳᠡᠭᠡᠨ ᠡᠷᠡᠭᠦᠯ ᠰᠠᠷᠠᠭᠤᠯ ᠢᠶᠠᠷ ᠪᠠᠶᠢᠳᠠᠭ ᠰᠠᠨ᠃ | ᠣᠲᠣᠷᠯᠠᠨ ᠮᠠᠯᠵᠢᠵᠤ᠂ ᠨᠡᠭᠦᠵᠦ ᠪᠠᠭᠤᠬᠤ ᠳᠠᠭᠠᠨ ᠪᠡᠯᠡᠳᠬᠡᠯ ᠠᠵᠢᠯ ᠢ ᠭᠦᠢᠴᠡᠳ ᠬᠢᠳᠡᠭ᠃ ᠵᠢᠱᠢᠶᠡᠯᠡᠪᠡᠯ᠂ ᠮᠣᠩᠭᠤᠯ ᠭᠡᠷ᠃ ᠮᠣᠳᠣᠨ ᠲᠡᠷᠭᠡ᠂ ᠲᠥᠯ | ᠮᠠᠯ ᠤᠨ ᠭᠦᠷᠦᠮᠡᠯ ᠪᠤᠷᠭᠠᠰᠤᠨ ᠪᠠ ᠰᠢᠪᠡᠭᠡ᠂ ᠮᠣᠷᠢᠨ ᠡᠮᠡᠭᠡᠯ ᠬᠠᠵᠠᠭᠠᠷ᠂ ᠨᠣᠭᠲᠣ᠂ ᠴᠢᠳᠦᠷ᠂ ᠠᠷᠭᠠᠮᠵᠢᠶᠠ᠂ ᠤᠷᠭᠠ ᠵᠡᠷᠭᠡ ᠪᠠᠨ ᠰᠢᠨᠡᠳᠬᠡᠨ ᠵᠠᠰᠠᠵᠤ ᠪᠡᠯᠡᠳᠬᠡᠬᠦ ᠶᠢᠨ | ᠬᠠᠮᠲᠤ ᠭᠡᠷ ᠵᠠᠭᠤᠷᠠ ᠶᠢᠨ ᠵᠠᠷᠤᠵᠤ ᠪᠠᠷᠢᠬᠤ ᠠᠮᠢᠳᠤᠷᠠᠯ ᠤᠨ ᠬᠡᠷᠡᠭᠰᠡᠯ ᠪᠤᠯᠬᠤ ᠲᠣᠭᠤᠭᠠ ᠰᠢᠨᠠᠭᠠ᠂ ᠲᠤᠯᠭᠠ ᠵᠤᠤᠬᠠ᠂ ᠠᠶᠠᠭᠠ ᠰᠠᠪᠬᠠ᠂ ᠵᠡᠭᠦᠦ ᠤᠲᠠᠰᠤ᠂ ᠬᠠᠶᠢᠴᠢ | ᠰᠢᠪᠦᠭᠡ᠂ ᠬᠡᠳᠠ ᠬᠢᠳᠤᠭᠠ᠂ ᠬᠢᠷᠦᠭᠡ ᠰᠦᠬᠡ᠂ ᠴᠦᠴᠡ ᠤᠭᠤᠯᠢ᠂ ᠳᠡᠭᠡᠰᠦ ᠲᠦᠷᠦ᠂ ᠰᠠᠨᠳᠤᠤ ᠪᠣᠣᠳᠤᠤ᠂ ᠭᠠᠩ ᠰᠠᠪᠠ ᠵᠡᠷᠭᠡ ᠡᠳᠦᠷ ᠲᠤᠳᠤᠮ ᠤᠨ ᠬᠡᠷᠡᠭᠰᠡᠯ ᠪᠠ | ᠪᠤᠳᠠᠭᠠ ᠴᠠᠶᠢᠯᠭᠠᠬᠤ ᠤᠭᠤᠷ ᠨᠦᠳᠦᠭᠦᠷ᠂ ᠤᠷᠭᠠ ᠶᠢᠨ ᠵᠠᠯᠠᠭᠠᠭᠤᠷ ᠮᠣᠳᠣ᠂ ᠵᠤᠵᠠᠭᠠᠨ ᠨᠢᠮᠭᠡᠨ ᠲᠠᠪᠠᠯ ᠬᠤᠪᠴᠠᠰᠤ᠂ ᠰᠢᠷᠲᠡᠭ ᠳᠡᠪᠢᠰᠬᠡᠷ᠂ ᠬᠦᠨᠡᠰᠦᠨ ᠪᠤᠳᠠᠭᠠ᠂ | ᠳᠠᠪᠤᠰᠤ ᠴᠠᠢ ᠶᠢ ᠭᠦᠢᠴᠡᠳ ᠠᠪᠴᠤ ᠶᠠᠪᠤᠨᠠ᠃ ᠬᠦᠨᠡᠰᠦᠨ ᠪᠤᠳᠠᠭᠠᠨ ᠳᠤ ᠭᠤᠣᠯ ᠨᠢ ᠮᠣᠩᠭᠤᠯ ᠠᠮᠤ᠂ ᠴᠤᠯᠭᠤᠢ ᠮᠣᠩᠭᠤᠯ ᠪᠤᠳᠠᠭᠠ ᠪᠠᠨ ᠤᠭᠤᠲᠠ ᠬᠡᠦᠳᠡᠢ ᠳᠤ | ᠰᠠᠪᠠᠯᠠᠵᠤ᠂ ᠲᠡᠷᠭᠡᠨ ᠳᠡᠭᠡᠷᠡ ᠪᠠᠨ ᠲᠡᠭᠡᠭᠡᠵᠦ ᠶᠠᠪᠤᠭᠠᠳ᠂ ᠬᠡᠵᠢᠶᠡ ᠬᠦᠨᠡᠰᠦᠨ ᠠᠮᠤ ᠨᠢ ᠳᠤᠲᠠᠪᠠᠯ ᠲᠠᠷᠠ ᠳᠠᠷᠤᠢ ᠳᠤᠨᠢ ᠬᠠᠷᠠ ᠴᠤᠯᠭᠤᠢ ᠮᠣᠩᠭᠤᠯ ᠪᠤᠳᠠᠭᠠ ᠪᠠᠨ | ᠬᠡᠳᠦᠨ ᠱᠧᠩ ᠢᠶᠠᠷ ᠬᠥᠭᠡᠯᠭᠡᠵᠦ ᠬᠠᠭᠤᠷᠤᠭᠠᠳ ᠤᠭᠤᠷ ᠨᠦᠳᠦᠭᠦᠷ ᠢᠶᠠᠷ ᠴᠠᠶᠢᠯᠭᠠᠵᠤ ᠢᠳᠡᠳᠡᠭ᠃ ᠢᠩᠭᠢᠵᠦ ᠪᠠᠭᠠ ᠪᠠᠭᠠ ᠪᠠᠷ ᠴᠠᠶᠢᠯᠭᠠᠭᠰᠠᠨ ᠬᠠᠭᠤᠷᠤᠭᠰᠠᠨ | ᠪᠤᠳᠠᠭᠠ ᠪᠣᠷᠣᠭᠠᠨ ᠵᠤᠳ ᠲᠠᠢ ᠤᠯᠠᠷᠢᠯ ᠳᠤ ᠴᠢᠭᠢᠭᠲᠦᠵᠦ ᠳᠡᠪᠲᠦᠬᠦ ᠦᠭᠡᠢ ᠰᠢᠨᠡ ᠰᠣᠷᠭᠤᠭ ᠢᠶᠠᠷ ᠪᠠᠶᠢᠳᠠᠭ᠃ | ᠤᠭᠤᠷ ᠨᠦᠳᠦᠭᠦᠷ ᠬᠡᠳᠡᠭ ᠨᠢ᠂ ᠤᠭᠤᠷ ᠨᠢ ᠮᠣᠳᠣ ᠪᠠᠷ ᠬᠢᠨᠡ᠃ ᠭᠤᠷᠪᠠᠨ ᠲᠥᠭᠡ ᠢᠯᠡᠭᠦᠦ ᠪᠦᠳᠦᠭᠦᠨ᠂ ᠬᠤᠶᠠᠷ ᠲᠣᠬᠤᠢ ᠢᠯᠡᠭᠦᠦ ᠤᠷᠳᠤ᠂ | ᠬᠠᠶᠢᠯᠠᠰᠤ ᠪᠠ ᠬᠤᠰᠤ ᠵᠡᠷᠭᠡ ᠶᠢᠨ ᠴᠢᠨᠠᠷ ᠰᠠᠶᠢᠨᠲᠠᠢ ᠬᠠᠲᠠᠭᠤ ᠮᠣᠳᠣ ᠶᠢ ᠨᠢᠭᠡ ᠲᠣᠬᠤᠢ ᠲᠤᠯᠤᠭᠠᠨ ᠢᠮᠠᠬᠤ ᠰᠢᠬᠠᠮ ᠭᠦᠨ ᠬᠥᠨᠳᠡᠶᠢᠯᠡᠨ ᠤᠬᠤᠵᠤ ᠵᠠᠰᠠᠭᠠᠳ | ᠬᠠᠭᠤᠷᠤᠭᠰᠠᠨ ᠪᠤᠳᠠᠭᠠ ᠪᠠᠨ ᠪᠠᠭᠠ ᠪᠠᠭᠠ ᠪᠠᠷ ᠬᠢᠵᠦ ᠨᠦᠳᠦᠭᠦᠷ ᠤᠨ ᠡᠰᠢ ᠪᠠᠷ ᠨᠦᠳᠦᠵᠦ ᠪᠤᠳᠠᠭᠠ ᠪᠠᠨ ᠴᠠᠶᠢᠯᠭᠠᠳᠠᠭ ᠪᠠᠭᠠᠵᠢ᠂ ᠨᠦᠳᠦᠭᠦᠷ ᠬᠡᠳᠡᠭ ᠨᠢ | ᠰᠠᠭᠤᠷᠢ ᠶᠢᠨ ᠲᠠᠯᠠ ᠨᠢ ᠵᠢᠷᠭᠤᠭᠠᠨ ᠢᠮᠠᠬᠤ᠂ ᠲᠡᠭᠰᠢ ᠳᠥᠷᠪᠡᠯᠵᠢᠨ᠂ ᠥᠨᠳᠥᠷ ᠤᠨ ᠬᠡᠮᠵᠢᠶᠡ ᠨᠢ ᠵᠢᠷᠭᠤᠭᠠᠨ ᠢᠮᠠᠬᠤ ᠣᠷᠣᠢ ᠨᠢ ᠪᠥᠮᠪᠥᠷᠢᠭᠡᠨ ᠴᠢᠯᠠᠭᠤ ᠶᠢ | ᠰᠠᠭᠤᠷᠢ ᠶᠢᠨ ᠳᠤᠮᠳᠠ ᠬᠡᠰᠡᠭ ᠲᠤᠨᠢ ᠳᠤᠲᠠᠭᠤ ᠮᠤᠬᠤᠷ ᠨᠦᠬᠡ ᠴᠤᠭᠤᠯᠵᠤ᠂ ᠴᠢᠨᠠᠷ ᠰᠠᠶᠢᠨᠲᠠᠢ ᠬᠠᠲᠠᠭᠤ ᠮᠣᠳᠣ ᠪᠠᠷ ᠡᠰᠢ ᠵᠣᠬᠢᠶᠠᠭᠰᠠᠨ ᠪᠠᠭᠠᠵᠢ ᠮᠥᠨ᠃ | ᠮᠣᠩᠭᠤᠯᠴᠤᠳ ᠣᠲᠣᠷᠯᠠᠨ ᠨᠡᠭᠦᠵᠦ ᠶᠠᠪᠤᠬᠤ ᠳᠠᠭᠠᠨ ᠤᠨᠤᠰᠢᠨ ᠮᠣᠷᠢ 2 — 3 ᠪᠡᠯᠡᠳᠬᠡᠵᠦ᠂ ᠭᠡᠷ ᠤᠨ ᠣᠶᠢᠷᠠ ᠵᠠᠭᠤᠷᠠ ᠠᠷᠭᠠᠮᠵᠢᠶᠠ ᠪᠠ ᠴᠢᠳᠦᠷ | ᠢᠶᠠᠷ ᠠᠷᠠᠴᠢᠯᠠᠵᠤ ᠡᠷᠭᠢᠴᠡᠭᠦᠯᠦᠨᠡ᠃ 5 — 7 ᠮᠣᠳᠣᠨ ᠲᠡᠷᠭᠡ ᠪᠡᠯᠡᠳᠬᠡᠵᠦ ᠶᠠᠪᠤᠳᠠᠭ ᠪᠠ ᠬᠦᠨᠳᠦ ᠠᠪᠳᠠᠷᠠ ᠪᠠᠷᠠᠭᠠ ᠲᠡᠭᠡᠭᠭᠰᠠᠨ ᠨᠢᠭᠡ ᠲᠡᠷᠭᠡ ᠪᠡᠯᠡᠳᠬᠡᠵᠦ | ᠲᠡᠭᠡᠭᠡᠭᠰᠡᠨ ᠪᠠᠷᠠᠭᠠ ᠪᠠᠨ ᠪᠠᠭᠤᠯᠭᠠᠵᠤ ᠠᠪᠳᠠᠭ ᠦᠭᠡᠢ᠂ ᠭᠡᠷ ᠤᠨ ᠢᠶᠠᠨ ᠵᠡᠭᠦᠨ ᠲᠠᠯᠠ ᠳᠤ ᠪᠠᠶᠢᠯᠭᠠᠳᠠᠭ᠃ ᠪᠣᠷᠣᠭᠠᠨ ᠴᠠᠰᠤ ᠣᠷᠣᠪᠠᠯ ᠲᠤᠭᠤᠷᠭᠠᠨ ᠢᠰᠡᠭᠡᠢ ᠪᠠᠷ | ᠪᠦᠲᠡᠭᠡᠵᠦ ᠲᠠᠯᠪᠢᠳᠠᠭ᠃ ᠨᠢᠭᠡ ᠤᠰᠤᠨ ᠲᠡᠷᠭᠡ ᠪᠡᠯᠡᠳᠬᠡᠵᠦ᠂ ᠪᠦᠳᠦᠭᠦᠨ ᠮᠣᠳᠣᠨ ᠭᠠᠩ ᠲᠡᠭᠡᠭᠡᠵᠦ᠂ ᠤᠰᠤᠨ ᠭᠠᠩ ᠳᠠᠭᠠᠨ ᠬᠡᠵᠢᠶᠡᠳᠡ ᠤᠰᠤ ᠲᠠᠢ ᠪᠠᠶᠢᠯᠭᠠᠳᠠᠭ᠃ | ᠬᠤᠨᠢᠨ ᠮᠠᠨᠠᠭᠠ ᠶᠢᠨ ᠨᠢᠭᠡ ᠬᠠᠮ ᠲᠡᠷᠭᠡ ᠪᠡᠯᠡᠳᠬᠡᠵᠦ᠂ ᠬᠤᠨᠢᠨ ᠰᠦᠷᠦᠭ ᠤᠨ ᠬᠡᠪᠲᠡᠷᠢ ᠶᠢᠨ ᠬᠠᠵᠠᠭᠤᠳᠠ ᠪᠠᠶᠢᠯᠭᠠᠳᠠᠭ᠃ ᠪᠤᠰᠤᠳ ᠲᠡᠷᠭᠡ ᠶᠢ ᠭᠡᠷ ᠤᠨ ᠪᠠᠷᠠᠭᠤᠨ | ᠲᠠᠯᠠ ᠳᠤ ᠰᠤᠬᠰᠤᠷᠠᠨ ᠨᠠᠶᠢᠷᠠᠭᠤᠯᠵᠤ ᠲᠠᠯᠪᠢᠳᠠᠭ᠃ ᠭᠡᠶᠢᠴᠢᠨ ᠵᠣᠴᠢᠨ ᠢᠷᠡᠪᠠᠯ ᠡᠨᠡ ᠲᠡᠷᠭᠡᠨ ᠠᠴᠠ ᠮᠣᠷᠢ ᠪᠠᠨ ᠤᠶᠠᠵᠤ ᠪᠤᠯᠬᠤ ᠪᠥᠭᠡᠳ ᠤᠷᠭᠠ ᠲᠠᠰᠢᠭᠤᠷ ᠢᠶᠠᠨ | ᠲᠠᠯᠪᠢᠵᠤ ᠪᠣᠯᠣᠨᠠ᠃ ᠣᠲᠣᠷᠯᠠᠨ ᠮᠠᠯᠵᠢᠵᠤ ᠶᠠᠪᠤᠬᠤ ᠳᠤ ᠤᠷᠭᠠ ᠪᠣᠯ ᠲᠤᠲᠠᠭᠳᠠᠵᠤ ᠪᠣᠯᠣᠰᠢ ᠦᠭᠡᠢ ᠬᠡᠷᠡᠭᠰᠡᠯ ᠪᠠᠭᠠᠵᠢ ᠮᠥᠨ᠃ | ᠤᠷᠭᠠ ᠶᠢ ᠬᠤᠰᠤ᠂ ᠪᠤᠷᠭᠠᠰᠤ᠂ ᠮᠣᠶᠢᠯ ᠵᠡᠷᠭᠡ ᠪᠠᠬᠢᠯᠢᠭ᠌ ᠮᠣᠳᠣ ᠪᠠᠷ ᠬᠢᠨᠡ᠃ ᠤᠷᠭᠠᠨ ᠮᠣᠳᠣ ᠬᠠᠲᠠᠭᠰᠠᠨ ᠤ ᠰᠡᠭᠦᠯᠡᠷ᠂ ᠨᠣᠶᠢᠲᠠᠨ ᠭᠠᠵᠠᠷ ᠪᠤᠯᠠᠵᠤ | ᠴᠢᠬᠢᠭᠰᠢᠬᠡᠵᠤ ᠨᠤᠷᠤᠭᠠᠬᠰᠠᠨ ᠤ ᠰᠡᠭᠦᠯᠡᠷ᠂ ᠬᠠᠭᠤᠷᠠᠢ ᠡᠪᠡᠰᠦ ᠪᠤᠶᠤ ᠬᠤᠨᠢᠨ ᠦᠷᠳᠡᠩ ᠤᠨ ᠭᠠᠯ ᠤᠨ ᠨᠤᠷᠮᠠ ᠳᠤ ᠬᠠᠯᠠᠭᠠᠵᠤ ᠤᠷᠭᠠ ᠶᠢᠨ ᠵᠠᠯᠭᠠᠭᠤᠷ᠂ | ᠬᠢᠯᠪᠢᠬᠦᠷ ᠤᠨ ᠠᠵᠢᠷᠭᠠᠨ ᠮᠣᠳᠣᠨ ᠳᠤ ᠠᠯᠳᠠ ᠲᠠᠯᠢᠮ ᠤᠷᠳᠤ ᠶᠣᠵᠣᠭᠤᠷ᠂ ᠠᠯᠳᠠ ᠬᠢᠷᠢᠲᠡᠢ ᠤᠷᠳᠤ ᠴᠡᠭᠡᠵᠢ ᠶᠢᠨ ᠮᠣᠳᠣ ᠬᠡᠷᠡᠭᠯᠡᠳᠡᠭ᠃ ᠤᠷᠭᠠᠨ ᠤ ᠶᠣᠵᠣᠭᠤᠷ | ᠤᠨ ᠬᠡᠰᠡᠭ ᠲᠤ ᠬᠢᠷᠦᠭᠡ ᠪᠠᠷ ᠠᠮᠠ ᠭᠠᠷᠭᠠᠵᠤ ᠤᠬᠤᠵᠤ ᠠᠪᠤᠭᠠᠳ ᠴᠡᠭᠡᠵᠢᠨ ᠮᠣᠳᠣᠨ ᠤ ᠪᠦᠳᠦᠭᠦᠨ ᠤᠭ ᠲᠠᠯᠠ ᠳᠤ ᠰᠡᠬᠦᠯ ᠭᠠᠷᠭᠠᠨ ᠴᠠᠪᠴᠢᠵᠤ ᠵᠠᠰᠠᠭᠠᠳ᠂ | ᠶᠣᠵᠣᠭᠤᠷ ᠤᠨ ᠦᠵᠦᠭᠦᠷ ᠤᠨ ᠬᠡᠰᠡᠭ ᠲᠤ ᠭᠠᠷᠭᠠᠭᠰᠠᠨ ᠠᠮᠠᠨ ᠳᠤ ᠰᠢᠷᠭᠤᠭᠤᠯᠵᠤ᠂ ᠠᠷᠭᠠ ᠪᠢᠯᠢᠭ ᠢᠶᠠᠷ ᠠᠪᠴᠠᠯᠳᠤᠭᠤᠯᠤᠨ ᠲᠠᠭᠠᠷᠠᠭᠤᠯᠵᠤ ᠴᠠᠪᠠᠤ ᠪᠠᠷ | ᠴᠠᠪᠠᠤᠳᠠᠵᠤ ᠨᠠᠭᠠᠨᠠ᠃ ᠡᠨᠡ ᠬᠡᠰᠡᠭ ᠭᠠᠵᠠᠷ ᠤᠨ ᠭᠠᠳᠠᠭᠤᠷ ᠪᠢᠲᠡᠭᠦᠦ ᠥᠪᠴᠢᠭᠰᠡᠨ ᠦᠬᠡᠷ ᠤᠨ ᠰᠡᠬᠦᠯ ᠤᠨ ᠠᠷᠠᠰᠤ ᠶᠢ ᠰᠠᠶᠢᠨ ᠳᠡᠪᠲᠦᠭᠡᠵᠦ ᠪᠠᠶᠢᠭᠠᠳ ᠤᠭᠯᠠᠵᠤ | ᠲᠠᠯᠪᠢᠨᠠ᠃ ᠬᠠᠲᠠᠭᠰᠠᠨ ᠤ ᠰᠡᠭᠦᠯᠡᠷ ᠪᠣᠷᠣᠭᠠᠨ ᠤᠰᠤᠨ ᠳᠤ ᠴᠠᠪᠠᠤ ᠨᠢ ᠳᠡᠪᠲᠦᠵᠦ ᠰᠠᠯᠬᠤ ᠦᠭᠡᠢ᠃ ᠤᠷᠭᠠᠨ ᠤ ᠴᠡᠭᠡᠵᠢᠨ ᠪᠡᠶᠡ ᠶᠢᠨ ᠨᠠᠷᠢᠨ ᠦᠵᠦᠭᠦᠷ ᠲᠤ | ᠬᠢᠳᠤᠭᠠ ᠪᠠᠷ ᠲᠠᠩᠨᠠᠢ ᠠᠷᠤ ᠭᠠᠷᠭᠠᠨ ᠵᠣᠷᠭᠤᠵᠤ᠂ ᠤᠷᠭᠠᠨ ᠤ ᠦᠵᠦᠭᠦᠷ ᠤᠨ ᠴᠠᠶᠢᠷ ᠤᠨ ᠤᠭ ᠤᠨ ᠬᠡᠰᠡᠭ ᠲᠤ ᠮᠥᠨ ᠲᠠᠩᠨᠠᠢ ᠠᠷᠤ ᠳᠤ ᠠᠪᠴᠠᠯᠳᠤᠭᠤᠯᠤᠨ | ᠲᠠᠭᠠᠷᠠᠭᠤᠯᠵᠤ᠂ ᠨᠠᠷᠢᠨ ᠵᠦᠰᠦᠭᠰᠡᠨ ᠨᠢᠮᠭᠡᠨ ᠰᠤᠷ ᠬᠦᠯᠢᠶᠠᠷ ᠢᠶᠠᠷ ᠣᠷᠢᠶᠠᠨ ᠬᠦᠯᠢᠵᠦ ᠲᠠᠯᠪᠢᠨᠠ᠃ ᠤᠷᠭᠠᠨ ᠤ ᠨᠠᠷᠢᠨ ᠴᠠᠶᠢᠷ ᠤᠨ ᠦᠵᠦᠭᠦᠷ ᠲᠤ ᠨᠢᠭᠡ ᠪᠤᠷᠴᠠ | ᠮᠣᠷᠢᠨ ᠰᠡᠬᠦᠯ ᠤᠨ ᠥᠨᠳᠥᠷ ᠬᠢᠯᠭᠠᠰᠤ ᠶᠢ ᠣᠷᠢᠶᠠᠨ ᠤᠶᠠᠵᠤ ᠰᠠᠴᠤᠭ ᠭᠠᠷᠭᠠᠨᠠ᠃ ᠡᠭᠦᠨ ᠢ ᠤᠷᠭᠠ ᠶᠢᠨ ᠦᠵᠦᠭᠦᠷ ᠤᠨ ︽ᠴᠢᠨᠳᠠᠭᠠ︾ ᠭᠡᠨᠡ᠃ ᠡᠨᠡ ᠨᠢ | ᠨᠢᠭᠡ ᠳᠤ ᠠᠳᠤᠭᠤᠨ ᠤ ᠬᠡᠢ ᠮᠣᠷᠢ ᠶᠢ ᠳᠡᠭᠳᠡᠭᠡᠵᠦ᠂ ᠬᠤᠶᠠᠷ ᠲᠤ ᠮᠣᠷᠢ ᠤᠷᠭᠠᠯᠠᠵᠤ ᠪᠠᠷᠢᠬᠤ ᠳᠤ ᠤᠷᠭᠠᠨ ᠤ ᠬᠤᠶᠢᠪᠢ᠂ ᠤᠷᠭᠠᠨ ᠤ ᠦᠵᠦᠭᠦᠷ ᠢ ᠣᠷᠢᠶᠠᠵᠤ | ᠡᠬᠡᠳᠡᠷᠬᠡᠬᠦ ᠦᠭᠡᠢ᠂ ᠮᠣᠷᠢ ᠪᠠᠷᠢᠬᠤ ᠳᠤ ᠲᠦᠬᠦᠮ ᠪᠠᠶᠢᠳᠠᠭ᠃ ᠤᠷᠭᠠᠨ ᠤ ᠬᠤᠶᠢᠪᠢ ᠶᠢ ᠦᠬᠡᠷ ᠤᠨ ᠠᠷᠰᠦᠨ ᠰᠤᠷ ᠢ ᠨᠠᠷᠢᠨ ᠵᠦᠰᠦᠵᠦ ᠬᠤᠶᠠᠷ ᠮᠦᠰᠦᠮ ᠢᠶᠠᠷ | ᠲᠠᠮᠤᠵᠤ ᠬᠢᠬᠦ ᠪᠥᠭᠡᠳ ᠲᠠᠩ ᠰᠤᠷ ᠢᠶᠠᠷ ᠬᠢᠭᠰᠡᠨ ᠴᠦ ᠪᠤᠢ᠃ ᠦᠬᠡᠷ ᠤᠨ ᠰᠢᠷᠪᠦᠰᠦ ᠶᠢ ᠴᠠᠭᠠ ᠶᠢᠨ ᠱᠤᠤ ᠳᠤ ᠱᠣᠣᠯᠠᠵᠤ ᠪᠣᠯᠪᠠᠰᠤᠷᠠᠭᠤᠯᠤᠭᠠᠳ ᠭᠤᠷᠪᠠᠨ | ᠮᠦᠰᠦᠮ ᠢᠶᠠᠷ ᠮᠤᠰᠬᠢᠵᠤ ᠬᠢᠭᠰᠡᠨ ᠰᠢᠷᠪᠦᠰᠦᠨ ᠬᠤᠶᠢᠪᠢ ᠴᠦ ᠪᠤᠢ᠃ ᠤᠷᠭᠠ ᠶᠢ ᠮᠣᠷᠢᠨ ᠳᠡᠭᠡᠷᠡ ᠠᠪᠴᠤ ᠶᠠᠪᠤᠬᠤ ᠳᠠᠭᠠᠨ ᠴᠡᠭᠡᠵᠢᠨ ᠪᠡᠶᠡ ᠶᠢᠨ ᠦᠵᠦᠭᠦᠷ | ᠣᠷᠴᠢᠨ ᠠᠴᠠ ᠤᠶᠠᠵᠤ ᠲᠠᠯᠪᠢᠭᠰᠠᠨ ᠰᠤᠷ ᠭᠤᠭᠴᠤᠭᠠ ᠠᠴᠠ ᠲᠣᠬᠤᠶᠢᠯᠠᠵᠤ ᠴᠢᠷᠴᠦ ᠶᠠᠪᠤᠳᠠᠭ᠃ ᠡᠨᠡ ᠭᠤᠭᠴᠤᠭᠠ ᠶᠢ ᠤᠷᠭᠠᠨ ᠤ ︽ᠲᠤᠬᠤᠪᠴᠢ︾ ᠭᠡᠨᠡ᠃ | ᠤᠷᠭᠠ ᠶᠢ ᠬᠥᠰᠡᠷ ᠬᠠᠶᠠᠵᠤ᠂ ᠳᠡᠭᠡᠭᠦᠷ ᠨᠢ ᠠᠯᠬᠤᠵᠤ ᠬᠡᠰᠬᠢᠬᠦ ᠶᠢ ᠴᠡᠭᠡᠷᠯᠡᠨᠡ᠃ ᠭᠡᠷ ᠤᠨ ᠪᠠᠷᠠᠭᠤᠨ ᠲᠠᠯᠠ ᠳᠤ ᠪᠤᠯᠠᠵᠤ ᠲᠠᠯᠪᠢᠭᠰᠠᠨ ᠤᠷᠭᠠ ᠲᠠᠯᠪᠢᠬᠤ | ᠰᠠᠯᠠᠭᠠ ᠲᠠᠢ ᠮᠣᠳᠣᠨ ᠤ ᠰᠠᠯᠠᠭᠠᠨ ᠳᠤ ᠤᠨᠤᠭᠤᠯᠤᠨ ᠲᠦᠰᠢᠭᠦᠯᠵᠦ ᠲᠠᠯᠪᠢᠬᠤ ᠪᠤᠶᠤ ᠮᠣᠩᠭᠤᠯ ᠭᠡᠷ ᠤᠨ ᠬᠠᠭᠠᠯᠭᠠ ᠶᠢᠨ ᠪᠠᠷᠠᠭᠤᠨ ᠲᠠᠯᠠ ᠶᠢᠨ ᠬᠠᠨᠠ ᠤᠨᠢ ᠶᠢ | ᠲᠦᠰᠢᠭᠦᠯᠦᠨ ᠲᠠᠯᠪᠢᠨᠠ᠂ ᠪᠠᠰᠠ ᠭᠡᠷ ᠤᠨ ᠪᠠᠷᠠᠭᠤᠨ ᠲᠠᠯᠠ ᠳᠤ ᠨᠠᠶᠢᠷᠠᠭᠤᠯᠤᠨ ᠰᠤᠭᠰᠤᠷᠴᠤ ᠲᠠᠯᠪᠢᠭᠰᠠᠨ ᠮᠣᠳᠣᠨ ᠲᠡᠷᠭᠡᠨ ᠳᠡᠭᠡᠷᠡ ᠲᠠᠯᠪᠢᠨᠠ᠃ ᠮᠣᠩᠭᠤᠯ | ᠬᠥᠮᠥᠨ ᠤ ᠤᠷᠭᠠ ᠪᠣᠯ ᠤᠨᠴᠠᠭᠠᠢ ᠨᠢᠭᠡᠨ ᠵᠦᠢᠯ ᠤᠨ ᠵᠡᠪᠰᠡᠭ ᠮᠥᠨ᠃ ᠮᠣᠷᠢ ᠤᠷᠭᠠᠯᠠᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠪᠠᠰᠠ ᠬᠤᠨᠢ ᠬᠤᠷᠠᠭᠠ ᠶᠢ ᠤᠷᠭᠠᠯᠠᠵᠤ ᠪᠠᠷᠢᠳᠠᠭ᠃ | ᠮᠠᠯ ᠢᠶᠠᠨ ᠬᠥᠭᠡᠭᠡᠵᠦ᠂ ᠬᠤᠷᠢᠶᠠᠵᠤ᠂ ᠬᠤᠲᠠᠯᠠᠬᠤ ᠳᠠᠭᠠᠨ ᠰᠤᠷ ᠬᠤᠶᠢᠪᠢ ᠪᠠᠷ ᠰᠢᠪᠬᠠᠷᠳᠠᠨ ᠭᠤᠶᠠᠳᠠᠵᠤ ᠠᠶᠤᠯᠭᠠᠳᠠᠭ᠃ ᠥᠩᠭᠡᠷᠡᠭᠰᠡᠨ ᠦᠯᠢᠬᠡᠷ ᠲᠡᠦᠬᠡᠨ ᠳᠤ | ᠲᠠᠶᠢᠨ ᠪᠠᠶᠢᠯᠳᠤᠭᠠᠨ ᠳᠤ ᠴᠦ ᠬᠡᠷᠡᠭᠯᠡᠵᠦ ᠪᠠᠶᠢᠪᠠ᠃ ᠵᠢᠱᠢᠶᠡᠯᠡᠪᠡᠯ᠂ ᠲᠠᠩ ᠤᠯᠤᠰ ᠤᠨ ᠲᠠᠪᠤᠨ ᠶᠤᠸᠠᠨ ᠤ ︽ᠱᠠᠩ ᠶᠣᠣ ᠵᠤᠸᠠᠨ︾ ᠤ ᠦᠯᠢᠭᠡᠷ ᠲᠤ ᠭᠠᠷᠳᠠᠭ ᠬᠠᠨ | ᠰᠦᠩ ᠸᠠᠩ᠂ ᠯᠢ ᠺᠦᠨ ᠤ ᠳᠠᠭᠠᠭᠤᠯᠤᠭᠰᠠᠨ ᠮᠣᠩᠭᠤᠯ ᠴᠡᠷᠢᠭ ᠤᠨ ᠠᠯᠲᠠᠨᠰᠦ᠋ᠬᠡ᠂ ᠦᠷᠬᠦᠦ᠂ ᠵᠦᠷᠬᠦᠦ ᠨᠠᠷ ᠤᠷᠭᠠ ᠪᠢᠯᠠᠭᠤ ᠬᠡᠷᠡᠭᠯᠡᠭᠰᠡᠨ ᠴᠡᠷᠢᠭ ᠢᠶᠠᠷ ᠪᠠᠷᠠᠭᠤᠨ | ᠶᠠᠨ ᠤᠯᠤᠰ ᠤᠨ ᠨᠠᠷᠠᠳᠦ ᠵᠠᠩᠵᠤᠨ ᠴᠡᠷᠢᠭ ᠢ ᠴᠥᠮ ᠪᠠᠷᠢᠪᠴᠢᠯᠠᠭᠰᠠᠨ︔ ᠮᠠᠯ ᠠᠷᠢᠶᠠᠲᠠᠨ ᠢ ᠪᠠᠷᠢᠵᠤ ᠢᠳᠡᠭᠰᠡᠨ ᠴᠠᠳᠬᠤᠯᠠᠩ ᠴᠢᠨ᠋ᠸᠠ ᠶᠢ ᠮᠣᠷᠢ ᠪᠠᠷ ᠲᠠᠭᠤᠵᠤ | ᠤᠷᠭᠠᠯᠠᠵᠤ ᠠᠪᠤᠭᠠᠳ ᠬᠡᠳᠡᠷᠬᠦ ᠪᠤᠴᠠᠨ ᠳᠣᠪᠲᠣᠯᠵᠤ ᠪᠣᠭᠤᠮᠢᠯᠠᠵᠤ ᠠᠯᠠᠳᠠᠭ ᠦᠯᠢᠭᠡᠷ ᠮᠠᠯᠵᠢᠬᠤ ᠣᠷᠣᠨ ᠳᠤ ᠦᠷᠬᠦᠯᠵᠢ ᠭᠠᠷᠳᠠᠭ ᠪᠠᠶᠢᠭᠰᠠᠨ᠃ ᠴᠠᠳᠬᠤᠯᠠᠩ | ᠴᠢᠨ᠋ᠸᠠ ᠶᠢ ᠮᠣᠷᠢ ᠪᠠᠷ ᠲᠠᠭᠤᠬᠤ ᠳᠠᠭᠠᠨ ᠥᠪᠡᠷ ᠤᠨ ᠬᠦᠵᠦᠭᠦᠦ ᠪᠠᠨ ᠠᠯᠴᠢᠭᠤᠷ ᠢᠶᠠᠷ ᠴᠢᠩᠭᠠ ᠣᠷᠢᠶᠠᠵᠤ ᠤᠶᠠᠬᠤ ᠬᠡᠷᠡᠭᠲᠡᠢ᠃ ᠦᠭᠡᠢ ᠪᠣᠯ ᠬᠤᠯᠵᠢᠨ ᠴᠢᠨ᠋ᠸᠠ | ᠢᠳᠡᠭᠰᠡᠨ ᠮᠢᠬᠠ ᠪᠠᠨ ᠪᠦᠬᠦᠨ ᠢ ᠪᠥᠭᠡᠯᠵᠢᠵᠦ ᠭᠠᠷᠭᠠᠭᠠᠳ ᠪᠡᠶᠡ ᠬᠥᠩᠭᠡᠨ ᠢᠶᠠᠷ ᠳᠤᠲᠠᠭᠠᠨ ᠵᠢᠭᠤᠲᠠᠳᠠᠭ᠃ ᠬᠦᠵᠦᠭᠦᠦ ᠪᠠᠨ ᠠᠯᠴᠢᠭᠤᠷ ᠢᠶᠠᠷ ᠪᠣᠭᠤᠪᠠᠯ ᠴᠢᠨ᠋ᠸᠠ | ᠢᠳᠡᠭᠰᠡᠨ ᠮᠢᠬᠠ ᠪᠠᠨ ᠪᠥᠭᠡᠯᠵᠢᠵᠦ ᠴᠢᠳᠠᠬᠤ ᠦᠭᠡᠢ ᠴᠠᠳᠬᠤᠯᠠᠩ ᠤᠴᠢᠷ ᠠᠴᠠ ᠮᠣᠷᠢ ᠲᠠᠢ ᠬᠥᠮᠥᠨ ᠲᠠᠢ ᠠᠮᠠᠷᠬᠠᠨᠨ ᠭᠦᠢᠴᠡᠭᠳᠡᠵᠦ ᠤᠷᠭᠠᠯᠠᠭᠳᠠᠨ ᠴᠢᠷᠴᠦ | ᠠᠯᠠᠭᠳᠠᠳᠠᠭ᠃ | ᠣᠲᠣᠷᠯᠠᠨ ᠨᠡᠭᠦᠳᠡᠯᠯᠡᠵᠦ ᠪᠠᠭᠤᠬᠤ ᠳᠠᠭᠠᠨ ᠵᠤᠨ ᠨᠠᠮᠤᠷ ᠤᠨ ᠤᠯᠠᠷᠢᠯ ᠳᠤ ᠨᠢᠭᠡ ᠪᠠᠭᠤᠴᠠᠨ ᠳᠡᠭᠡᠷᠡ ᠭᠤᠷᠪᠠᠨ ᠭᠠᠷᠠᠭ ᠠᠴᠠ ᠢᠯᠡᠭᠦᠦ ᠰᠠᠭᠤᠳᠠᠭ | ᠦᠭᠡᠢ᠃ ᠨᠡᠭᠦᠵᠦ ᠶᠠᠪᠤᠬᠤ ᠳᠠᠭᠠᠨ ᠮᠠᠯᠲᠠᠭᠰᠠᠨ ᠨᠦᠬᠡ ᠪᠦᠬᠦᠨ ᠢᠶᠠᠨ ᠪᠦᠷ ᠪᠤᠯᠠᠵᠤ ᠲᠠᠯᠪᠢᠳᠠᠭ ᠤᠴᠢᠷ ᠠᠴᠠ ᠣᠷᠴᠢᠨ ᠠᠬᠤᠢ ᠡᠪᠳᠡᠭᠳᠡᠬᠦ ᠦᠭᠡᠢ᠂ ᠭᠤᠷᠪᠠᠨ | ᠭᠠᠷᠠᠭ ᠤᠨ ᠲᠠᠷᠠᠭᠠ ᠲᠠᠬᠢᠨ ᠡᠨᠡ ᠨᠤᠲᠤᠭ ᠳᠡᠭᠡᠷᠡ ᠢᠷᠡᠬᠦ ᠳᠤ ᠡᠷᠡᠭᠦᠯ ᠭᠠᠵᠠᠷ ᠠᠳᠠᠯᠢ ᠡᠪᠡᠰᠦ ᠨᠣᠭᠤᠭᠠ ᠤᠷᠭᠤᠳᠠᠭ ᠪᠢᠯᠡ᠃ |