ᠬᠥᠯᠥᠨ ᠪᠤᠶᠢᠷ ᠤᠨ ᠪᠠᠷᠭᠤᠴᠤᠳ ᠤᠨ ᠮᠠᠯ ᠤᠨ ᠮᠢᠯᠢᠶᠠᠯᠭ᠎ᠠ ᠱᠠᠩᠨᠠᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2024/8/15
          ᠠ᠊᠂ ᠴᠢᠯᠠᠭᠤᠨᠪᠠᠭᠠᠲᠤᠷ          ᠪᠠᠷᠭᠤ ᠪᠣᠯ ᠮᠣᠩᠭᠤᠯ ᠦᠨᠳᠦᠰᠦᠲᠡᠨ ᠤ ᠨᠢᠭᠡᠨ ᠠᠶᠢᠮᠠᠭ ᠶᠠᠰᠣᠲᠠᠨ ᠮᠥᠨ᠃ ᠠᠯᠢ ᠳᠡᠭᠡᠷ᠎ᠡ ᠦᠶ᠎ᠡ ᠠᠴᠠ ᠮᠣᠩᠭᠤᠯ ᠤᠨ ᠬᠠᠨ ᠬᠠᠭᠠᠳ ᠲᠠᠢ ᠣᠷᠤᠭ ᠲᠦᠷᠦᠯ ᠪᠣᠯᠣᠯᠴᠠᠵᠤ᠂ ᠨᠠᠭᠠᠴᠤ ᠶᠢᠨ ᠬᠤᠪᠢ ᠪᠠᠷ ᠥᠷᠭᠡᠨ ᠠᠭᠤᠳᠠᠮ ᠠᠽᠢᠶ᠎ᠠ ᠲᠢᠪ ᠤᠨ ᠡᠯᠢᠭᠡᠨ ᠳᠡᠭᠡᠭᠦᠷ ᠬᠥᠨᠳᠡᠯᠡᠨ ᠭᠤᠯᠳᠤ ᠣᠯᠠᠨ ᠵᠠᠭᠤᠨ ᠵᠢᠯ ᠨᠡᠭᠦᠳᠡᠯᠯᠡᠨ ᠠᠮᠢᠳᠤᠷᠠᠵᠤ ᠢᠷᠡᠭᠰᠡᠨ ᠵᠣᠨ ᠪᠥᠭᠡᠳ ᠲᠡᠭᠡᠬᠦ ᠳᠡᠭᠡᠨ ᠪᠣᠭᠤᠯ ᠬᠠᠮᠵᠢᠯᠭ᠎ᠠ᠂ ᠹᠧᠣᠳᠠᠯ ᠶᠣᠰᠣᠨ ᠳᠤ ᠴᠢᠳᠦᠷᠯᠡᠭᠳᠡᠵᠦ ᠲᠣᠱᠠᠭᠳᠠᠭ᠎ᠠ ᠦᠭᠡᠢ ᠪᠠᠷ ᠳᠡᠷᠭᠡᠳᠡ ᠪᠠᠨ ᠮᠥᠯᠵᠢᠯ ᠦᠭᠡᠢ᠂ ᠳᠡᠭᠡᠷ᠎ᠡ ᠪᠠᠨ ᠳᠠᠷᠤᠯᠠᠯ ᠦᠭᠡᠢ ᠪᠠᠶᠢᠬᠤ ᠶᠢ ᠢᠮᠠᠭᠲᠠ ᠬᠠᠲᠠᠭᠤ ᠪᠠᠷᠢᠮᠲᠠᠯᠠᠵᠤ ᠲᠡᠮᠡᠴᠡᠵᠦ ᠶᠠᠪᠤᠭᠰᠠᠨ ᠶᠠᠰᠣᠲᠠᠨ ᠪᠢᠯᠡ᠃ ᠲᠡᠳᠡ ᠨᠤᠲᠤᠭ ᠰᠡᠯᠭᠦᠨ ᠨᠡᠭᠦᠳᠡᠯᠯᠡᠵᠦ᠂ ᠣᠰᠣᠨ ᠤ ᠲᠤᠩᠭᠠᠯᠠᠭ᠂ ᠡᠪᠡᠰᠦᠨ ᠤ ᠰᠣᠷᠭᠤᠭ ᠢ ᠳᠠᠭᠠᠵᠣ᠂ ᠡᠬᠡ ᠪᠠᠶᠢᠭᠠᠯᠢ ᠶᠢᠨ ᠳᠠᠷᠬᠠᠨ ᠬᠡᠰᠢᠭ ᠢ ᠳᠡᠭᠡᠳᠦᠯᠡᠨ ᠬᠦᠷᠲᠡᠵᠦ᠂ ᠵᠡᠷᠭᠡ ᠬᠡᠷᠬᠡᠮ ᠲᠠᠢ ᠬᠥᠮᠥᠰ ᠢ ᠣᠪᠣᠭᠠᠨ ᠲᠠᠬᠢᠯᠭ᠎ᠠ ᠳᠡᠭᠡᠷ᠎ᠡ ᠡᠩ ᠤᠨ ᠲᠠᠬᠢᠯᠭᠠᠴᠢᠳ ᠲᠠᠢ ᠠᠳᠠᠯᠢᠬᠠᠨ ᠦᠵᠡᠵᠦ᠂ ᠨᠠᠰᠤᠲᠠᠨ ᠲᠣᠮᠣᠭᠠᠲᠠᠨ ᠢᠶᠠᠨ ᠬᠤᠶᠢᠮᠤᠷ ᠲᠤ ᠵᠠᠯᠠᠵᠤ᠂ ᠣᠪᠣᠭᠠᠨ ᠳᠠᠷᠤᠭ᠎ᠠ ᠪᠦᠬᠦᠨ ᠢ ᠰᠢᠢᠳᠴᠦ ᠰᠢᠢᠳᠪᠦᠷᠢᠯᠡᠳᠡᠭ ᠤᠯᠠᠮᠵᠢᠯᠠᠯ ᠲᠠᠢ᠃ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠢ ᠰᠦᠷᠦᠭ ᠢᠶᠠᠷ ᠰᠠᠭᠤᠷᠢ ᠪᠣᠯᠭᠠᠨ ᠮᠠᠯᠵᠢᠬᠤ ᠠᠷᠭ᠎ᠠ ᠶᠢ ᠦᠢᠯᠡᠳᠦᠯᠭᠡᠵᠢᠭᠦᠯᠵᠦ᠂ ᠲᠡᠳᠡᠨ ᠤ ᠣᠨᠴᠠᠯᠢᠭ ᠲᠤᠨᠢ ᠵᠣᠬᠢᠴᠠᠭᠤᠯᠤᠨ ᠪᠡᠯᠴᠢᠭᠡᠷ ᠲᠣᠬᠢᠷᠠᠭᠤᠯᠤᠨ ᠨᠡᠭᠦᠳᠡᠯᠯᠡᠵᠦ᠂ ᠮᠠᠯ ᠨᠢ ᠥᠨᠢᠷ ᠥᠰᠴᠦ᠂ ᠬᠥᠷᠥᠩᠭᠡ ᠪᠠᠷ ᠵᠤᠵᠠᠭᠠᠨ᠂ ᠬᠥᠮᠥᠨ ᠨᠢ ᠮᠥᠰᠦᠯᠢᠭ᠂ ᠨᠦᠮᠵᠢᠭᠲᠡᠢ︽ᠪᠠᠶᠠᠨ ᠪᠠᠷᠭᠤ︾ ᠭᠡᠵᠦ ᠠᠯᠳᠠᠷᠰᠢᠵᠠᠢ᠃          ᠬᠥᠯᠥᠨ ᠪᠤᠶᠢᠷ ᠤᠨ ᠪᠠᠷᠭᠤᠴᠤᠳ᠂ ᠠᠷᠤ ᠨᠤᠲᠤᠭ ᠤᠨ ᠠᠷᠪᠠᠨ ᠲᠦᠮᠡᠨ ᠴᠠᠭᠠᠨ ᠠᠳᠤᠭᠤ᠂ ᠮᠡᠨᠡᠩ ᠤᠨ ᠲᠠᠯ᠎ᠠ ᠶᠢᠨ ᠵᠠᠭᠤᠨ ᠲᠦᠮᠡᠨ ᠴᠠᠭᠠᠨ ᠬᠤᠨᠢ᠂ ᠠᠷᠠᠯ ᠵᠦᠯᠭᠡ ᠶᠢᠨ ᠮᠢᠩᠭ᠎ᠠ ᠮᠢᠩᠭᠠᠨ ᠤᠯᠠᠭᠠᠨ ᠪᠤᠶᠤ ᠴᠠᠭᠠᠨ ᠡᠷᠢᠶᠡᠨ ᠦᠬᠡᠷ ᠲᠠᠢ ᠭᠡᠵᠦ ᠳᠡᠭᠡᠷ᠎ᠡ ᠵᠠᠭᠤᠨ ᠳᠤ ᠠᠯᠳᠠᠷᠰᠢᠵᠤ ᠪᠠᠶᠢᠭᠰᠠᠨ ᠨᠢ ᠡᠪᠦᠭᠡ ᠳᠡᠭᠡᠳᠦᠰ ᠤᠨ ᠢᠶᠠᠨ ᠣᠯᠠᠨ ᠵᠠᠭᠤᠨ  ᠤ ᠲᠤᠷᠰᠢ︽ᠪᠠᠶᠠᠨ ᠪᠠᠷᠭᠤ︾ ᠬᠡᠮᠡᠨ ᠳᠠᠭᠤᠳᠠᠭᠳᠠᠵᠤ ᠢᠷᠡᠭᠰᠡᠨ ᠥᠪ ᠲᠡᠦᠬᠡ ᠶᠢ ᠤᠯᠠᠮᠵᠢᠯᠠᠨ ᠬᠠᠳᠠᠭᠠᠯᠠᠭᠰᠠᠭᠠᠷ ᠢᠷᠡᠭᠰᠡᠨ ᠢ ᠬᠠᠷᠠᠭᠤᠯᠵᠤ ᠪᠠᠶᠢᠭ᠎ᠠ ᠶᠤᠮ᠃ ᠥᠩᠭᠡᠷᠡᠭᠰᠡᠨ ᠳᠤ ᠬᠥᠯᠥᠨ ᠪᠤᠶᠢᠷ ᠤᠨ ᠪᠠᠷᠭᠤᠴᠤᠳ ᠲᠤ︽ᠱᠥᠯᠥᠨ ᠤ ᠬᠤᠨᠢ᠂ ᠴᠢᠳᠦᠷ  ᠤᠨ ᠮᠣᠷᠢ︾ ᠦᠭᠡᠢ ᠠᠶᠢᠯ ᠭᠡᠵᠦ ᠮᠠᠰᠢ ᠬᠤᠪᠣᠷ᠃ ᠬᠠᠷᠢᠨ︽ᠬᠢᠲᠤᠭᠠᠨ ᠤ ᠢᠷ ᠲᠤ ᠭᠦᠢᠴᠡᠭᠳᠡᠬᠦ ᠦᠭᠡᠢ︾ ᠬᠤᠨᠢ ᠲᠠᠢ ᠠᠶᠢᠯ ᠵᠠᠬ᠎ᠠ ᠠᠴᠠ ᠪᠠᠨ ᠠᠪᠤᠭᠠᠳ ᠵᠥᠩᠳᠡᠭᠡᠨ ᠪᠠᠶᠢᠵᠠᠢ᠃ ᠭᠡᠪᠡᠴᠦ ᠡᠨᠡ ᠨᠢ ᠲᠡᠶᠢᠮᠦ ᠬᠥᠷᠥᠩᠭᠡ ᠴᠢᠨᠡᠭᠡᠯᠢᠭ ᠪᠢᠰᠢ᠂ ᠵᠦᠪᠬᠡᠨ150︱200 ᠣᠷᠴᠢᠮ ᠬᠤᠨᠢ ᠲᠠᠢ ᠠᠶᠢᠯ ᠤᠨ ᠪᠠᠷᠢᠮᠵᠢᠶ᠎ᠠ ᠠᠵᠢ᠃ ᠵᠢᠱᠢᠶ᠎ᠡ ᠨᠢ᠄︽ᠵᠣᠨ ᠤ ᠵᠤᠳ ᠦᠭᠡᠢ ᠪᠣᠯᠣᠯ᠎ᠠ︾ ᠭᠡᠪᠡᠯ ᠵᠢᠯ ᠳᠤ ᠲᠠᠪᠤᠨ ᠦᠨᠢᠶ᠎ᠡ ᠲᠤᠭᠤᠯᠯᠠᠭᠤᠯᠵᠤ ᠪᠠᠶᠢᠭ᠎ᠠ ᠶᠢ ᠬᠡᠯᠡᠨ᠎ᠡ︔︽ᠲᠠᠷᠠᠭ ᠤᠨ ᠲᠠᠪᠤᠨ ᠦᠨᠢᠶ᠎ᠡ ᠪᠠᠷ ᠳᠤᠲᠠᠬᠤ ᠦᠭᠡᠢ︾ ᠭᠡᠪᠡᠯ ᠵᠢᠯ ᠪᠦᠷᠢ ᠲᠠᠪᠤ ᠠᠴᠠ ᠳᠡᠭᠡᠭᠰᠢ ᠦᠨᠢᠶ᠎ᠡ ᠲᠤᠭᠤᠯᠯᠠᠭᠤᠯᠬᠤ ᠰᠦᠷᠦᠭ ᠦᠬᠡᠷ ᠲᠠᠢ ᠪᠣᠯᠤᠭᠰᠠᠨ ᠢ ᠵᠢᠭᠠᠨ᠎ᠠ︔︽ᠬᠥᠯ ᠳᠡᠭᠦᠵᠢᠯᠡᠬᠦ ᠤᠨᠤᠯᠭ᠎ᠠ ᠲᠠᠢ︾ ᠭᠡᠳᠡᠭ ᠨᠢ ᠨᠢᠭᠡ ᠠᠵᠢᠷᠭ᠎ᠠ ᠠᠳᠤᠭᠤ ᠲᠠᠢ ᠪᠣᠯᠤᠭᠰᠠᠨ ᠢ ᠬᠡᠯᠡᠨ᠎ᠡ︔︽ᠬᠤᠷᠢᠶᠠᠬᠤ ᠲᠡᠮᠡᠭᠡ ᠲᠠᠢ︾ ᠭᠡᠪᠡᠯ ᠠᠷᠪᠠᠭᠠᠳ ᠲᠡᠮᠡᠭᠡ ᠲᠠᠢ ᠪᠣᠯᠵᠤ᠂ ︽ᠲᠡᠮᠡᠭᠡᠨ ᠰᠦᠷᠦᠭ ᠲᠠᠢ︾ ᠭᠡᠪᠡᠯ ᠪᠤᠤᠷ᠎ᠠ ᠲᠠᠯᠪᠢᠬᠤ ᠲᠣᠭᠠᠨ ᠤ ᠲᠡᠮᠡᠭᠡ ᠲᠠᠢ ᠶᠢ ᠬᠡᠯᠡᠬᠦ ᠶᠤᠮ᠃ ᠲᠣᠯᠣᠭᠠᠨ ᠬᠤᠨᠢ ᠲᠠᠢ ᠪᠠᠶᠢᠭᠰᠠᠨ ᠠᠴᠠ ᠪᠠᠨ ᠲᠦᠮᠡᠨ ᠬᠤᠨᠢ ᠲᠠᠢ ᠪᠣᠯᠤᠭᠰᠠᠨ ᠦᠨᠡᠨ ᠲᠣᠮᠤᠭ ᠴᠦ ᠪᠣᠢ᠃ ᠥᠭᠡᠷ᠎ᠡ ᠪᠠᠷ ᠬᠡᠯᠡᠪᠡᠯ ᠡᠳᠡᠭᠡᠷ ᠪᠠᠷᠢᠮᠵᠢᠶ᠎ᠠ ᠳᠤ ᠬᠦᠷᠬᠦ ᠦᠭᠡᠢ ᠪᠣᠯ ᠮᠠᠯ ᠰᠦᠷᠦᠭ ᠲᠠᠢ ᠳᠤ ᠲᠣᠭᠠᠴᠠᠭᠳᠠᠬᠤ ᠦᠭᠡᠢ ᠪᠠᠶᠢᠵᠠᠢ᠃          ᠬᠥᠯᠥᠨ ᠪᠤᠶᠢᠷ ᠤᠨ ᠪᠠᠷᠭᠤᠴᠤᠳ ᠮᠠᠯ ᠰᠦᠷᠦᠭ ᠢᠶᠠᠷ ᠡᠶᠢᠮᠦ ᠪᠠᠶᠠᠨ ᠪᠣᠯᠬᠤᠷ ᠬᠤᠨᠢ︽ᠵᠠᠭᠤ ᠬᠦᠷᠪᠡᠯ ᠬᠢᠲᠤᠭᠠᠨ ᠤ ᠢᠷ ᠲᠤ ᠭᠦᠢᠴᠡᠭᠳᠡᠬᠦ ᠦᠭᠡᠢ︾᠂ ︽ᠮᠢᠩᠭ᠎ᠠ ᠬᠦᠷᠪᠡᠯ ᠰᠦᠬᠡ ᠶᠢᠨ ᠲᠣᠬᠤᠨ ᠳᠤ ᠢᠪᠡᠷᠡᠬᠦ ᠪᠠᠨ ᠪᠣᠯᠢᠨ᠎ᠠ︾᠂ ︽ᠲᠦᠮᠡ ᠬᠦᠷᠪᠡᠯ ᠠᠷᠢᠶᠠᠲᠠᠨ ᠤ ᠰᠣᠶᠣᠭᠠᠨ ᠳᠤ ᠬᠡᠥᠯᠡᠭᠳᠡᠬᠦ ᠪᠠᠨ ᠪᠣᠯᠢᠵᠤ︾᠂ ︽ᠪᠤᠮ ᠬᠦᠷᠪᠡᠯ ᠲᠦᠷᠦ  ᠶᠢᠨ ᠵᠠᠪᠠᠵᠢ ᠶᠢ ᠳᠠᠭᠠᠭᠠᠨ᠎ᠠ︾ ᠭᠡᠳᠡᠭ ᠪᠤᠶᠤ︽ᠵᠠᠩᠭᠢ ᠭᠡᠭᠴᠢ ᠭᠡᠭᠦᠦ ᠶᠢᠨ ᠭᠡᠳᠡᠰᠦᠨ ᠳᠤ ᠪᠠᠶᠢᠨ᠎ᠠ︾ ᠭᠡᠬᠦ ᠮᠡᠲᠦ ᠶᠢᠨ ᠠᠷᠠᠳ ᠤᠨ ᠬᠠᠭᠤᠴᠢ ᠬᠡᠯᠡᠯᠭᠡ ᠲᠠᠢ ᠪᠠᠶᠢᠳᠠᠭ ᠶᠤᠮ᠃          ᠲᠠᠯ᠎ᠠ ᠬᠡᠭᠡᠷ᠎ᠡ ᠶᠢᠨ ᠨᠡᠭᠦᠳᠡᠯᠴᠢᠨ ᠠᠶᠢᠮᠠᠭ ᠤᠳ ᠲᠡᠭᠷᠢ ᠣᠭᠲᠠᠷᠭᠤᠢ ᠶᠢᠨ ᠬᠦᠴᠦ ᠨᠥᠯᠥᠭᠡ ᠶᠢ ᠣᠨᠴᠠᠭᠠᠢ ᠮᠡᠳᠡᠷᠡᠳᠡᠭ ᠲᠠᠢ ᠠᠳᠠᠯᠢ᠂ ᠪᠠᠷᠭᠤᠴᠤᠳ ᠠᠯᠢᠪᠠ ᠢᠳᠡᠭᠡ ᠤᠮᠳᠠᠭᠠᠨ᠂ ᠮᠠᠯ ᠰᠦᠷᠦᠭ ᠢᠶᠠᠨ ᠪᠦᠷ ᠪᠠᠶᠢᠭᠠᠯᠢ ᠳᠡᠯᠡᠬᠡᠢ᠂ ᠤᠷᠭᠤᠮᠠᠯ ᠠᠮᠢᠲᠠᠨ ᠠᠴᠠ ᠡᠭᠦᠳᠳᠡᠭ᠂ ᠪᠦᠷ ᠯᠠ ᠡᠬᠡ ᠪᠠᠶᠢᠭᠠᠯᠢ ᠶᠢᠨ ᠪᠤᠶᠠᠨ ᠬᠡᠰᠢᠭ ᠬᠡᠮᠡᠨ ᠦᠵᠡᠵᠡᠭᠡᠵᠦ᠂ ᠢᠳᠡᠭᠡ ᠤᠮᠳᠠᠭᠠᠨ ᠤ ᠳᠡᠭᠡᠵᠢ᠂ ᠮᠠᠯ ᠰᠦᠷᠦᠭ ᠤᠨ ᠰᠣᠷ ᠢ ᠬᠠᠩᠭᠠᠢ ᠳᠡᠯᠡᠬᠡᠢ ᠎ ᠳᠡᠭᠡᠨ ᠨᠡᠷ᠎ᠡ ᠵᠢᠭᠠᠵᠤ ᠡᠷᠭᠦᠬᠦ ᠶᠣᠰᠣ ᠵᠠᠩᠰᠢᠯ ᠢ ᠡᠷᠲᠡ ᠳᠡᠭᠡᠳᠦᠰ ᠠᠴᠠ ᠤᠯᠠᠮᠵᠢᠯᠠᠨ ᠢᠷᠡᠵᠡᠢ᠃ ᠡᠨᠡ ᠨᠢ ᠰᠠᠪᠠ ᠰᠢᠮ᠎ᠡ ᠶᠢᠨ ᠶᠢᠷᠲᠢᠨᠴᠦ ᠶᠢᠨ ᠬᠠᠤᠯᠢ ᠶᠢᠨ ᠦᠢᠯᠡᠴᠢᠯᠡᠯ ᠢ ᠠᠵᠢᠯ ᠠᠮᠢᠳᠤᠷᠠᠯ ᠳᠠᠭᠠᠨ ᠵᠥᠪ ᠲᠤᠰᠬᠠᠨ ᠠᠪᠴᠤ᠂ ᠡᠷᠴᠢᠮᠲᠦ ᠴᠢᠨᠠᠷ ᠢ ᠨᠢ ᠤᠯᠠᠮ ᠨᠠᠷᠢᠨ ᠮᠡᠳᠡᠷᠡᠬᠦ ᠣᠯᠠᠨ ᠵᠠᠩ ᠦᠢᠯᠡ ᠶᠢ ᠵᠣᠬᠢᠶᠠᠮᠵᠢᠯᠠᠨ ᠬᠡᠪᠰᠢᠭᠦᠯᠦᠭᠰᠡᠨ ᠪᠠᠶᠢᠨ᠎ᠠ᠃ ᠲᠡᠭᠦᠨ ᠤ ᠨᠢᠭᠡ  ᠶᠢ ᠪᠣᠳᠠᠲᠠᠢ ᠳᠤᠷᠠᠳᠪᠠᠯ᠂ ᠪᠠᠷᠭᠤᠴᠤᠳ ᠤᠨ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠤᠨ ᠮᠢᠯᠢᠶᠠᠯᠭ᠎ᠠ ᠱᠠᠩᠨᠠᠯ ᠪᠣᠯᠣᠨ᠎ᠠ᠃          ᠪᠠᠷᠭᠤᠴᠤᠳ᠂ ᠮᠠᠯ ᠢ ᠪᠠᠶᠢᠭᠠᠯᠢ ᠳᠡᠯᠡᠬᠡᠢ ᠶᠢᠨ ᠣᠳᠣ ᠭᠠᠷᠠᠭ ᠡᠷᠬᠡᠰ ᠤᠨ ᠦᠢᠯᠡ ᠬᠥᠳᠡᠯᠭᠡᠭᠡᠨ ᠲᠠᠢ ᠬᠤᠯᠪᠣᠨ ᠰᠡᠳᠬᠢᠵᠦ᠂ ᠰᠠᠷ᠎ᠠ᠂ ᠡᠳᠦᠷ᠂ ᠴᠠᠭ ᠤᠨ ᠰᠠᠶᠢᠨ ᠮᠠᠭᠤ ᠶᠢ ᠰᠢᠨᠵᠢᠵᠦ᠂ ᠮᠠᠯ ᠳᠠᠭᠠᠨ ᠬᠡᠶᠢᠮᠣᠷᠢ ᠶᠢᠨ ᠰᠠᠩ᠂ ᠪᠤᠶᠠᠨ ᠬᠡᠰᠢᠭ ᠤᠨ ᠳᠠᠯᠠᠯᠭ᠎ᠠ ᠠᠪᠤᠭᠤᠯᠳᠠᠭ ᠵᠠᠩ ᠳᠠᠳᠬᠠᠯ ᠲᠠᠢ ᠪᠢᠯᠡ᠃ ᠡᠨᠡ ᠨᠢ ᠵᠦᠪᠬᠡᠨ ᠨᠡᠭᠦᠳᠡᠯᠴᠢᠨ ᠮᠣᠩᠭᠤᠯᠴᠤᠳ ᠲᠤ ᠯᠠ ᠪᠠᠶᠢᠳᠠᠭ ᠥᠪᠡᠷᠮᠢᠴᠡ ᠣᠨᠴᠠᠯᠢᠭ ᠲᠠᠢ ᠮᠠᠯᠵᠢᠬᠤ ᠰᠣᠶᠣᠯ ᠪᠣᠯᠣᠨ᠎ᠠ᠃          ᠪᠠᠷᠭᠤᠴᠤᠳ ᠣᠯᠠᠨ ᠵᠠᠭᠤᠨ ᠮᠢᠩᠭᠠᠨ ᠵᠢᠯ ᠡᠳ᠋ᠯᠡᠵᠦ ᠢᠷᠡᠭᠰᠡᠨ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠢᠶᠠᠨ ᠲᠡᠭᠷᠢ ᠭᠠᠵᠠᠷ ᠤᠨ ᠬᠡᠰᠢᠭ ᠪᠤᠶᠠᠨ ᠬᠡᠮᠡᠨ ᠮᠠᠰᠢ ᠬᠦᠨᠳᠦᠳᠬᠡᠨ ᠵᠣᠬᠢᠬᠤ ᠲᠤᠭ᠎ᠠ ᠬᠡᠮᠵᠢᠶᠡᠨ ᠎ ᠳᠤ ᠬᠦᠷᠭᠡᠪᠡᠯ᠂ ᠮᠠᠯ ᠳᠠᠭᠠᠨ ᠶᠡᠭᠡ ᠨᠠᠶᠢᠷ ᠬᠢᠵᠦ᠂ ᠶᠠᠮᠠᠷ ᠨᠢᠭᠡᠨ ᠨᠠᠨᠳᠢᠨ ᠡᠳ᠋ ᠡᠳ᠋ᠯᠡᠯ ᠢᠶᠠᠷ ᠲᠤᠷᠠᠰᠬᠠᠨ ᠲᠡᠮᠳᠡᠭᠯᠡᠵᠦ᠂ ᠮᠠᠯ ᠤᠨ ᠬᠡᠰᠢᠭ ᠪᠤᠶᠠᠨ  ᠢ ᠬᠤᠷᠤᠶᠢᠯᠠᠳᠠᠭ ᠤᠯᠠᠮᠵᠢᠯᠠᠯᠲᠤ ᠵᠠᠩᠰᠢᠯ ᠲᠠᠢ ᠪᠠᠶᠢᠳᠠᠭ᠃ ᠪᠣᠳᠠᠲᠠᠢ ᠳᠤᠷᠠᠳᠪᠠᠯ᠂ ᠢᠮᠠᠭ᠎ᠠ ᠮᠢᠩᠭ᠎ᠠ ᠬᠦᠷᠪᠡᠯ︽ᠽᠠᠨᠳᠠᠨ ᠱᠠᠲᠤ︾᠂ ᠬᠤᠨᠢ ᠲᠦᠮᠡ ᠬᠦᠷᠪᠡᠯ︽ᠳᠠᠯᠠᠯᠭ᠎ᠠ ᠶᠢᠨ ᠲᠡᠪᠰᠢ︾︵ᠮᠥᠩᠭᠦᠨ ᠡᠳ᠋ᠯᠡᠯ ᠪᠤᠶᠤ ᠦᠨᠡᠲᠡᠢ ᠮᠣᠳᠣᠨ ᠤ ᠦᠨᠳᠦᠰᠦ ᠪᠠᠷ ᠬᠢᠭᠰᠡᠨ︶᠂ ᠠᠳᠤᠭᠤ ᠲᠦᠮᠡ ᠬᠦᠷᠪᠡᠯ︽ᠮᠢᠨᠳᠠᠰᠤᠨ ᠬᠤᠶᠢᠪᠢ︾᠂ ᠲᠡᠮᠡᠭᠡ ᠲᠠᠪᠤᠨ ᠵᠠᠭᠤ ᠬᠦᠷᠪᠡᠯ︽ᠮᠥᠩᠭᠦᠨ ᠪᠤᠶᠢᠯᠠ︾᠂ ᠦᠬᠡᠷ ᠮᠢᠩᠭ᠎ᠠ ᠬᠦᠷᠪᠡᠯ︽ᠭᠠᠩ ᠲᠤᠯᠭ᠎ᠠ︾᠎ ᠪᠠᠷ ᠱᠠᠩᠨᠠᠳᠠᠭ ᠪᠢᠯᠡ᠃          ᠪᠠᠷᠭᠤᠴᠤᠳ ᠶᠡᠷᠦ ᠨᠢ ᠬᠡᠨ ᠤ ᠬᠢᠨ︽ᠽᠠᠨᠳᠠᠨ ᠱᠠᠲᠤ︾᠂ ︽ᠮᠥᠩᠭᠦᠨ ᠪᠤᠶᠢᠯᠠ︾᠂ ︽ᠮᠥᠩᠭᠦᠨ ᠲᠡᠪᠰᠢ︾᠂ ︽ᠮᠢᠨᠳᠠᠰᠤᠨ ᠬᠤᠶᠢᠪᠢ︾᠂ ︽ᠭᠠᠩ ᠲᠤᠯᠭ᠎ᠠ︾᠎ ᠲᠠᠢ ᠭᠡᠪᠡᠯ ᠬᠢᠷᠢ ᠵᠡᠷᠭᠡ ᠶᠢᠨ ᠮᠠᠯ ᠬᠥᠷᠥᠩᠭᠡ ᠲᠠᠢ᠂ ᠶᠠᠮᠠᠷ ᠳᠡᠰ ᠤᠨ ᠱᠠᠩᠨᠠᠯ ᠭᠥᠷᠳᠡᠭᠰᠡᠨ ᠳᠡᠭᠡᠳᠦ ᠵᠢᠩᠲᠠᠭᠠᠨ ᠤ ᠠᠶᠢᠯ ᠪᠣᠯᠬᠤ ᠶᠢ ᠮᠡᠳᠡᠴᠢᠬᠡᠳᠡᠭ᠃ ᠡᠨᠡ ᠨᠢ ᠮᠠᠯᠴᠢᠨ ᠬᠥᠮᠥᠨ ᠤ ᠨᠢᠭᠡ ᠨᠠᠰᠣᠨ ᠤ ᠬᠢᠨᠢ ᠳᠡᠭᠡᠳᠦ ᠢᠷᠠᠭᠤ ᠠᠯᠳᠠᠷ ᠪᠣᠯᠳᠠᠭ ᠢᠶᠠᠷ ᠪᠠᠷᠠᠬᠤ ᠦᠭᠡᠢ᠂ ᠦᠶ᠎ᠡ ᠤᠳᠤᠮ  ᠤᠨ ᠢᠶᠠᠨ ᠥᠩᠭᠡ ᠭᠡᠷᠡᠯ ᠪᠣᠯᠳᠠᠭ ᠪᠠᠶᠢᠨ᠎ᠠ᠃          ᠰᠠᠪᠠ ᠰᠢᠮ᠎ᠡ ᠶᠢᠨ ᠶᠢᠷᠲᠢᠨᠴᠦ ᠶᠢᠨ ᠬᠤᠭᠤᠰᠤᠨ ᠤ ᠮᠥᠨ ᠴᠢᠨᠠᠷ ᠢ ᠲᠠᠨᠢᠨ ᠮᠡᠳᠡᠵᠦ᠂ ᠲᠡᠭᠦᠨ ᠠᠴᠠ ᠬᠥᠮᠥᠨ ᠳᠤ ᠨᠥᠯᠥᠭᠡᠯᠡᠬᠦ ᠰᠥᠭᠡᠷᠭᠦ ᠡᠨᠧᠷᠭᠢ ᠶᠢ ᠢᠯᠭᠠᠷᠠᠭᠤᠯᠬᠤ ᠠᠷᠭ᠎ᠠ ᠳᠣᠮ ᠰᠢᠪᠰᠢᠯᠭᠡ ᠨᠢ ᠦᠢᠯᠡᠳᠦᠯ᠂ ᠳᠦᠷᠰᠦ ᠪᠡᠯᠭᠡᠳᠡᠯ ᠦᠭᠡ ᠎ ᠪᠠᠷ ᠢᠯᠡᠷᠬᠡᠶᠢᠯᠡᠬᠦ ᠭᠤᠷᠪᠠᠨ ᠬᠡᠯᠪᠡᠷᠢ ᠪᠠᠶᠢᠳᠠᠭ ᠪᠣᠯ ᠲᠡᠭᠦᠨ ᠠᠴᠠ ᠳᠤᠲᠠᠬᠤ ᠦᠭᠡᠢ ᠠᠴᠢ ᠬᠤᠯᠪᠣᠭᠳᠠᠯ ᠲᠠᠢ ᠵᠠᠩ ᠦᠢᠯᠡ ᠪᠣᠯ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠢ ᠰᠡᠲᠡᠷᠯᠡᠬᠦ ᠶᠠᠪᠤᠳᠠᠯ ᠶᠤᠮ᠃ ᠬᠤᠲᠠᠨ ᠳᠠᠭᠠᠨ ᠲᠠᠯᠪᠢᠭᠰᠠᠨ ᠱᠠᠲᠤᠨ ᠳᠡᠭᠡᠷ᠎ᠡ ᠬᠠᠮᠤᠭ ᠤᠨ ᠲᠡᠷᠢᠭᠦᠨ ᠳᠤ ᠠᠪᠠᠷᠢᠨ ᠭᠠᠷᠤᠭᠰᠠᠨ ᠢᠮᠠᠭ᠎ᠠ ᠪᠠᠨ ᠰᠡᠲᠡᠷᠯᠡᠬᠦ ᠵᠡᠷᠭᠡ ᠨᠢ ᠰᠠᠪᠠ ᠰᠢᠮ᠎ᠡ ᠶᠢᠨ ᠶᠢᠷᠲᠢᠨᠴᠦ ᠶᠢᠨ ᠮᠥᠨ ᠴᠢᠨᠠᠷ ᠢ ᠤᠬᠠᠭᠠᠷᠠᠨ ᠲᠠᠨᠢᠵᠤ᠂ ᠠᠬᠤᠢ ᠎ ᠶᠢᠨ ᠰᠡᠳᠬᠢᠯᠭᠡᠨ ᠳᠡᠭᠡᠨ ᠴᠢᠳᠠᠪᠤᠷᠢᠯᠢᠭ ᠠᠰᠢᠭᠯᠠᠵᠤ ᠢᠷᠡᠭᠰᠡᠨ ᠤ ᠭᠠᠶᠢᠬᠠᠮᠰᠢᠭᠲᠤ ᠦᠢᠯᠡ ᠠᠵᠢᠯᠯᠠᠭ᠎ᠠ ᠭᠡᠪᠡᠯ ᠵᠣᠬᠢᠨ᠎ᠠ᠃ ᠡᠨᠡ ᠬᠦ ᠵᠠᠩ ᠦᠢᠯᠡ  ᠪᠠᠨ ᠥᠷᠭᠡᠨ ᠳᠡᠯᠭᠡᠷ ᠬᠢᠵᠦ᠂ ᠬᠦᠰᠡᠯ ᠮᠥᠷᠥᠭᠡᠳᠦᠯ ᠢᠶᠠᠨ ᠳᠠᠭᠠᠳᠬᠠᠨ ᠬᠡᠯᠡᠵᠦ᠂ ᠶᠣᠰᠣ ᠲᠦᠷᠦ ᠲᠠᠢ ᠦᠢᠯᠡᠳᠳᠡᠭ ᠨᠢ ᠲᠡᠭᠷᠢ ᠦᠵᠡᠯ ᠎ ᠤᠨ ᠭᠠᠶᠢᠬᠠᠮᠰᠢᠭᠲᠤ ᠮᠡᠳᠡᠷᠡᠮᠵᠢ ᠪᠣᠯᠬᠤ ᠶᠤᠮ᠃ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠳᠠᠭᠠᠨ ᠬᠤᠪᠢᠯᠬᠤᠢ ᠶᠢᠨ ᠮᠥᠨ ᠴᠢᠨᠠᠷ ᠢ ᠥᠪᠡᠷᠲᠡᠭᠡᠨ ᠰᠢᠩᠭᠡᠭᠡᠭᠰᠡ ᠴᠠᠭᠠᠨ ᠰᠦ ᠠᠶᠢᠷᠠᠭ ᠢᠶᠠᠷ ᠲᠡᠭᠷᠢ ᠳᠤ ᠰᠠᠴᠤᠯᠢ ᠡᠷᠭᠦᠵᠦ ᠰᠡᠲᠡᠷᠯᠡᠭᠰᠡᠨ ᠮᠠᠯ ᠢᠶᠠᠨ ᠮᠢᠯᠢᠶᠠᠳᠠᠭ ᠨᠢ ᠮᠥᠨ ᠴᠦ ᠨᠡᠭᠦᠳᠡᠯᠴᠢᠨ ᠲᠦᠮᠡᠨ ᠤ ᠭᠠᠶᠢᠬᠠᠮᠰᠢᠭᠲᠤ ᠵᠠᠩ ᠦᠢᠯᠡ ᠪᠣᠯᠬᠤ ᠶᠤᠮ᠃ ᠡᠨᠡ ᠨᠢ ᠪᠠᠷᠭᠤᠴᠤᠳ ᠬᠤᠷᠸ᠎ᠠ ᠶᠢᠨ ᠠᠯᠢᠪᠠ ᠶᠠᠭᠤᠮᠠᠰ ᠦᠵᠡᠭᠳᠡᠯ ᠤᠨ ᠰᠢᠲᠦᠨ ᠪᠠᠷᠢᠯᠳᠤᠬᠤᠢ ᠶᠢᠨ ᠤᠬᠠᠭᠠᠨ ᠎ ᠢ ᠡᠷᠲᠡᠨ ᠠᠴᠠ ᠡᠷᠢᠵᠦ ᠪᠠᠶᠢᠭᠠᠯᠢ ᠳᠡᠯᠡᠬᠡᠢ ᠲᠠᠢ ᠪᠠᠨ ᠵᠣᠬᠢᠰᠲᠠᠢ ᠬᠠᠷᠢᠯᠴᠠᠨ ᠠᠮᠢᠳᠤᠷᠠᠵᠤ ᠢᠷᠡᠭᠰᠡᠨ ᠤᠬᠠᠭᠠᠨᠲᠤ ᠠᠷᠠᠳ ᠲᠦᠮᠡᠨ ᠭᠡᠳᠡᠭ ᠢ ᠬᠠᠷᠠᠭᠤᠯᠵᠤ ᠪᠠᠶᠢᠭ᠎ᠠ ᠶᠤᠮ᠃          ᠢᠮᠠᠭ᠎ᠠ ᠪᠣᠯ ᠴᠣᠪᠣᠭᠤ ᠰᠡᠷᠭᠦᠯᠡᠩ ᠰᠣᠨᠢᠭᠤᠴᠢ᠂ ᠠᠯᠢᠪᠠ ᠶᠠᠭᠤᠮᠠᠨ ᠳᠤ ᠠᠪᠠᠷᠢᠵᠤ ᠭᠠᠷᠬᠤ᠂ ᠬᠠᠳᠠ ᠠᠭᠤᠯᠠ ᠮᠣᠳᠣ ᠳᠠᠮᠵᠢᠨ ᠲᠣᠭᠯᠠᠵᠤ ᠨᠠᠭᠠᠳᠬᠤ ᠳᠤᠷᠠᠲᠠᠢ ᠦᠷᠡᠵᠢᠯ ᠰᠠᠶᠢᠲᠠᠢ ᠮᠠᠯ ᠪᠣᠯᠣᠨ᠎ᠠ᠃ ᠭᠡᠪᠡᠴᠦ ᠬᠦᠢᠲᠡᠨ ᠬᠤᠰᠢᠭᠤ ᠲᠠᠢ ᠮᠠᠯ ᠭᠡᠵᠦ ᠦᠵᠡᠳᠡᠭ ᠠᠴᠠ ᠲᠠᠯᠠᠯᠭ᠎ᠠ ᠶᠢᠨ ᠲᠡᠪᠰᠢ ᠪᠠᠷ ᠬᠥᠬᠢᠭᠦᠯᠵᠦ ᠱᠠᠩᠨᠠᠭᠳᠠᠳᠠᠭ ᠦᠭᠡᠢ᠂ ᠬᠠᠷᠢᠨ ᠥᠪᠡᠷ ᠤᠨ ᠬᠢᠨᠢ ᠲᠥᠷᠥᠯᠬᠢ ᠣᠨᠴᠠᠯᠢᠭ ᠎ ᠲᠤᠨᠢ ᠵᠣᠬᠢᠴᠠᠭᠤᠯᠵᠤ᠂ ᠱᠠᠲᠤ ᠪᠣᠰᠬᠠᠨ ᠨᠠᠭᠠᠳᠤᠭᠤᠯᠵᠤ ᠥᠨᠢᠷ ᠥᠰᠬᠡᠬᠦ ᠶᠢ ᠪᠡᠯᠭᠡᠳᠡᠳᠡᠭ᠃         ᠬᠤᠨᠢ ᠪᠣᠯ ᠪᠡᠯᠴᠢᠭᠡᠷ ᠤᠨ800 ᠲᠦᠷᠦᠯ ᠤᠨ ᠤᠷᠭᠤᠮᠠᠯ ᠠᠴᠠ520 ᠲᠦᠷᠦᠯ ᠢ ᠢᠳᠡᠵᠦ᠂ ᠪᠠᠶᠢᠭᠠᠯᠢ ᠴᠠᠭ ᠠᠭᠤᠷ  ᠤᠨ ᠶᠠᠩᠵᠤ ᠪᠦᠷᠢ ᠶᠢᠨ ᠪᠦᠰᠡ ᠨᠤᠲᠤᠭ ᠲᠤ ᠢᠳᠡᠭᠡᠰᠢᠨ ᠠᠮᠢᠳᠤᠷᠠᠵᠤ ᠴᠢᠳᠠᠳᠠᠭ᠃ ᠬᠤᠷᠳᠤᠨ ᠦᠰᠦᠯᠲᠡᠲᠡᠢ ᠲᠦᠯᠦᠷᠬᠡᠭ᠂ ᠨᠣᠮᠣᠢ ᠳᠥᠯᠭᠡᠨ ᠵᠠᠩ ᠲᠠᠢ᠂ ᠣᠯᠠᠨ ᠪᠣᠯᠬᠤ ᠲᠣᠲᠣᠮ ᠲᠠᠶᠢᠪᠤᠩ ᠠᠮᠤᠭᠤᠯᠠᠩ ᠪᠣᠯᠳᠠᠭ ᠣᠨᠴᠠᠯᠢᠭ ᠲᠠᠢ᠃ ᠠᠮᠢᠳᠤᠷᠠᠯ ᠦᠢᠯᠡᠳᠪᠦᠷᠢᠯᠡᠯ ᠤᠨ ᠭᠤᠣᠯ ᠪᠥᠭᠡᠳ ᠥᠷᠭᠡᠨ ᠬᠡᠷᠡᠭᠴᠡᠭᠡ ᠶᠢ ᠬᠠᠩᠭᠠᠳᠠᠭ ᠲᠤᠯᠠ ᠲᠠᠯᠠᠯᠭ᠎ᠠ ᠶᠢᠨ ᠲᠡᠪᠰᠢ ᠪᠠᠷ ᠮᠢᠯᠢᠶᠠᠨ ᠱᠠᠩᠨᠠᠳᠠᠭ ᠨᠢ ᠤᠴᠢᠷᠲᠠᠢ᠃ ᠬᠥᠯᠥᠨ ᠪᠤᠶᠢᠷ  ᠤᠨ ᠪᠠᠷᠭᠤᠴᠤᠳ︽ᠬᠤᠨ ᠴᠠᠩᠬᠢᠷ ᠬᠤᠨᠢ ᠪᠠᠨ ᠬᠤᠷᠮᠣᠰᠲᠠ ᠲᠡᠭᠷᠢ ᠳᠤ ᠰᠡᠲᠡᠷᠯᠡᠳᠡᠭ᠂ ᠭᠦᠨ ᠤᠯᠠᠭᠠᠨ ᠢᠮᠠᠭ᠎ᠠ ᠪᠠᠨ ᠭᠠᠯ ᠳᠠᠭᠠᠨ ᠰᠡᠲᠡᠷᠯᠡᠳᠡᠭ︾ ᠭᠡᠳᠡᠭ ᠬᠡᠯᠡᠯᠭᠡ ᠪᠠᠶᠢᠳᠠᠭ᠃          ᠦᠬᠡᠷ ᠢ ᠭᠤᠣᠯᠳᠠᠭᠤ ᠮᠢᠬ᠎ᠠ ᠰᠦᠨ ᠤ ᠬᠡᠷᠡᠭᠴᠡᠭᠡ ᠪᠠᠨ ᠬᠠᠩᠭᠠᠵᠤ᠂ ᠬᠥᠰᠬᠡ ᠲᠡᠷᠭᠡᠨ ᠳᠤ ᠠᠰᠢᠭᠯᠠᠬᠤ᠂ ᠠᠷᠠᠰᠤ ᠰᠢᠷᠢ ᠎ ᠶᠢ ᠨᠢ ᠠᠰᠢᠭᠯᠠᠬᠤ᠂ ᠲᠦᠷᠦᠯ ᠪᠦᠷᠢ ᠶᠢᠨ ᠡᠳ᠋ ᠵᠦᠢᠯᠡᠰ᠂ ᠮᠠᠯ ᠤᠨ ᠲᠣᠨᠤᠭ ᠬᠡᠷᠡᠭᠰᠡᠯ ᠬᠢᠬᠦ᠂ ᠨᠣᠣᠰᠣ ᠬᠦᠬᠡᠪᠦᠷ ᠢ ᠨᠢ ᠠᠰᠢᠭᠯᠠᠬᠤ᠂ ᠠᠷᠭᠠᠯ ᠢ ᠨᠢ ᠬᠦᠷᠲᠡᠯ᠎ᠡ ᠲᠦᠯᠡᠰᠢᠨ ᠳᠤ ᠬᠡᠷᠡᠭᠯᠡᠬᠦ ᠵᠡᠷᠭᠡ ᠣᠭᠲᠣ ᠶᠢᠨ ᠬᠠᠶᠠᠭᠳᠠᠮᠠᠯ ᠦᠭᠡᠢ ᠠᠰᠢᠭᠯᠠᠳᠠᠭ ᠪᠥᠭᠡᠳ ᠦᠬᠡᠷ ᠨᠢ ᠭᠡᠷᠰᠡᠭ ᠤᠴᠢᠷ ᠠᠴᠠ ᠣᠷᠣᠢ ᠲᠣᠭᠲᠠᠭᠰᠠᠨ ᠴᠠᠭ ᠎ ᠲᠠᠭᠠᠨ ᠬᠤᠲᠠᠨ ᠳᠠᠭᠠᠨ ᠢᠷᠡᠳᠡᠭ ᠲᠤᠯᠠ︽ᠭᠠᠩ ᠲᠤᠯᠭ᠎ᠠ︾᠂ ︽ᠽᠠᠨᠳᠠᠨ ᠬᠥᠨᠥᠭ︾᠎ ᠢᠶᠠᠷ ᠮᠢᠯᠢᠶᠠᠨ ᠱᠠᠩᠨᠠᠳᠠᠭ ᠨᠢ ᠶᠡᠭᠡ ᠪᠦᠯᠢ ᠶᠢᠨ ᠪᠡᠯᠭᠡᠳᠡᠯ ᠢ ᠢᠯᠡᠳᠬᠡᠵᠦ ᠪᠠᠶᠢᠭ᠎ᠠ ᠪᠠᠶᠢᠬ᠎ᠠ᠃          ᠲᠡᠮᠡᠭᠡ ᠠᠮᠤᠭᠤᠯᠠᠩ ᠳᠥᠯᠭᠡᠨ ᠵᠠᠩ ᠲᠠᠢ᠂ ᠤᠨᠤᠯᠭ᠎ᠠ ᠡᠳ᠋ᠯᠡᠯᠬᠡᠨ  ᠳᠤ ᠠᠮᠠᠷᠬᠠᠨ ᠰᠤᠷᠳᠠᠭ᠂ ᠲᠦᠷᠭᠡᠨ ᠨᠣᠮᠣᠬᠠᠷᠠᠳᠠᠭ ᠲᠤᠯᠠ︽ᠮᠥᠩᠭᠦᠨ ᠪᠤᠶᠢᠯᠠ︾᠎ ᠪᠠᠷ ᠱᠠᠩᠨᠠᠵᠤ᠂ ᠡᠭᠦᠷᠢᠳᠡ ᠠᠯᠳᠠᠵᠤ ᠶᠠᠪᠤᠭᠤᠯᠬᠤ ᠦᠭᠡᠢ ᠶᠢ ᠵᠥᠩᠨᠡᠨ ᠪᠡᠯᠭᠡᠳᠡᠭᠰᠡᠨ ᠪᠣᠯᠣᠯᠲᠠᠢ᠃          ᠠᠳᠤᠭᠤ ᠪᠣᠯ ᠰᠦᠷᠦᠭ ᠢᠶᠠᠷ ᠠᠮᠢᠳᠤᠷᠠᠳᠠᠭ᠂ ᠲᠦᠷᠦᠯ ᠣᠶᠢᠷᠠᠳᠳᠠᠭ ᠦᠭᠡᠢ ᠰᠡᠷᠭᠦᠯᠡᠩ ᠴᠣᠪᠣᠭᠤ ᠪᠠᠶᠢᠳᠠᠭ᠃ ᠳᠡᠯᠡᠬᠡᠢ ᠠᠴᠠ ᠵᠠᠶᠠᠭᠠᠭᠰᠠᠨ︽ᠮᠣᠯᠣᠷ ᠡᠷᠳᠡᠨᠢ︾᠎ ᠶᠢ ᠥᠪᠡᠷ ᠤᠨ ᠪᠣᠯᠭᠠᠨ ᠲᠣᠭᠲᠠᠭᠠᠭᠰᠠᠨ ᠬᠤᠶᠢᠪᠢ ᠶᠢ ᠡᠷᠬᠢᠮᠯᠡᠨ︽ᠮᠢᠨᠳᠠᠰᠤᠨ ᠬᠤᠶᠢᠪᠢ︾᠎ ᠪᠠᠷ ᠮᠢᠯᠢᠶᠠᠨ ᠱᠠᠩᠨᠠᠳᠠᠭ᠃          ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠤᠨ ᠤᠯᠠᠮᠵᠢᠯᠠᠯᠲᠤ ᠮᠢᠯᠢᠶᠠᠯᠭ᠎ᠠ ᠱᠠᠩᠨᠠᠯ ᠳᠤ ᠮᠠᠨ ᠤ ᠨᠡᠭᠦᠳᠡᠯᠴᠢᠨ ᠮᠣᠩᠭᠤᠯᠴᠤᠳ ᠤᠨ ᠠᠵᠢᠯ ᠤᠨ ᠠᠷᠪᠢᠨ ᠲᠤᠷᠰᠢᠯᠭ᠎ᠠ᠂ ᠠᠮᠢᠳᠤᠷᠠᠯ ᠤᠨ ᠲᠣᠷᠭᠠᠨ ᠤᠬᠠᠭᠠᠨ᠂ ᠬᠥᠮᠥᠨ ᠎ ᠤ ᠮᠥᠰᠥ᠂ ᠨᠦᠮᠵᠢᠭ ᠥᠭᠡᠳᠡᠷᠡᠭ᠂ ᠮᠠᠯᠴᠢ ᠤᠳᠤᠮ ᠤᠨ ᠡᠷᠳᠡᠮ ᠮᠡᠷᠭᠡᠵᠢᠯ ᠤᠨ ᠶᠡᠭᠡ ᠥᠪ ᠰᠠᠩ ᠮᠡᠳᠡᠷᠡᠭᠳᠡᠵᠦ ᠪᠠᠶᠢᠭ᠎ᠠ ᠶᠤᠮ᠃          ᠣᠳᠣ ᠶᠢᠨ ᠡᠷᠢᠨ ᠳᠤ ᠮᠣᠩᠭᠤᠯᠴᠤᠳ ᠪᠠᠶᠢᠭᠠᠯᠢ ᠶᠢᠷᠲᠢᠨᠴᠦ ᠎ ᠪᠠᠨ ᠲᠠᠨᠢᠵᠤ ᠵᠣᠬᠢᠴᠠᠬᠤ ᠨᠢ ᠰᠤᠯᠠᠷᠠᠵᠤ᠂ ᠦᠨᠳᠦᠰᠦᠲᠡᠨ ᠤ ᠣᠬᠢ ᠤᠯᠠᠮᠵᠢᠯᠠᠯᠲᠤ ᠶᠣᠰᠣ ᠵᠠᠩ ᠦᠢᠯᠡ ᠎ ᠶᠢ ᠮᠠᠷᠲᠠᠬᠤ ᠪᠤᠶᠤ ᠭᠠᠵᠢᠭᠤᠳᠠᠭᠤᠯᠤᠨ᠂ ᠪᠡᠯᠴᠢᠭᠡᠷ ᠢᠶᠠᠨ ᠲᠣᠣᠷᠯᠠᠵᠤ ᠮᠠᠯ  ᠤᠨ ᠪᠠᠶᠢᠭᠠᠯᠢᠯᠢᠭ ᠴᠢᠨᠠᠷ ᠢ ᠬᠦᠨᠳᠦ ᠨᠣᠴᠢᠲᠠᠢ ᠠᠯᠳᠠᠭᠳᠠᠭᠤᠯᠵᠤ᠂ ᠠᠯᠪᠠ ᠲᠡᠳᠦᠢ ᠲᠠᠭᠠᠵᠤ ᠪᠠᠶᠢᠭ᠎ᠠ ᠶᠢ ᠳᠤᠷᠠᠳᠬᠤ ᠳᠤ ᠢᠯᠡᠭᠦᠳᠡᠬᠦ ᠶᠠᠭᠤᠨ᠃ 
ᠢᠷᠡᠯᠲᠡ᠄ ᠰᠢᠨ᠎ᠡ ᠪᠠᠷᠭᠤ ᠵᠡᠭᠦᠨ ᠬᠤᠰᠢᠭᠤᠨ ᠤ ᠰᠣᠶᠣᠯ ᠲᠡᠦᠬᠡ ᠶᠢᠨ ᠮᠠᠲ᠋ᠧᠷᠢᠶᠠᠯ